15
Ora yametaiga joríojegui.
(Mr 7.1-13)
1 Aique iátasitaiguëri Ira Jesos bariseopague aisati ira ogomeantiro isanguenare Moisés. Ipaniaigaca Jerosarénquë. Yosamitaigapëri:
2 —Eiroegui jorío. Ametaiga queroquerai api, anguibocoquima. Iroro yogometaigái omatsiguenga jirai. ¿Pairo te ingantobitaigue negaca pogomerejegui? Yapasitaiga te inguibocotima. Yoguimingataca iriati.
3 Yotabitaiguëri Jesos:
—Tojai pomoncaratasitaigaro ora icantasitagueta omatsiguenga jirai, iroro te pinguemisantaguëtiro ora yogometaiguëmi Tosorintsi. ¿Pairo picantobitaiga obirojegui negaca? 4 Icanque Tosorintsi:
Pinguemisantiri piri aisati piniro.
Aisati icanque:
Ingameta ira cantëgotaguetasitari iriri aisati iniro.
5 Carari obirojegui, pogometaiguëri pomatsiguenga: “Pingantiri ira casintimi: ‘Quero nomitocotimi. Nomëmime quirequi, nangantaneintëgotëmime carari aroque nacanqueri Tosorintsi nomëri Iriro naguireguite’ ”. 6 Pogometaiguë quero picábintsairi piri. Cara picanque negaca, te pogometiri Irinibare Tosorintsi, teatisati pinguemisantiro. 7 Picantasitaigabita piquemisantasitabeta. Aisonori icomantëgotaiguëmi ira comantantatsiri Isaías cara isanguenaque jirai:
8 Icanque Tosorintsi: “Ica matsiguengaca inibatasitëgotina ora caninaro, carari te inguenganeintina. 9 Yamanocotasitina cara yapatotasitaiga; iroonti yogometa irinibare matsiguenga”.
Ora aguimingasëretiri matsiguenga.
(Mr 7.14-23)
10 Aique Jesos icaimaiguëri ira botoibiritaigari, icantaiguëri:
—“Pinguemina, pigóiguero oca nocomantaiguëmica: 11 ora apaiguë, te oguimingatiro asëre. Iroonti ora inibatasitagueta iroro aguimingasëretacái cara aquianquero quimingaro.
12 Aique iátasiqueri Jesos irogomere, icomantaigapëri:
—¿Teco pigóte iguisaneintobitaiguëmiro bariseoegui ora picanqueri?
13 Yotabitaiganaqueri Jesos:
—Iriro icantaigaro pibega panguirintsi. Aiquenta irisiabonguitiquëro Pabati jonoquënintaberi antagaisati ora te imanguitiro Iriro. 14 Aro irinaigueta bariseoegui, te irogóigue; aisati icancari sërari comarajari ingatsatobaganëmaca ira basini comarajari. Pitirooti imarigaiganaque omoroquë.
15 Icanqueri Jesos Peroro:
—Teni nanguemimi; pingomantina ora ocanti oca picanquinaca.
16 Icanqueri Jesos:
—¿Teraiquerai pigóte? 17 ¿Teco pigóte pairoraca opë ojáque asegotoquë aique agabisairo? Te ongantiro pairoraca asërequë. 18 Cara pinibati pairoraca piquengasëreti; queroca piquenga caninasati, quero picaninasëreti, pinibati ora te onganinate. 19 Ora piquenga opaniaca paneingomentoquë: cara piquenganeintaguetiro te ongomeite, cara póganti, cara pintaguetiro tsinane cagaro pijina, aisa cara tsinane ontaguetiri sërari cagari ojime, cara picositanti, cara pitsoiguëgotantagueta, cara picantocotaguetasitari pomatsiguenga, omagaro oca paniacha paneingomentoquë. 20 Omagaro oca aguimingasëretimi. Iroro te pinganinataguëtaigue, carari aroca popë queroquerai piquibocota querootisati poguimingasëretimi.
Oquemisanqueri Jesos tsinane Cananasato cagaro jorío.
