Veauneke Eta Vinaula 2

Pentikosi Melalanai
Idume Kabukabuna Easi.

1 Pentikosi melalanai abiveni kauta boutai 'abu ka'onamoai deakubou. 2 Inoku vutuvutuai 'ulu ka alimo easi itani lani namana ka eunu 'uluna boina, ia demia do'u lumana bounai evavonua. 3 Maivaka dava ka deikaia ikana itani 'alova vulena malana boina eda'a ka ka laikubuatai. 4 Ia boutai Idume Kabukabunai 'ani devonu, inoku Idume Kabukabuna evenita vitaitanai vanua edeata edeata leletai deluva.

5 Kanaua melalanai Iuda kauta Dilava makauna demakau kauta kanobata edeata edeatai demia kauta deasi Ielusalemai. 6 'Ulu kanania deika koanai, 'abu ka'onamoai deakubou maivaka do'u 'eva nama vaikana, do'u kauta delalo toatoa, 'olana ka ka leleta umaunai abiveni kauta vali kanaua deluvaia 'uluna deika. 7 Boutai detabulovo si'asi'a mai nuata debavunu dediaka, Deluluva kauta katania 'eva Kalilea kauta, una? 8 A boina ita boutai 'eva ka ka leleta umaunai deluluva leleta ka'ika? 9 Ita 'eva kanobata edeata edeata ai kasi, Patia, Media, Elama, Mesopotamia, Iudea, Kapadokia, Ponto, Asia, 10 Pelikia, Pamupulia, Aikupito ai maivaka Kulene ai, ua 'eva Libia eta 'abu ka. Loma ai deasi kauta, vaida 'eva Iuda kauta vaida 'eva sia Iuda kauta beia kukudivo dalanai Iuda kautai devaaota kauta, 11 vaida 'eva Kelete mai Alabia ai deasi. Kau kataua Dilava koa namata evavai koata lelemai umaunai deluva vai leleta lai aika.” 12 Boutai detabulovo mai delalo to'ato'a, ia ka ka sibota delavuai lavuai dediaka, “Kanania 'eva dava?” 13 Beia vaida 'eva abiveni kauta demediamedia vaita dediaka, “'Ani deinu ba.”

Petelo Pentikosi Melalanai Eilolo.

14 Inoku Petelo mai banona 'ouka ka ita deko'isi, ia mato eilolo venita 'unu'unu ediaka, “Iuda kaumui mai Ielusalemai oi omimia kaumui e. Kaiamui ovaala kave'i. Dava kanania a epulu koma davana valina bavaikabasimui. 15 Lai kaumai katania 'eva sia lai ainu ba, oi olalovaia boina, maivaka vali'u mo 'avu'avuni melala koana kalavani ka. 16 Beia enolea kauna Ioela kanania eluva koma ediaka,

17 ‘Dilava ediaka, Melala to'ona be'asi koanai,

Lau Idume'u 'eva kau boutai akatai bava'ovua.

Nakumui momoluaneta mai 'a'ateta benolea,

emui kau 'alu'aluta 'eva bemakakeini, maivaka emui kau

momotuta benivinivi.

18 Mune'e melala kanaua'i lau Idume'u 'eva e'u da'alaabi kauta momoluaneta mai 'a'ateta akatai bava'ovua inoku

ia 'eva benolea.

19 Vatabulovo davata vaida vutuvutu akanai bavala'asita,

maivaka kanobata akanai koa namata vaida bavapuluta,

lala, 'alova maivaka vaitabu imusina.

20 Lovia namana ena melala namana mai nuavina e'avi e'asi koanai,

melala 'eva bevabulaavu,

vuia 'eva be'aola itani lala boina.

21 Inoku Lovia namana vanai

be'ae'ae kauta 'eva bemauli.’

Iol 2.28 — 32

22 “Isalaela kaumui e, kaiamui ovaala kave'i. Iesu Nasaleta kauna 'eva Dilava ia nuanai evinaula vatabulovo vinaulata mai koa namata vaida evavaita, koakoata oi viloamuiai evala'asita 'eva oi boumuiai oi oikabasita kave'i. 23 Dilava ena ula maivaka ena ikabasi ai Iesu kanania 'ani siako eva'olua dalanai oi evenimui. Oi ota'u si'avana kauta imatai oi oudaia au ido'o valaukuna akanai dekokoia 'au eba. 24 Beia Dilava eta'u bai evako'isia 'udai, ba ena anaana ai eluvu ne'ea, 'olana ba ia beabi 'inia ua'i vabuto'o 'abunai 'eva sia edaia. 25 Davida ia valina ekava ediaka,

‘Lovia namana 'eva melala

bounai vaila'uai aikala.

'Olana ia 'eva lau idiba'u duasi,

lau sia bamakau kovo.

