1 Ia eta ula devalavala 'eva lai aunakoiai lai bakalima lai bada'a Italia, inoku Paulo mai vabuto'o kauta vaida 'eva kuali kauta sinavu ka e'olavaita kauna ka vana Iulio imanai deudata, ia 'eva lovia 'olana Aukusto ena kuali kauna ka. 2 Lai Adalamutio aunakoina kai lai aele'au inoku Asia aveketa nabuata lai baveauta lai aveau asi, Tesalonikai Makedonia kauna ka vana Alisitako vaka lai viloamaiai. 3 Elani 'eva Sidonoai lai avadai'au, inoku ua'i Iulio ena iulaveni koana Paulo kevanai evavaia 'eva beda'a ena kau beikata ena ula davata vaida bevenia. 4 'Abu kanaua lai avikania lai aveau asi 'udai 'eva lai ada'a Kupulo motumotu laloana eva'olo'oloa duasi lai aveaua 'olana lani evailamai easi. 5 Kilikia mai Pamupulia 'atutai lai aveau keini lai avikanita lai ada'a Lukia kanobatanai 'abu vana Mula ai lai avadai'au.

6 Ua'i 'eva kuali i'olavaina kauna kanaua eta'u Alesandelea aunakoina ka beda'a Italia davana edavalia, inoku kanaua'i evanekemai keini. 7 Boni doutamo maka'imaka'i lai aveau inoku mai bavunumai lai ada'a Kenido kevanai. Emai ula 'abuna lai aveau venia laloanai valea vailamaiai easi sia edaimai 'ounai Salamone i'donai lai aveau keini lai ada'a Kelete motumotuna laloana duasi lai aveaua. 8 Mai bavunumai nabua 'aba'abana lai aveaua lai asi avadai'au 'abu ka vana ‘Aunakoi Eta Vadai'au 'Abuna Koevana Vaika’, 'abu kanaua mai Lasea vanuana viloata 'eva sia edau'a.

9 Boni doutamo ua'i deole inoku lani esi'avanai 'atuai veauna 'ani besi'avana vaika 'olana vali'u Iuda kauta eta ani kabu melalana 'ani ekeinia. Kanaua 'ounai Paulo ia evaikabasita makava ediaka, 10 “Kau boumuiai e, lau eta kalima aikala vali'u nia'i ekada'a 'eva besi'avana vaika inoku eta dava doutamo betaule, aunakoi bemukamuka mai eta mauli vaka ekaito'au.” 11 Beia kuali i'olavaina kauna 'eva Paulo ena luva sia eabivenia, ia aunakoi 'uala kauna mai aunakoi ikalina kauna mo leleta eda'avai. 12 'Elu namavaikana ua'i aunakoi bevadai'au 'eva emai mia sia benama'ina, kanaua 'ounai kau doutamo 'eva deula lai bamaveau asi 'udai inoku bemadaia koanai Poenikia ai lai bamavadai 'au inoku 'elu namavaikana melalana 'eva ua'i mo lai bamamia. Kelete laloanai aunakoi eta vadai'au 'abuna kanaua mo enama'ina 'olana dae duasi divo duasi ita viloata mai dodo duasi divo duasi ita viloata duasi evailata.

13 Lani nama'ina divo duasi eunu koanai, ia delalovaia eta ula lanina 'ani eunu, 'ounai do'o develia 'au inoku Kelete nabuana 'aba'abana lai aveaua lai ada'a. 14 Beia lai aveau asi sia e'oima 'eva Valea ka vana Eulakuilo 'eva motumotu duasi eunu easi. 15 Levo aunakoi edavalia koanai, aunakoi Levo evailala 'eva sia edaia, kanaua 'ounai sia lai aula inoku lani evivumai lai ada'a. 16 Motumotu kikina ka vana Kauda laloana eva'olo'oloa duasi lai alu keini koanai, emai ke'epi lai ado'o 'au laloanai bavunu namavaikana lai adavali. 17 Inoku ia deta'u ke'epi develia 'au koanai 'onau vaida aunakoi venunai develita keini dedo'o 'inita, asi'i ua'i Libia polenai demaveau'au makauna 'eva palai deva'ovuta mai do'o dene'eia, inoku aunakoi ealu eda'a. 18 Levo eunu si'asi'a eda'a boni ivaluanai 'eva kau eta dava vaida dekapoasi. 19 Mune'e eda'a boni ivakoinai 'eva aunakoi davana umauta vaida dekapoasi. 20 Boni doutamo laloatai melala mai visiu sia ka lai aikaia mai Levo pasisina eunu basibasi, emai lalovai boutai deole lai alalovaia sia lai bamauli.

