San Juan 18

Kikitskiah n Jesús

(Mt. 26:47-56; Mr. 14:43-50; Lc. 22:47-53)

1 Ijkuak Jesús otlanki okimijto ninteh tlájtolteh, okiski iwa itlamachtijkawah iwa oyajkeh ik nepa lado de n barranka de Cedrón. Ompa okatka se werto, Jesús iwa itlamachtijkawah ompa okalakeh. 2 Judas, akin kitemaktiskia n Jesús, noiwa okixmatia non lojar, porke Jesús iwa itlamachtijkawah miak welta ompa omoololoayah. 3 Ijkó kiné, Judas okinyakantiwalaya miakeh soldadojteh iwa sikimeh tlamokuitlawijkeh de n Weyi Tiopa. Ninteh okwalintitlankeh n tiopixkeh non tlayakantokeh iwa fariseos. Yejwah okwalinwikayah kuaujmeh non xotlatiwitseh iwa lintérnajteh iwa téposteh. 4 Jesús yokimatia nochi tlan mochiwaskia, yika okinyakanamikito iwa okinmili:

—¿Akin nonkitemoah?

5 Yejwah okinankilijkeh:

—Tiktemojtiwitseh n Jesús de Nazaret.

Ye okinmili:

—Ne Ni Jesús.

Noiwa ompa omoketoka n Judas non okitemaktijtoka n Jesús. 6 Ijkuak Jesús okinmili: “Ne Ni Jesús”, yejwah otsinkiskeh iwa oajketiajkeh owetsito ipan tlali. 7 Ijkuakó Jesús oksepa okintlajtlani:

—¿Akin nonkitemoah?

Yejwah okilijkeh:

—Tiktemoah n Jesús de Nazaret.

8 Jesús oksepa okinmili:

—Yonomechili Ne Ni Jesús. Tla Ne nonnechtemoah, xikinkawilikah mawiah ninteh.

9 Ijkó okijto para mamochiwa tlan Jesús okijtojka: “Akimeh Tejwatsi otechinmák, nion se omoixpolo.” 10 Ijkuakó Pedro okwalkópinki iespada iwa okitekili inakas non iyekma n Malco, itékitki n tiópixki non okachi otlayakantoka. 11 Jesús okili n Pedro:

—¡Xiktlaati moespada! Notajtsi kineki manikpano nin tlaijyowílistli, moneki ijkó manipano maya tekoko.

Kiwikah n Jesús inawak Anás n tiópixki non okachi otlayakantoka

(Mt. 26:57-58; Mr. 14:53-54; Lc. 22:54)

12 Ijkuakó n kapita, iwa isoldadojwah, iwa n soldádojteh non kimokuitlawiah n Weyi Tiopa, okikitskijkeh n Jesús, okimailpijkeh iwa okiwikakeh. 13 Achto okiwikakeh inawak Anás porke okatka imonta n Caifás. Nin Caifás okatka weyi tiópixki non xiwitl. 14 Nin Caifás yokintlatlalwijka non de Sanedrín[a] okachi kuali mamiki sanwel se tlakatl, iwa amo nochteh n judíojteh. Jn. 11:49-51

Pedro kijtoa amo kixmati n Jesús

(Mt. 26:69-70; Mr. 14:66-68; Lc. 22:55-57)

15 Simón Pedro iwa n ok se imomachti san wejka okwaltokayah n Jesús. Non ok se imomachti omoixmatia iwa n weyi tiópixki Anás, yika ye okalak kan okiwikakeh n Jesús. 16 Pero n Pedro omoka san kaltempa. Yika, non ok se imomachti non omixmatia iwan weyi tiópixki, omotlapowi iwan siwatl non okimokuitlawiaya n kaltentli iwa okili makikalaki n Pedro. 17 Ijkuakó n siwatl okitlajtlani n Pedro:

—¿Amo te noiwa imomachti non tlakatl?

Pedro okinankili:

—Amó, mach ne.

18 N tlakewalteh iwa n tlamokuitlawijkeh okitlalijkeh se tlékuili porke osewaya, iwa omototonijtokah. Pedro noiwa omijkuani inakastla n tlékuili.

Anás kitlatsintokia Jesús

(Mt. 26:59-66; Mr. 14:55-64; Lc. 22:66-71)

19 N weyi tiópixki Anás, opé kitlatsintokia Jesús akimeh itlamachtijkawah iwa tlan okinmachtiaya. 20 Jesús okinankili:

—Ne onikintlapowiaya inmixpa nochteh n tlakah. Ne ixmostla onitemachtiaya itech sinagogas iwa kan toweyi Tiopa kan moololoah nochteh n judíojteh, iwa amitla san ichtaka oniktemachti. 21 ¿Tleka Ne techtlatlajtlania? Xikintlajtlani akimeh onechkakeh, iwa yejwah mamitsilikah tlan onikinmiliaya. Yejwah kuali kimatokeh tlan onikijto.

