San Juan 20

Jesús moyolitia

(Mt. 28:1-10; Mr. 16:1-8; Lc. 24:1-12)

1 N domingo, semi kuinal ijkuak ok otleyuatoka, María de Magdala oyá kan okitookakeh n Jesús. Iwa ijkuak okalakito, okitak yokachijkeh n tetl non okikamatsaktoka n miketékochtli. 2 Ijkuakó omotlelo María iwa oyá kan okatka n Pedro iwa n Juan non Jesús okitlasojtlaya, iwa okinmili:

—Yokiwikakeh ikuerpo n Toteko Jesús de kan miketékochtli, iwa amo tikmatih kan okikawatoh.

3 Pedro iwa Juan okiskeh iwa oyajkeh okitatoh n miketékochtli. 4 Sansikah omotleloayah, pero Juan okachi omotlelo ke Pedro iwa achto okalakito kan miketékochtli. 5 Juan oontláchixki tlaijtik, iwa okimitak n tsótsolteh ompa okatkah, pero mach okalak. 6 San nima okalakiko n Pedro iwa okalaktíwetski kan miketékochtli. Ye noiwa okimitak n tsótsolteh ompa okatkah, 7 iwa n mantajtsótsoli non ika okuakemelitoka n Jesús, ixkoya okatka. 8 Ijkuakó Juan okalak kan miketékochtli, iwa ijkuak okitak, otlaneltokak. 9 Porke achto, ayamó okajsikamatiah itlajkuilol Dios, Jesús moyolitiskia de kan mikemeh. 10 Ijkuakó imomachtijkawah omokopkeh inchajcha.

Jesús kimonextilia María de Magdala

(Mr. 16:9-11)

11 Pero María de Magdala omoka kaltempa chokatok inakastla n miketékochtli. Keman ochokatoka oontláchixki ijtik n miketékochtli, 12 okimitak ome ángelteh ika intlakeh istak, ninteh ángelteh oewatokah kan achto owilantoka ikuerpo Jesús, se ik ikuatsontla iwa ok se ikxitla. 13 N ángelteh okitlajtlanijkeh:

—Siwatl, ¿tleka tichoka?

Ye okinmili:

—Porke okiwikakeh ikuerpo Noteko iwa amo nikmati kan okikawatoh.

14 Ijkuak ijkó okinmili, omókopki iwa okitak n Jesús ompa moketok, pero amo okixma kox ye n Jesús. 15 Ijkuakó Jesús okitlajtlani:

—Siwatl, ¿tleka tichoka? ¿Akin tiktemoa?

María okimoli chamo non tlakatl ye non okimokuitlawiaya n werto, iwa okili:

—Tata, tla otikwik ikuerpo, techili kan otikkawato, iwa ne nikwikas.

16 Ijkuakó Jesús okili:

—¡María!

Ye omokoptíwetski iwa okili ika tlájtoli hebreo:

—¡Raboni! —non tlájtoli kijtosneki Tlamachti.

17 Jesús okili:

—¡Amo techtsakuili!, porke ayamó nitlejko íwa Notajtsi. Pero xio xikinmiliti nokniwah nitlejkos íwa Notajtsi, Akin noiwa Nomotata, íwa Nodios, akin noiwa Nomodios.

18 Ijkuakó María de Magdala okinmatiltito n momachtijkeh nik ye okitak Inteko, iwa Ye okinmili nochi ni.

Jesús kinmonextilia itlamachtijkawah

(Mt. 28:16-20; Mr. 16:14-18; Lc. 24:36-49)

19 Ijkuak otiotlatik, itlamachtijkawah n Jesús oololitokah iwa omokaltsakeh porke okinmawiliayah n judíojteh. Ijkuakó Jesús okalak iwa omoketsato tlatlajkotia iwa okinmili:

—¡Xikpiakah yolsewílistli!

20 Ijkuak ijkó okinmili, okimititi imawah iwa ikespa. Yejwah opakeh porke oksepa okitakeh Inteko. 21 Jesús oksepa okinmili:

—¡Xikpiakah yolsewílistli! Kemi Notajtsi onechtítlanki, ijkó Ne nomechtitlani.

22 Ijkuak ijkí okijto, okinmíjpitski iwa okinmili:

—Xikselikah n Espíritu Santo. 23 Akimeh nonkintlapojpolwiliskeh intlajtlakolwah, mokawaskeh chipawakeh. Pero akimeh amo nonkintlapojpolwiliskeh intlajtlakolwah, mokawaskeh itech tlajtlákoli.

Tomás kita n Jesús

24 Tomás, seme de n májtlaktli iwa ome itlamachtijkawah, non okiliayah kuatsi, amo ompa okatka iwan oksikimeh itlamachtijkawah ijkuak owala n Jesús. 25 Satepa, n oksikimeh imomachtijkawah okilijkeh n Tomás:

—Yotikitakeh n Toteko Jesús.

Pero Tomás okinmili:

—Tla amo nikimitas imawah iwa tla amo nikkalakis nomajpil kan okintsoponilijkeh n klavos, iwa nikkalakis noma ikespa, ayik nikneltokas.

26 Chikweyi tonati satepa, itlamachtijkawah oksepa okaltsaktokah, iwa Tomás noiwa ompa okatka. Maya n kaltentli otsaktoka, Jesús okalak iwa omóketski tlatlajkotia iwa okinmili:

—¡Xikpiakah yolsewílistli!

27 Otlanki okili n Tomás:

—Nika xiktlali momajpil, iwa xikinmita nomawah. Xikijkuani moma iwa xikkalaki kan nokespa. Iwa sansemi xitlaneltoka.

28 Ijkuakó Tomás okili:

—¡Noteko iwa Nodios!

29 Jesús okili:

—Tomás, otitlaneltokak porke otechitak. ¡Miak pakílistli kipiaskeh akimeh amo onechitakeh, iwa nechneltokaskeh!

Nin tlajkuíloli omoijkuilo para xitlaneltokakah

30 Jesús okinchi ok miaktikeh milagrojteh inmixpah itlamachtijkawah non amo ijkuilitokeh itech nin amatlajkuíloli. 31 Pero nin tlajkuíloli omoijkuilo para xikneltokakah Jesús Ye n Cristo Ikone Dios. Iwa tla nomejwah nonkineltokaskeh, nonkipiaskeh yolílistli ika Itoka.

<- San Juan 19 San Juan 21 ->