1 John 2

1 Wawu noru, uratuluwi nongan aro isa kili wawu para wawu mbuna akambusi pakut mwomwan. Hapeko kapa hamou kimbusi pakut mwomwan, pwen ndramat hamou para sopwat iripo para kiwong kiya kili Tamarou para kipenanirou—yiy ara Yesu Kristus, Ndramat Imwonen. 2 Yiy, ara iyki yiy mbukenan tehe yukyuk para kirapiyani hu pakut mwomwan torou, pe andre kinrapiyani hu pakut mwomwan torou o, ara pwi, hapeko andre kirapiyani hu pakut mwomwan ta hu ndramat masih kenne para kol pwan.

3 Pe tupahasaniy tehe worou kansapahasani yiy kapa tukaro ndruwa hu nongan para pwahanou tan. 4 Pe ndramat mepo ipa, “Upahasani yiy,” hapeko kinto ndruwa hu nongan para pwahanou pwi, ara yiy ndramat hamou para pwasoyou, pe nongan ndrokonan ta Ngindrai, ara kinto kili yiy pwi. 5 Hapeko kapa ndramat hamou kiho ndruwa nongnan, pwen namiliwa Ngindrai, ara ipep ita kili yiy. Kultuw mepo andre kimbusi worou tukapahasaniy tutora kili yiy, ara tehen toro: 6 kapa ndramat hamou kippai sura Ngindrai, pwen kitokuyani tesah Yesu ngara kimbusiy.

7 Pwen wawu kowase, kuntatuluwi nongan handra para pwahanou howen kinsa kili wawu pwi, hapeko nongan para pwahanou saken mepo akanwiriy koluw kinna. Nongan para pwahanou saken iye, ara nongan ara ko mepo akanhilingiy pwen. 8 Pe tehen tora ko urupo ratuluwi nongan para pwahanou howen handra isa kili wawu, pe nongan ndrokonan para aliy, ara akannimei iro kili Kristus pe wawu yi. Paratesah, lokuhan, ara itapo iyau, pe ngana nongan ndrokonan, ara kinlenganiy.

9 Pwen ndramat mepo ipa ita nondriya ngana Yesu Kristus, hapeko kimwisnani nalin hamou, ara ita ndron nondriya lokuhan. 10 Pwen ndramat mepo ndriyan kimbulihi nalin hu, ara ita nondriya nganan, pe hapesah para kimbusi hu kayos, ara pwi. 11 Hapeko yiy mepo ihingasi nalin, ara ita nondriya lokuhan, pe ita rikai nondriya lokuhan, pe ikowu hape aleheh itapo iya aliy. Paratesah, lokuhan kinyohi maran.

12 Wawu noru, uratuluwi nongan iye isa kili wawu,

paratesah, iya ngala Yesu opu, kintapiyani hu pakut mwomwan tawawu.

13 Yo uratuluwi nongan aro isa kili wawu mepo wawu kanpahas kinna lohongai ndrisiyon tawawu ndrangan niwen kinna kili Ngindrai,

paratesah, wawu kanpahasani yiy koluw kinna.

Yo uratuluwi nongan aro isa kili wawu mepo mahapo ko wawu pwotisingi lohonga wawu iya kili Ngindrai,

paratesah, akantamwaitini Sinai.

14 Uratuluwi nongan aro yi isa kili wawu mepo tehe hu mbunah,

paratesah, akanpahasani Tamarou. Yo uratuluwi nongan aro isa kili wawu mepo wawu kanpahas pwen kinna ata Ngindrai mepo yiy para koluw kinna.

Yo uratuluwi nongan aro isa kili wawu mepo mahapo ko wawu pwotisingi lohonga wawu iya kili Ngindrai,

paratesah, wawu pwokeya wawu,

pe nongna Ngindrai, ara ita lohonga wawu lang masih,

pe akantamwaitini pwoke ta Sinai pwen.