22 Ijkuak Jesús ijkí okijto, se non kimokuitlawia de n Weyi Tiopa, okiixtlatsini iwa okili:

—¿Ijkó tiknankilia n weyi tiópixki?

23 Jesús okinankili:

—Tla onikijto itla amokuali, techili. Pero tla onikijto tlan milák, ¿tleka techixtlatsinia?

24 Ijkuakó Anás okitítlanki n Jesús maijilpiti inawak Caifás n weyi tiópixki.

Pedro ome welta kijtoa amo kixmati n Jesús

(Mt. 26:71-75; Mr. 14:69-72; Lc. 22:58-62)

25 Pedro ok omoketoka inakastla n tlékuili iwa ompa okitlajtlanijkeh:

—¿Amo te noiwa se de itlamachtijkawah?

Pedro mach okimokuiti, iwa okijto:

—Amó, mach ne.

26 Ijkuakó se itlákau n weyi tiópixki non ken okitaya n tlakéwale akin Pedro okinakastsontek, okitlajtlani:

—¿Amo te noiwa onimitsitak iwan Ye, kan werto?

27 Pedro oksepa okijto amo kixmati, iwa san nima se kaxtil otlakuík.

Jesús inawak Pilato

(Mt. 27:1-2, 11-14; Mr. 15:1-5; Lc. 23:1-5)

28 Ijkuakó okiskeh icha n Caifás iwa okiwikakeh n Jesús ichan Poncio Pilato. Iwa ken yotlanestiwalaya n judíojteh amo okalakeh icha n Pilato para amo moyolijtlakoskeh. Yejwah okinekiah yetoskeh yolchipawakeh ijkuak kikuaskeh n tlákuali de Paskua. 29 Ijkuakó Pilato owálkiski, iwa okinmili:

—¿Tleka nonkiteiliah nin tlakatl?

30 Yejwah okinankilijkeh:

—Tla nin tlakatl amo kichijtinemiskia tlan amokuali, mach timitsmaktiliskiah.

31 Ijkuakó Pilato okinmili:

—Xikwikakah iwa nomejwah xiktlajtlakoltikah kemi kijtoa nomotlanawatil.

N tlayakankeh judíojteh okilijkeh:

—Nomotlanawatilis amo techkawilia aka matikmiktikah.

32 Ijkó otlamochi kemi Jesús okijtojka kenomi mikiskia. Jn. 3:14, 12:32 33 Pilato oksepa okalak kan palasio. Okínotski n Jesús iwa okitlajtlani:

—¿Te tirey de judíojteh?

34 Jesús okinankili:

—¿Tlan techtlajtlania, motech kisa, noso san por oksikimeh omitstlapowijkeh de Ne?

35 Pilato okinankili:

—¡Ne mach ni judío! Innewiah mokniwah iwa n tiopixkeh non tlayakantokeh nomak omitstemaktijkeh. ¿Tlan otikchi?

36 Ijkuakó Jesús okinankili:

—Notekiwajyo amo kajki itech nin tlaltíkpaktli. Porke tla ijkó yetoskia, notlakawah motekilmakaskiah para amo manechtemaktikah inmak n judíojteh. Pero Ne amo nitlanawatia nika.

37 Ijkuakó Pilato okili:

—Tla ijkó, ¿te tirey?

Jesús okinankili:

—Ne Ni Rey ijkó kemi te yotikijto. Ne onitlákatki para nietos Ni Rey iwa oniwala itech nin tlaltíkpaktli para niktematiltis tlan milák. Nochteh akimeh kixmatih iwa kijtoah tlan milák, weleti kikakih notlajtol.

38 Pilato okitlajtlani:

—¿Tlan kijtosneki milák?

Kitemaktiah Jesús para kimiktiskeh

(Mt. 27:15-31; Mr. 15:6-20; Lc. 23:13-25)

Ijkuak Pilato ijkó okitlajtlani n Jesús, oksepa okiski okintlapowito n judíojteh, iwa okinmili:

—Ne amo nikkajsi nion se tlajtlákoli itech nin tlakatl. 39 Pero nomejwah ya nonkimatokeh trato nikkajkawa seme de nontsaktokeh itech ilwitl de Paskua. ¿Nonkinekih manikkajkawa n Rey de Israel?

40 Ijkuakó, nochteh otsajtsikeh:

—¡Ye amó! ¡Xikkajkawa n Barrabás!

Nin Barrabás okatka tlachtek iwa okimpajsoloaya n tlakah.

<- San Juan 17 San Juan 19 ->