San Marcos 9

1 Jesús noiwa okinmili:

—¡De milajka, nomechilia: sikimeh akimeh nika kateh mach mikiskeh asta ijkuak kitaskeh ya tlanawatijtok Dios ika nochi iweletilis!

Jesús moixpatla

(Mt. 17:1-13; Lc. 9:28-36)

2 Chikwase tonati satepa, Jesús oyá kan se tepetl, iwa sanwel okinwík n Pedro, Jacobo iwa n Juan, iwa ompa inyakapa, Jesús omoixpatlak. 3 Itlake otsótlanki iwa omókopki istaktik kemi tesiwitl non amaka weletiskia ijkó kikawaskia, maya kitlawelpakaskia. 4 Noiwa okitakeh Elías iwan Moisés non omotlapowijtokah iwan Jesús. 5 Ijkuakó Pedro okili n Jesús:

—Tlamachti, sa kuali nika tikateh. Matikinchijchiwakah eyi akákalteh, se moaxka, se iaxka Moisés iwa ok se iaxka Elías.

6 Itlamachtijkawah saikpanoa omomojtijkeh, yika n Pedro mach okimatia tlan okijtoaya. 7 Ijkuakó owaltemok se mextli iwa okinkemelo. Itech non mextli omokak se tlájtoli non okijtoayah:

—Ye ni Nokone non niktlasojtla, xikkakikah.

8 San nima otlatlachixkeh ik nowia, iwa ayakmaka okitakeh, sanwel okitakeh n Jesús.

9 Iwa ijkuak owaltemoayah ikpak tepetl, Jesús okinnawati itlamachtijkawah:

—Amaka xikmatiltikah tlan ononkitakeh, asta ijkuak Ne Non onimochi ni tlakatl manimoyoliti.

10 Yika, okitlaatijkeh nin tlájtoli maya omotlajtlaniayah tlan kijtosneki moyolitis oksepa. 11 Ijkuakó, okitlajtlanijkeh n Jesús:

—¿Tleka kijtoah non kitemachtiah n tlanawatílistli achto wits Elías?

12 Jesús okinnankili:

—Milák, Elías achto wits, iwa kiyektlalis nochi. ¿Iwa tlan kijtoa itlajkuilol Dios de Ne Non onimochi ni tlakatl? Kijtoa satlawel nitlaijyowis iwa n tlakah nechtlawelitaskeh. Is. 53:3 13 Pero Ne nomechilia Elías yowitsa, iwa n tlakah okitoktijkeh san tlan yejwah okinekeh, ijkó kemi ijkuilitok mochiwaskia.

Jesús kipajtia se télpochtli non okipiaya se espíritu amokuali

(Mt. 17:14-21; Lc. 9:37-42)

14 Ijkuak okalakikoh kan okatkah miakeh tlakah, okinmajsitoh non oksikimeh itlamachtijkawah. Sikimeh non kitemachtiah n tlanawatílistli non omokualanijtokah iwan yejwah. 15 N tlakah satlawel omotlajtlachialtijkeh ijkuak okitakeh n Jesús iwa omotlelojkeh okitlajpalotoh. 16 Ijkuakó Jesús okintlajtlani:

—¿Tleka nonmonanankiliah iwa n nekateh?

17 Iwa se tlakatl okijto:

—Tlamachti, nika onimitswalikili nopiltsi, porke kipia se espíritu amokuali non amo kikawilia matlajto. 18 Iwa san kan yetos, n espíritu amokuali kitlamotla, iwa kitoktia makamapoposojkisa. Noiwa manejnetsonikah itlanwah iwa kisentititsa. Yonikintlatlaujtih motlamachtijkawah makikixtilikah n espíritu amokuali pero mach oweletkeh.

19 Jesús okinmajwak itlamachtijkawah:

—¡Nomejwah mach nonnechneltokah! ¿Asta kemania nomechxikojtos? ¡Xikualikakah nika n télpochtli!

20 San nima okiwikakeh n télpochtli inawak Jesús, iwa ijkuak n espíritu amokuali okitak n Jesús, okitokti n télpochtli mamotlalwiteki, omotlalmemelo iwa okitokti makamapoposojkisa. 21 Ijkuakó Jesús okitlajtlani n teta:

—¿Yowejka ijkó mochijtiwits mopiltsi?

N teta okinankili:

—Desde chokotsi. 22 Iwa miak welta kitlamotla itech tletl iwa kualchiwa ijtik atl porke kineki kimiktis. Yika, tla Tejwatsi weletis techpalewis, techiknomati iwa techpalewi.

23 Jesús okili:

—¿Tleka techtlajtlania kox niweletis? Nochi weletis mochiwas para akin nechneltoka.

24 Ijkuakó ita n télpochtli owaltsajtsik:

—¡Nitlaneltoka, pero techpalewi para okachi manitlaneltoka!