21 Kau boutai sia deaniani kovo melala edau'a vaika mulinai, Paulo eko'isi ia vailatai elavadivo inoku ediaka, “Kau boumuiai e, oi lau lele'u bomaika Kelete ai sia kamaveau asi koanai, si'avana kanania sia kamadavalia mai sia dava ka bemasi'avana maivaka sia dava ka kamavataulea. 22 Beia vali'u lau oi anoimui, nuamui oi bovakula'ilata, 'olana nia'i sia kau ka ena mauli betaule, aunakoi sibonamo betaule. 23 'Olana lavi boniai e'u Dilava akukudivo venia Dilavana ena anelu esinia easi keva'uai elavadivo, 24 inoku e'ou'u ediaka, ‘Paulo e, sia bomakau. Oni 'eva Kaisala vailanai bolalava bevaluvamu, Dilava ena vanama'ina oni akamuai 'ounai aunakoiai oi oele'au kauta katania boutai bemauli.’ 25 Kanaua 'ounai kau boumuiai nuamui oi bovakula'ilata, 'olana lau Dilava abivenia 'eva ia lau e'ou'u davata vitaitatai bepupulu. 26 Beia ita 'eva ekaalu ekada'a motumotu kai ekavule'au.”

27 Boni iva'ouka vanina (14) boninai lai 'eva Adalia 'atubatanai lai avule do'o. Malolua laloanai aunakoi kauta deonovaia kanobata 'ani lai akevaia. 28 Kanaua 'ounai 'onau deva'ovua eda'a 'atu 'oulana devakovoa 'eva lova lua navui (20), kena lai amia kovo mulinai devakovoa 'udai 'eva e'ovu lova 'ouka ima (15). 29 Aunakoi kauta demakau 'eva emai aunakoi asi'i bika'ai emaakua 'au 'ounai do'o vani aunakoi mulinai lai ava'ovuta, inoku deula bemalani kaokao. 30 Aunakoiai devinaula kauta deula beveauovo, ke'epi ka 'atuai deva'ovua 'eva dedede dediaka aunakoi vailanai do'o vaida beva'ovuta. 31 Inoku Paulo kuali kauta mai ia i'olavaita kauna e'outa ediaka, “Kau katania aunakoiai sia bemimia koanai, oi sia oi bomauli.” 32 Kanaua 'ounai kuali kauta ke'epi valona detauia uku e'ekoasi 'atuai evuleasi.

33 Melala ena dae ekevai laloanai, Paulo ia boutai enoita iani kena beania, e'outa ediaka, “Vali'u 'ani melala iva'ouka vanina (14) 'eva oi ovi'ima mo oi omimia, sia dava kena oi oania. 34 Vali'u 'eva anoimui iani kena oi bo'ani, oi boaniani 'eva mauli oi boabia. 'Olamuiai vui sia ka'onamo ka betaule.” 35 Kanaua eluva koma mulinai, palaoa vaida eabita ia boutai vailatai Dilava kevanai evanama'inata, mulinai ekovia inoku eania makava. 36 Boutai nuata evakula'ilata inoku sibota vaka iani vitalua deabi deani. 37 Lai kaumai boutai sinavu lua kalakoi ka navui kalakoi (276) 'eva aunakoiai lai aele'au. 38 Boutai deaniani bo'ata dekubu kave'i koanai, iani dekapoasi 'atuai aunakoi bevaveaveala.

39 Taba elele koanai, kua deikaia beia 'abu dava sia deikaiaune, beia kanobata ka nabuana nama'ina deikaia, inoku nuata devaka'ona deula aunakoi nabua kanaua'i bemavadaia 'au. 40 Do'o valota detau uku, do'o 'atuai devikanita kali valona devadadata ovo inoku palai develia 'au lani bevivuta beda'a nabuai bevadai'au. 41 Beia aunakoi 'eva nekeneke ai emia'au, vailana emia'au 'ini sia e'iuvai'iuvai kovo, inoku ka'uda namata deta'u aunakoi 'ununa deakuia mukamuka. 42 Kuali kauta eta lalovai 'eva vabuto'o kauta beaku bata 'olana asi'i demana'u 'au inoku demaveau 'akauma 'ounai. 43 Beia kuali i'olavaina kauna eula Paulo bevamaulia 'ounai kuali kauta eta lalovai vinaulana bevavaia davana e'alavua. Inoku e'outa na'u deikabasi kauta belovo asi makava benana'u beda'a nabua. 44 Kau kalina bounai 'eva vaida aunakoi papa'ona si'asi'ata deabi mai vaida aunakoi davana kikita deabi dena'u. Kanaua boina devavaia 'eva boutai nabuai dela'asi mai nama'inata.

<- Veauneke Eta Vinaula 26Veauneke Eta Vinaula 28 ->