Binga Ewamei Awa John Mi Gaisira

1 Rora berari ae tuturo da Iesu Keriso uso jawo nei God da ge atinatina. Umo God de daedo atinatina. Edo umo umosuka awa God. 2 Edo be tuturo da awa umo God ga atinatina.

3 Edo God umo awodo rora berari awa isira. Edo rora berari boroko atira awa unemi isira. 4 Edo Iesu Keriso wasiri be awa budo atima ira. Edo uso wasiri mi embo da yei usasa itido ira. 5 Uso wasiri awa umenga da janibedo ira awa usasa ra. Edo usasa awa mata janiburise atima ira ko umenga mi mana ari ambadira.

6-7 God uso binga sari embo John itiri embo da yei usasa awa sari gorase bugusira. God umo embo berari mi binga awa ingido ge be orase sedo John itiri bugusira. 8 John umo umosuka awa usasa awa aera. Umo embo da yei usasa awa sari gorase bugusira. 9 Amboda embo usasa be awa bugudo busu berari da embobo da yei janiburisira.

10 Edo Iesu Keriso bugudo busu da embo da teda atisira. Unemi busu isira edo busu da rora berari de embo de isira te embo umo embo averi awa gaera. 11 Umo uso busu topo da bugusira te uso embo topo umo ujo ae isera. 12 Awarate embo gebe edo umo budo isera ainda bajari ari itiri edo God da kinapeina edo isera. 13 Iji ainde ungoda aimono mi ungo ingedo isera edo ungo God da kinapeina ae edo isera. Daedo ungoda ai de mamo de mi ungo oro God da kinapeina orase ae edo isera. Awarate God da goroba mi ungo God da kinapeina isera.

14 Edo Iesu Keriso uso jawo nei God da ge embo edo ingodenaso teda atisira. Edo dubo bari de kotembedo doari de gebe de mi uso jo ato ae isira. Edo ingodena uso wasiri da usasa God mi ititisira awa gosisera. Edo God usasa awa uso yei ititisera ainda be awa umo awa uso mei awo da awasedo.

15 Edo John Iesu Keriso da jawo da ge sisira edo minonu sisira, “Matu na ingoda seteno gosisewa embo nei bugadira. Edo uso wasiri mi naso wasiri derigurira ainde be awa naso aia na kumbae atiri umo atima isira seteno gosisewa Embo amone awa ra.” 16 Edo Iesu Keriso dubo bari kotembedo doari de gebe be mi ingodena berari ewamei etira. Unemi ewamei ari jiwae tamo da tamo da itido ira. 17 Edo God uso agodari ingodenaso yei itari dipapa edo Moses ititisira te umo ingodenaso yei dubo bari de kotembedo doari de gebe de itari dipapa edo Iesu Keriso ititisira. 18 Edo embo da amemi God gaera awarate uso mei awo da amimi uso Mamo ga atima ira amimi umo ingodenaso yei karigedo ira.

19 Jew embobo da gitijijigegari Jerusalem nati da atisera amimi priest embobo de priest da kondade ari embobo de awa John da yei umo umo buro ro edo iri awa nganega adi mambusera.

20 Edo ungo John nganega isera edo umo gebe awa unjugae rate sisira, “Na awa soregari embo God mi itari bugarase sisira awa aera.”

21 Setiri ungoi nganega isera, “Imo mo binga sari embo matu atisira Elijah ta?”

Setero umo mina sisira, “Na embo awa aera.”

Setiri ungoi nganega isera, “Imo mo God da binga sari embo nango simba ewora awa ta?”

Setero mina sisira, “Awa aera.”

22 Setiri ungoi sisera, “Imo mo averi awa se gore. Edo embo amemi nango itero bugera awa gadi dipapa era awasedo iso mina sari awa se gore.”

23 Setero John mi ro God da binga sari embo Isaiah mi sisira awa ungo da yei sisira, “Na awa dumbari yei da embo atise minonu sadira, ‘Bada da bugari emboro sia ewo. Edo uso emboro ewo dambuderari are.’ ”

24-25 Setiri edo embo Pharisee embomei itero bugusera amimi John da yei ngnega isira, “Edo imo soregari embo God mi itari bugarase sisira awa ae edo Elijah ta ko binga sari embobo nango simba ewora awa ae mo ro edo imo umo mi embo ewamei edo esi?”