25 Ijkuak Jesús okitak opé moololoah miakeh tlakah, okijto:

—Te espíritu amokuali non tiktoktia n télpochtli amo matlajto nion matlakaki, Ne nimitsnawatia xikkajkawa n télpochtli iwa ayakmó oksepa xiwalmokopa itech.

26 N espíritu amokuali otsajtsik iwa okitokti n télpochtli oksepa mamimiki, iwa okikakajte n télpochtli kemi non yomikki. N tlakah okijtoayah yomikki n télpochtli. 27 Pero Jesús, okimakitski n télpochtli iwa okipalewi mamoketsa.

28 Otlanki Jesús okalak ijtik se kali, iwa itlamachtijkawah okitlajtlanijkeh.

—¿Tleka tejwah amo otiweletkeh otikkixtijkeh n espíritu amokuali?

29 Jesús okinmili:

—Ninteh espíritus amokualteh sanwel mokixtia ika miak tiotsajtsílistli.

Jesús oksepa kinmilia kenomi mikkis

(Mt. 17:22-23; Lc. 9:43-45)

30 Ijkuak oyajkeh de ompa, opanokeh ik Galilea. Pero Jesús mach okinekia aka makimati, 31 porke okinmachtijtoka itlamachtijkawah:

—Ne Non onimochi ni tlakatl nechtemaktiskeh inmak n tlaltikpaktlakah, iwa nechmiktiskeh, pero ipan eyi tonati nimoyolitis.

32 Pero itlamachtijkawah mach okajsikamatiah tlan Jesús okinmiliaya, iwa okimawiliayah kitlatlajtlaniskeh.

Non okachi weyijkatitok

(Mt. 18:1-5; Lc. 9:46-48)

33 Ijkuakó okalakitoh Capernaúm, iwa ijkuak yokatkah ijtik kali, Jesús okintlajtlani itlamachtijkawah:

—¿Tlan ononkimolijtiwalayah itech ojtli?

34 Pero mach okinankilijkeh. Itech ojtli omokualanijtiwalayah porke okinekiah kimatiskeh akin okachi weyijkatitok. 35 Ijkuakó Jesús omotlali, iwa okínnotski n májtlaktli iwa ome itlamachtijkawah, iwa okinmili:

—Akin kinekis kinyakanas oksikimeh, achto matetlakita iwa makipalewi san akin yetos.

36 Satepa Jesús okónnotski se chokotsi iwa okontlali tlatlajkotia, otlanki okimonapalolti iwa okinmili:

37 —Akin kiselia se chokotsi kemi ni itech Notoka, Ne nechselia, iwa akin nechselia amo san Ne nechselia, yej noiwa kiselia Dios Akin onechaltítlanki.

Akin amo techtlawelita kajki towah

(Mt. 10:42; Lc. 9:49-50)

38 Ijkuakó Juan okili n Jesús:

—Tlamachti, otiktakeh se tlakatl non okinkixtiaya espíritus amokualteh itech Motoka. Tejwah otikilijkeh ayakmó ijkó makichiwa, porke ye amo nemi towah.

39 Pero Jesús okinmili:

—Amo xiktlakawaltikah, porke akin kichiwa se milagro itech Notoka, mach weletis fiero nechtenejtinemis. 40 Porke akin amo techtlawelita, kajki towah. 41 Akin nomechtliokolis maya san se xikali atl itech Notoka nomejwah akimeh iaxkawah n Cristo. De milajka nomechilia ye kiselis itlaxtlawil.

Matimotlachilikah amo kichiwa tiwetsiskeh itech tlajtlákoli

(Mt. 18:6-9; Lc. 17:1-2)

42 'Akin kitoktis matlajtlakolchiwa se akin nechneltoka, okachi kuali makikechilpilikah se weyi tetl iwa makontlamotlakah ijtik weyi atl. 43 Tla moma mitstoktia xikchiwa tlajtlákoli, xikmotekili, okachi kuali xikalaki kan ilwikak timatepo, iwa amo tiajsitok mamitsontlamotlakah miktla, kan ayik sewis n tletl. 44 [a]

45 'Iwa tla mokxi mitstoktia xikchiwa tlajtlákoli, xikmotekili. Okachi kuali xikalaki kan ilwikak ti ikxitepo iwa amo tiajsitok mamitsontlamotlakah miktla. 46 [b]

47 'Iwa tla moixtololo mitstoktia xikchiwa tlajtlákoli, xikmokixtili. Porke okachi kuali xikalaki ilwikak san ika se moixtololo, iwa amo tiajsitok mamitsontlamotlakah miktla, 48 kan okuilimeh ayik mikkih iwa n tletl ayik sewi.

49 'Porke nochteh n tlakah mopuyeliskeh ika tletl. 50 N istatl satlawel kuali, pero tla n istatl mach ok puyak, ¿kenomi weletis ika nontlapuyeliskeh? Nomejwah xiyetokah kemi n istatl non kuali iwa ximoyekwikakah.

<- San Marcos 8 San Marcos 10 ->