1 Edo asisi ewamei 7 aga 7 jigido atisera ainda teda da mi naso yei bugudo sisira, “Puio nanemi inia ge mi nati nembogamo umo jiwae da be da didigurisera ainda riroga kumbadera awa isaga ano gase. Edo nanemi nati eiawa da jawo da ge sadena awa teta evetu wasiri bebegae edo ira ainda ge sarago adena. 2 Edo busu berari da embobo da gitijijigegari nembogamo iji berari wasiri bebegae edo era edo evetu wasiri biae edo ira ainde da. Edo busu berari da embobo iji berari uso wasiri biae da wine okain awa indido edo iji berari ungo jiro bebegae edo ira.”

3 Edo umo awodo sedo Asisi Kotopu naso joda goroba edo gitijijigurise edo asisi ewamei mi na kumbudo yei embo atae da mambusira. Edo umo na kumbudo mambiri edo evetu wo kokoi da tamo da anumbedo atiri gosisena. Edo wo ainda tamo da awa jawo bebegae neinde kainde mi isibari ge bebegae God da jawo da sisera awawa gaisera atisira. Edo wo ainda kopiri awa 7 edo uso kopiri da gi awa 10 awodo. 4 Edo evetu awa bo kokoi de karako de awa ombusira edo giro sagiro neinde kainde edo giro sagiro gold mi ari edo ganuma ewagaewa mi ari bogera mi ari awa uso kopiri da ra. Edo uso giro sagiro da mina awa nembodiba be ra. Edo evetu awa uso ingo da aga ribe bebetegari da masa da awodo uso wasiri bebegae mi beda ari jigido atisira. 5 Edo uso beo da awa jawo uso be unjugari awa eiedo jiwari ra,

Edo na evetu awa ditini ise kove be isena. 7 Edo asisi ewamei mi na nganega edo sisira, “Imo roedo kove be esi? Nanemi evetu einda inia ge da be de edo wo kopiri 7 de gi 10 de evetu eiawa budo tembira ainda be awa iso yei isaga adena. 8 Edo wo nembodiba ewa tuda edo vivitisira awa getesa awa matu awa wasiri de atisira te betedo uro umenga da tu be tuda wowosisira. Edo wosedo awa boroko sekago bugadi aikambu ira. Edo vitari ungo mi usibesi adera. Edo busu da embobo ungoda jawo God busu ae atise wasiri natopo atari da jiwari kato da ungoda jawo gaiae awa ungo wo nembodiba awa gido kove be adera ainda be awa wo awa matu awa wasiri de atisira te betedo edo sekago wasiri de bugadira awasedo.

9 “Edo embo jiro embobo mi ge einda be awa gadera. Edo kopiri 7 awa doriri 7 evetu mi anumbedo atira awa ra. Edo kopiri 7 awa daedo gitijijigegari embobo nembogamo 7 awa ra. 10 Edo gitijijigegari nembogamo 5 awa matu bugudo atae isera. Edo gitijigari nembodiba da awa boroko wasiri de atise gitijijigurira edo gitijigari nei awa amboda bugadira. Edo umo bugudo iji tupo be atadira. 11 Edo wo nembodiba matu wasiri de atisira te bebetisira awa gitijijigegari embobo nembogamo 7 ainde da dada ari ungoda ajigari awa 8 adira. Edo wo nembodiba awodo adira awarate uso yei da usibesi ari bugadira.

12 “Edo wo nembodiba da gi 10 getesa amone gitijijigegari embobo nembogamo 10 bugudo gitijigadi tuturo ae atera awa ra te amboda ungo wo nembodiba de daedo iji tupo be gitijigadera. 13 Edo gitijijigegari embobo nembogamo 10 awa kotari da awodo edo ungoda gitijigari da goroba awa wo nembodiba da yei itadera. 14 Edo ungo mi Lamb ga da embogo adera te Lamb awa embomei unemi matu jawo setiri uso saboa ari ambojimbi isera ainde da gitijijigegari embobo nembogamo de wo nembodiba de awa derigadera ainda be awa Lamb awa busu berari da gitijijigegari embobo berari da gitijigari edo umo awa babojegari berari busu da ainda bajari ra awasedo.”

15 Edo asisi ewamei awa sedo ge nei naso yei sisira, “Imo wasiri biae be ari evetu sasaka jiwae da be da anumbedo atiri getesa edo sasaka amone busu berari da embobo da ungoda tamo gari neinde kainde edo ungoda ge neinde kainde ra. 16 Edo kopiri da gi 10 getesa edo wo nembodiba getesa awa ungo wasiri biae ari evetu awa ujo ae edo uso rora berari de uso ombari digari berari awa dodo kumboro iji ainde men nembodiba gadira. Edo ungo uso rora berari kumbudo uso tamo pisi indido edo riawo da itoro ewadira. 17 Ainda be awa God mi ro adira awa ungoda jiro da ititisira awa ungo mi umo ro arase dipapa ira awa oro adira. Edo ungo kotari da awodo edo ungoda gitijigari goroba awa wo da yei itadera. Edo ungo awodo adera awa ro God mi sisira awa adira.

18 “Edo evetu getesa awa nati nembodiba be ra amimi busu berari da gitijijigegari nembogamo gitijigido ira.”

<- REVELATION 16REVELATION 18 ->