2 John

Uratuluwi nongan iye iya kili pihin mepo Ngindrai kintakiniman, pe iya kili wawu yau ta Ngindrai mepo unamili wawu iya nongan ndrokonan—pe yo ko, ara pwi, hapeko hu masih mepo hunamili wawu pe hupahasani nongan ndrokonan i— 2 pe nongan ndrokonan ara, ara iripo kiltou, paratesah, nongan ndrokonan ara, ara andre kiro sura tou kinto-kinto.

3 Pahas, koisirai pe ndriya wayis iyau kili Ngindrai Tamarou, pe iyau kili Yesu Kristus mepo Noru Taman, ara andre kiro sura tou kiyapolo nongan ndrokonan pe namiliwai. 4 Yo ara upwes namandran iya, para unime noru wawu hu hayah, ara hurikai iya nongan ndrokonan ta Ngindrai, tehe, Tamarou kinpwandrandrahani rou. 5 Pwen mahapo urakamam isa kili wou pihin, pe kuntatuluwi nongan para pwahanou sahin howen pwi, hapeko nongan para pwahanou mepo tukanwiriy koluw kinna. Pe usok para ndriya tou kimbulihi hamou-hamou. 6 Pe kultuw para namiliwai ara tehen toro: Tukarikai pe koho ndruwa hu nongan para pwahanou tan. Hu nongan ara, ara akanhilingiy pwen koluw kinna, pe nongan para pwahanou tan, ara akarikai kiya kultuw para namiliwai.

7 Upwai toro; paratesah, hu ndramat para pwandrandraman mepo hu kanwong ngawan tehe Yesu Kristus kinsa kinna nombuwe ndramat pwi, ara hu kanna kene kol pwan. Pe hu ndramat tora, ara hu ndramat para pwandrandraman, pe hu kristus para pwakeriu. 8 Pe akoro hinehes ta hu ndramat para pwandrandraman, matisan akatali tesah akanmbulyaniy. Pwen kene wawu ipep, ara andre akawiriy. 9 Pwen ndramat mepo ingap ihomu, pe kinto manau nondriya hinonou ta Kristus pwi, ara Ngindrai kinto kili yiy pwi. Pe ndramat mepo iro manau nondriya hinonou ta Kristus, ara Taman pe Norun kene hiltora kili yiy. 10 Pe kapa hu mepo husa kili wawu pe hu kanwiri hinonou iye kinsa pwi, ara wawu mbuna akawiri hu kiya suwe wawu, ndre mbuna akarawulohani hu. 11 Ndramat mepo irawulohani hu, ara isusuye iya mbulyahu para kultuw pwassin.

12 Nongan soyon iripo kili yo para kuratuluwiy kisa kili wawu, hapeko mbuwali para kuratuluwiy kiya pepa pe kalkan. Yo ara ulohonganiy para andre kusa saisai kusa kili wawu, pe tukanime tou kiya mara rou pe kuwong kisa kili wawu. Pwen andre tukapwesani rou tisingiy.

13 Hu susuya wawu para nali wawu hu ata Ngindrai mepo kintakinimahu, ara hupa ndrokololang isa kili wawu.*Nongan iripo iye ara iwong iyata hu ndramira sios. Kanime nongan ita 2 Yohanes 1