Ndriya wawu mbuna kimbuluhi melit para kol pwan

15 Ndriya wawu mbuna kimbuluhi kultuw mwomwan ta hu ndramat para kol pwan, ndre sehe kultuw mwomwan para kol pwan. Kapa ndramat hamou ndriyan kimbuluhi kultuw mwomwan ta hu ndramat para kol pwan, ara namiliwai ta Tamarou kinto kili yiy pwi. 16 Paratesah, hu kultuw mwomwan masih ta hu ndramat para kol pwan— tehe hu namiliwai para nombuwe ndramat, pe namiliwai para mara ndramat kilimiri melit pe kinamiliy, pe kultuw para kasikiye ndramat kiya melit soyon—hu kultuw mwomwan masih aro, ara kinyau kili Tamarou pwi, hapeko iyau kol pwan. 17 Pe hu kultuw mwomwan ta hu ndramat para kol pwan, pe hu namiliwai para aliy, ara andre kimmun o mwaihei, hapeko ndramat mepo imbusi namiliwai pwokeyan ta Ngindrai, ara andre kinto-kinto.

Hu mepo hupa hukowu ta noru Ngindrai kamai, ara marahu kiro

18 Wawu noru, lang kinsa komulmun, pe akanhilingiy tehe kristus pwasoyou, ara itapo isa. Pe mahapo yi, ara hu kristus pwasoyou soyon, ara hu kansa. Pwen tehen aro ko tukapahasaniy tehe lang kinsa komulmun. 19 Yihu kantali rou kanna mawen, hapeko yihu ara para surarou imwonen pwi. Paratesah, kapa hu para sura tou, ara andre hu koro manau sura tou, hapeko yihu tali rou huyau, ara ipwainganiy tehe yihu para sura tou pwi.

20 Wawu kanwiri lomwes iyau kili Mwoiwan Haiyan ta Ngindrai, pe wawu masih wawu pahasani nongan ndrokonan ta Ngindrai[a]. 21 Wawu kankowu nongan ndrokonan pe uratuluwi nongan isa kili wawu, ara pwi, hapeko wawu pahasaniy, paratesah, pwasoyou kinyau nongan ndrokonan pwi. 22 Ndramat para pwasoyou, ara hiyeh? Ndramat mepo ipa ikowu tehe Yesu, ara Kristus. Ndramat tehen tora, ara yiy kristus para pwakekeriu—yiy ipa ikowu ta Noru Ngindrai Kamai pe Taman. 23 Ndramat ipa ikowu ta Noru Ngindrai Kamai, ara Taman kinto kili yiy pwi, pe yiy mepo ipohowe Noru Ngindrai Kamai iya ngawan, ara Taman ita kili yiy.

24 Pwen tesah akanhilingiy koluw kinna, ara ita manau kili wawu. Kapa tesah akanhilingiy ara itandron kili wawu, pwen wawu tora ndron kili Noru Ngindrai Kamai pe Taman i. 25 Pe tesah kintandranga rou kinna aliy, ara iye—ara taleh andre kinto-kinto.

26 Yo urupo ratuluwi hu nongan aro isa kili wawu, ara iyata hu mepo hu pakanohonou para kaluwani wawu kayasongsin. 27 Hapeko lomwes mepo wawu kanwiriy iyau kili yiy, ara ita manau kili wawu, pe kinlahi hamou kisa pe kihinuwani wawu, ara pwi. Hapeko Mwoiwan Haiyan kinhinuwani wawu kinna melit masih, pe lomwes ara, ara ndrokonan, pe pwasoyou pwi—pwen kinhinuwani wawu pe akoro manau kili yiy.

Hu noru Ngindrai pe pakut mwomwan

28 Pwen mahapo, wawu noru, akoro pai manau kili Kristus, pwen kapa kiro mwonen nakimui kisa, ara andre tukoro tine pwokeyan, pe andre tukanmasi kiro mbulmaran kiro mwonen kisa, ara pwi.

29 Kapa wawu pahasaniy tehe kultuwayin ara imwonen, pwen wawu pahasaniy tehe hu ndramat masih mepo hukambusi tesah imwonen, ara yihu noru Ngindrai.

<- 1 John 1 1 John 3 ->