(Mr 7.24-30)
21 Aique iáiguë Jesos aisati irogomerejegui cara Tiroquë aisati Sirónquë. 22 Piátasiqueri Cananasato, cagaro jorío. Ocampëri:
—Natingomi, Obiro imatsiguenga David itingomi jorío jirai. Nocoguini pingábintsena naro aisati nasinto. Inancaro camagari, yogatsitasantëro.
23 Carari te irotopitiro, imairetanë. Aro icantaiguëri irogomere:
—Pingantiro ojátaje, tojainta poguiatacái paserigacái.
24 Icanquero tsinane Jesos:
—Igáquina Pabati nangábintsaigueri joríojegui. Icantaigari ibega oisha ibiaga.
25 Aro pobaticagueritobiripari, ocanqueri:
—¡Natingomi, pomitocotina!
26 Yotabitobëro Jesos:
—Te onganinate irágopitiri janequi iraperi imaigueri otsiti. Cagarimi obiro jorío. ¿Pairo nomitocobiriquimi?
27 Potabitanëri:
—Aisonori, Natingomi, ora picanque, carari yapiro otsiti opetoqui ora pariaguetatsi imesanequë casintari.
28 Aique icanquero:
—Tsinane, caninataque piquemisanquina. Yamai aroque nopabaquemiro ora pamanocoquina.
Irooti pabisaicoontanaa osinto.
Jesos yogaguibegajiri tojai janaitaguetatsiri aronisati angaarequë.
29 Aro yogagaiganaca Jesos aisati irogomerejegui irooti onamijaquë angaare jitacha Garirea. Aique itongaiganaque, isobicaigapë. 30 Ipocasitaigapëri tojai matsiguenga, yágaiganaquineri tojai janaitaguetatsiri: ainta carancaratatsi, ainta comarajari, ainta ira patebocotatsi, ainta ira te irinibate, aisati tojai basini. Yobaticagueritotaguëpari. Aro Jesos yogaguibegajiri omagaro. 31 Aro iquenganeintasantaigacari matsiguengajegui ira niaiguëri Ira Jesos cara inibatagajiri ira te irinibate, yosebatagaari ira emëngari, yanëitagairi carancaratatsiri, iniacagajiri comarajari. Icantaiguë matsiguenga:
—Caninari Tosorintsi, Ira iquemisantaiguë joríojegui.
Yogatsitairo Jesos itasonguëro pan, yomitojaiganaquero.
(Mr 8.1-9)
32 Aique icaimaiguëri irogomere Jesos, icantaiguëri:
—Tojai nacantaneintëgotaiguëri antagaisati ira botoibiritaiguëna. Ocarati maba cataguiteri itsibataiguëna, yamai te inae iraperi. Itasegasantaiguë. Yamai aroca nagátaigairi iriáigae, iromagotasantanë queronta yapi, quero yaretaiga ibangopaguequë.
33 Yotabitaiganaqueri irogomere:
—Pinetse, yaca teca ontimingani. ¿Nega nágaiguëneri pan ora irapaiguë? Tojaisonorinta matsiguenga.
34 Yosamitëri Jesos:
—¿Ati ocarati pan inatsi?
Yotabitanëri irogomere:
—Ocarati 7, aisati ainta arosataanti sibai.
35 Aro icantaiguëri matsiguenga Jesos:
—Pisobicaigue quibatsiquë.
36 Aro yáguëro pan aisati sibai, icanqueri Iriri:
—Aro nega, Pabati, nacarasiaquemi popabaquinaro oca perintsica.
Aique itibatsaaguequero, yotsatengaiguëri irogomerejegui arota cara irotsatianquimaro ira botoitaigacha. 37 Yapaiguë antagaisati, iquemaigaca. Aique yobiitaguetajiro ongarataga, iagajiro cantiri oquibe ocarati 7. 38 Yapaiguë tojai sërari icarati 4,000. Aisati papaiguë tojai tsinane aisati janequi. 39 Aique igátaiganaqueri Jesos, icanqueri:
—Yamai pijáigae pobangopaguequë.
Aique yotetaiganaja Jesos aisati irogomere pitotsiquë, imontiaiganaca irooti Magararaquë.
<- Mateo 14Mateo 16 ->