Ivala'asina 15

Anelu Kalakoi Ka Vasi'avana Davata Oleta Kalakoi Ka Deabita.

1 Akailao 'eva koa ka namavaikana mai nama'ina vaika vutuvutuai aikaia. Anelu kalakoi ka imatai 'eva anaana si'avata vaika davata oleta umauta kalakoi ka deabita, 'olana katania'i 'eva Dilava ena badu bevaolea.

2 Inoku akailao dava ka itani 'atu 'eva kalasi boina mai'alovana aikaia. Kau ua'i 'atu 'aba'abanai delava kauta 'eva aivala sisina namavaikana mai ikaikana va'ava'ana mai vana numelana deakuta kauta. Dilava kita vana apa kanaua evenita deabi. 3 Inoku Mose Dilava ena da'alabi kauna masina mai Mamoe nakuna masina deabita,

“Emu vinaula 'eva namavaikata

mai mediata vaika,

Lovia namana siavu boutai

Dilavana e.

Emu dala 'eva

komolota mai umauta,

Kanobata boutai eta Lovia.

4 Lovia namana e,

dai 'eva makaumu sia bemakau,

mai vamu sia beabia isi?

'Olana oni sibomu 'eva

okabukabu.

Kanobata boutai be'asi

oni vailamuai bekukudivo venimu,

'Olana oni emu koakoa komolota

'eva 'ani deika.”

5 Katania mulitai akailao vutuvutuai lo'e kabukabuna iluvuna aikaia, ua 'eva Dilava ena talavatu aiolena. 6 Inoku anelu kalakoi ka anaana si'avata vaika davata kalakoi ka imatai deabi ua'i dela'asi deasi, tubu'a nama'ita vaika vata linen, mai'amale 'amaleta devadodota, mai pedetai 'eva kolo 'apata. 7 Inoku mauli davata vanina ka kolo voduta kalakoi ka mia keinikeini Dilavana ena baduai devonu, eabita anelu kalakoi ka kataua evenita. 8 Inoku Dilava ena nuavi mai ena siavu vaitabuna 'eva lo'e kabukabuna laloana evavonua, inoku sia kau ka bema da'adodo bemada'amo anelu kalakoi ka kataua anaana si'avata vaika davata kataua bemavaoleta.

<- Ivala'asina 14 Ivala'asina 16 ->