26 Kanaua 'ounai nua'u elalonama,

mai mala'u 'eva lalonama luvata eluvavaita, kau'u 'eva nuabata laloanai bemimia.

27 'Olana idume'u 'eva mitavai sia bovikania, maivaka emu Kabukabu kauna sia ua'i bovikania bepepeda.

28 Oni ota'u mauli dalana ovaika'u,

vailamuai 'eva lalonamai

bovavonu'u.’

Sal 16.8-11

29 “Bo'akala'u e! Lau 'eva oi kevamuiai 'ava'avata Davida valina bakava kave'i. Oi oikabasi ia 'eva eba inoku dekoleia, mitavana 'eva vali'u nia'i ita kevatai emimia. 30 Beia Davida 'eva enolea kauna inoku eikabasia 'eva Dilava eta'u ia eluva'ana'i pasisi evenia, ia kekena ka 'eva ia ena mia'au 'abunai ua'i bemia'au. 31 Davida eta'u vailai dava bepupulu davana eikaia 'ana'i 'eva Keliso ena ko'isi 'udai luvana eluvavaia ediaka,

‘Ia 'eva mitavai ua'i sia bevikania,

ia kauanina sia bepepeda.’

Sal 16.10

32 Dilava eta'u Iesu kanania ba ai evako'isia 'udai. Lai boumaiai lai aikaia maivaka lai aikabasi. 33 Dilava eta'u ia eabia isi imana idibana duasi evamiala. Kamana eluva'ana'i vaia Idumena Kabukabuna 'ani eabia. Inoku 'ani esinia 'ovu, vali'u ena siavu makamuiai 'ani oi oikala maivaka kaiamuiai 'ani oi o'ika. 34 'Olana Davida 'eva sia ele'au eda'a vutuvutuai beia ia ediaka,

‘Lovia namana 'eva e'u Lovia e'ouia ediaka,

Lau idiba'u duasi miadivo,

35 beda'amo oni emu 'ou kauta

aemu ivalavana 'au davanai

bavaaota.’

Sal 110.1

36 “Kanaua 'ounai Isalaela kaumui boumuiai oi boikabasi komolo 'eva oi ota'u Iesu au ido'o valaukuna akanai oi okokoia 'au kauna 'eva Dilava eta'u 'ani Lovia namana mai Keliso ai evaaoa.”

Kau Do'unamo Delalo 'Udai
Vaidi'u Kabukabu Koana Deabia.

37 Kau luva kataua leleta deika koanai nuata debata inoku Petelo mai veauneke kauta delavuaita dediaka, “Bo'akalamai e! Lai dava lai bavavaia?” 38 Petelo ia e'outa ediaka, “Oi boumuiai oi bolalo 'udai, ka ka Iesu Keliso vanai oi boidi'u kabukabu emui si'avana i'ou kaota dainai. Inoku Idume Kabukabu ena ainama 'ani oi boabia. 39 Luva'ana'i kanania 'eva oi mai nakumui daitai maivaka dau'ai vaika demimia kauta kataua Lovia namana eta Dilava be'aeta kauta boutai daitai.”

40 Petelo luva doutamo vaidai kau e'outa kave'i maivaka evakula'ilata ediaka, “Ulu si'avana kanania'i oi bovamaulimui.” 41 Petelo ena luva deabia dae kauta boutai vaidi'u kabukabu koana deabia, melala kanaua'i kau 'eva sinavu boutai koinavui (3,000) abiveni kauta eta do'u laloanai dedodo.

Abiveni Kauta Boutai Nuata Ka'onamoai 'Abu Ka'onamoai Demia.

42 Ia 'eva melala boutai veauneke kauta eta vaikabasi luvata lelete ikata deulaveni mai deakubou ka'ona 'abu ka'onamoai, ita deaniani ka'ona maivaka demeamea ka'ona. 43 Veauneke kauta vatabulovo vinaulata mai koa vinaulata doutamo devavaita inoku kau boutai 'eva Dilava makauna demakau. 44 Inoku abiveni kauta boutai deakubou ka'ona 'abu ka'onamoai mai eta dava boutai dekole vidavena. 45 Eta lavo mai kano detavatavavai inoku kau ka ka eulavenia monina vitaitanai devenia. 46 Melala bounai Dilava ena lo'e kabukabuna laloanai deakubou, maivaka luma ka ka laloatai mailalonamata ita mai nuata nama'inata ita deviani vidavena, 47 Dilava devanama'inala, kau boutai ia delalonama venita. Melala bounai Lovia namana etata'u evamaulita kauta kataua 'eva abiveni kauta ita evaka'onamota.

<- Veauneke Eta Vinaula 1 Veauneke Eta Vinaula 3 ->