26 Setero John mi mina sisira, “Na embo umo mi ewamei edo ena. Edo embo nei bugudo ingoda teda atira te ingo umo gaera. 27 Edo iji tupo atae ari umo uso buro ingoda teda tuturo adira. Umo awa embo nembodiba ra te na awa embo nembodiba aera. Edo na awa ewa raro uso tei goru simba eni?”

28 Eiawa berari Bethany nati da wosedo yari umo Jordan umo be nei da isira. Edo umo ainda John umo umo mi embo ewamei edo isira.

29 Iji nei John Iesu uso yei bugutiri gido sisira, “Embo oiawa giwo. Umo teta wo sheep da mei mi busu berari da embobo da wasiri biae awasedo betarago adira umone God da mei ra. 30 Matu na ingoda yei siutana, ‘Embo nei amboda bugadira. Uso wasiri mi naso wasiri awa derigari ra ainda be awa naso ai na bae atiri umo atima isira.’ Embo amone eire. 31 Edo na umo embo averi awa na gaera te na embo umo mi ewamei ise Israel embobo da umo isaga adi bugusena.”

32 Edo John embo da yei umo ro gosisira awa sisira, “Na Asisi Kotopu teta ribo inge utu dodo wosedo Iesu da yei anumbetiri gosisena. 33 Edona umo gaera te God na umo mi embo ewamei anase itiri bugusena amimi naso yei sisira, ‘Imo Asisi Kotopu mi embo da da yei petari gadesa embo re amimi embo Asisi Kotopu mi ewamei adira gio.’ 34 Edo na rora berari awa etiri gido, gido ingoda yei sena embo amone God da mei na.

35 Iji nei John uso ambojimbi etoto de sekago yei ainda bugusira. 36 Edo John Iesu bugutiri gido sisira, “Emone God da mei teta wo sheep da mei mi betarago adira.”

37 Edo John da ambojimbi etoto ge awa siri ingido Iesu ambo ambo isera. 38 Edo ungo umo ambo ambo ero Iesu wareregedo ungo gido ungoda yei nganega isira, “Ingo ro dipapa evi?”

Setiri ungomi mina sisera, “Rabbi ainda be awa atopatari imo nonda atima esi?”

39 Setero mina sisira, “Puwo gave.”

Awasedo ungo daga mambudo umo rawainda atima isiri awa gido ungo ainda ungae atisera ainda be awa ongobo etiri gido.

40 Edo John da ge ingido Iesu ambo ambo isera ainda embo nei awa Andrew, Simon Peter da namendi. 41 Umo mambudo uso namendi Simon tambudo sisira, “Nango Iesu Keriso Soregari Embo God mi itari bugarase sisira awa tambera.” 42 Sedo Simeon budo Iesu da yei bugusira.

Edo Iesu umo ditini ise sisira, “Imo awa Simon, John da mei ra te iso jawo awa seka Peter sadera ainda be awa ganuma.”

43 Sipo nei Iesu Galilee busu da mambadi sedo erido Philip tambudo sisira, “Na ambo ambo eio.”

44 Edo Philip awa Bethsaida nati embo ra. Edo Andrew de Peter de awa daedo nati ainda atima isera. 45 Edo Philip Nathanael tambudo uso yei sisira, “Nango embo Moses mi agodari da gaisira edo binga sari embobo daedo gaisera embo awa tambera. Umone Iesu ra Joseph da mei na Nazareth nati embo ra.”

46 Setiri Nathanael mi nganega isira, “Ingode Nazareth nati da rora ewamei nei tamberi ta?”

Setiri Philip mi mina sisira, “Puio gase.”

47 Edo Iesu Nathanael gido uso yei bugutiri uso jawo da sisira, “Emone Israel embobo da embo moka ra. Umo embo biae aera.”

48 Setiri Nathanael mi uso yei nganega isira, “Imo na rawodo na gari ri?”

Setiri Iesu mi mina sisira, “Philip mi imo jawo sae atiri giti da na imo betora utumo da anumbedo ateso jiro mi buro edo getena.”

49 Setiri Nathanael mi sisira, “Atopatari imo awa God da mei na edo imo awa Israel embobo da gitijigari nembodiba ra.”

50 Setiri Iesu mi sisira, “Na boroko iso yei setena imo betora utumo da ateso getena awa setena. Awasedo imo na gebe esi ta? Amboda wasiri eiawa derigedo nenei irirari gadesa. 51 Na iso yei gebe sena utu pirigari God da asisi ewagaewa na God da mei embo isena ainda yei vitido wowosiroro gadesa.”

JOHN 2 ->