Link to home pageLanguagesLink to all Bible versions on this site
22
Iquengaigaca saseriroti cara Joras irácagantëri Jesos.
(Mt 26.1-5, 14-16; Mr 14.1-2, 10-11; Jn 11.45-53)

1 Pënibaque orequima cataguiteripague jitacha Pásicoa cara yapaiguiro joríojegui ora pan te ine piponganta, aisati iquengaigaca cara isotocaiguë Ejípitoquë jiraisonori. 2 Icogaigabitaca iróguirime Jesos itingomipague saserirotijegui aisati iraegui ogomeantiro Sanguenari, icantobaca:

—¿Ati anganqueri ágagantiri Jesos agamagaiguëri? Intsome angantiro comanoroni querota iguisaigái matsiguenga iniacaninatërinta Jesos.

3 Aique ira Satanás camagari iátasiqueri Joras Cariotisati, ira yogometabeca Jesos; yagobiopëri yogomequeri irácagantëri Itingomi Ira Jesos. 4 Aro Joras iátasiqueri itingomipague saseriroti, icampëri:

—Nomitocoquemi págaiguëri Jesos.

5 Icaninatasantaiguë, icantaigabaqueri:

—Aro, caninataque. Aroca águëri, aro nomaiguëmiri quirequi.

6 Iquengaigaca. Aro icanque Joras:

—Aro. Nanetsëri; aique nongomantaiguëmi ati ongantima págagantëri comanoroni. Quero iniaiguimi matsiguenga.
Yobetsiquineri Jesos cara icarantacaro yapë.
(Mt 26.17-19; Mr 14.12-16)

7 Pareca Pásicoa cara yametaiga joríojegui yóguëri oisha aisati icantaigari ibega jorío jiraisonori Ejípitoquë. 8 Aro Jesos igátaiguëri Peroro aisati Joan, icanqueri:

—Pijáigue, pobetsicaiguero cara opaiguë Pásicoaquë.

9 Yosamitaiguëri pitirooti:

—¿Nega pininti nobetsiquëmiro?

10 Icantaiguëri Iriro:

—Cara pirequima Jerosarénquë, piniopëri sërari yáigotëro nija. Piguiatiri irooti pongotsiquë cara inganaque. 11 Aro pingantaiguëri casintaro pongotsi: “Icanque Ogometinari: ‘¿Nega pini cara nopaiguë Pásicoaquë, Naro aisati nogomerejegui?’ ” 12 Ironijagaiguëmiro oquibe coarito jonoquë; aito pobetsiquëro perintsi asi Pásicoa.

13 Aique iáiguë, iniaigapëri sërari aisati omagaro aisa ocanta icantaiguëri Jesos. Yobetsicaiguëro Pásicoa.

Yogomeantë Jesos cara irapapinintobiqueri quemisantatsiri aisati irógobitaiguëmari.
(Mt 26.20-29; Mr 14.17-25; Jn 13.18-30; 1 Co 11.23-26)

14 Aique cara ochapinitanë yaretaigapa Jesos aisati irogomere, isobicaigapë mesaquë yapaigapë. Icanqueri:

15 —Tojai nocoque nopaaganaimi oca Pásicoa cara queroquerai nacami 16 nangantaiguëminta cara quero napairo aisati irooti cara omoncaraquima omagaro isanguenatocotaiguëna cara intingomibintanque Tosorintsi iragáantanequë.

17 Aro yáguëro ógomentotsi, icarasiaqueri Iriri, icantaiguëri:

—Jeroca, pógaiguemaro obirojegui 18 nanganqueminta cara quero nógaaro obaa aisati irooti cara iragáantanequë Tosorintsi.

19 Aique yáguëro pan, icarasiaqueri Tosorintsi, itibatsaaguequero, yotsatengaiguëri irogomerejegui. Icantaiguëri:

—Jeroca pan osigaro nobatsa. Popaiguero. ¿Teco nangamobitaiguemi? Nocogui cara popapinintaiguëro pan pinguengasëretapinintaiguëna cara nacamobiquemi.

20 Aro yapaiguëro. Aisa yáguëro ora yóganta obaa, icanque:

—Jeroca obaa, pógaiguemaro. Iroro osigaro naraa ora naraatobitanëneri omagaro matsiguenga cara nangamobitaiguëri. Yamai naraa ocanti irorai Nibarintsi; iroro ingábintsantaiguëmari Tosorintsi cara icanque jirai. Cara irabentaiguëna matsiguenga inguemisanquina, Tosorintsi irojocajineri ora icantagueti te onganinate, quero iquengaineri aisati. Cara pógapinintaiguëmaro obaa pinguengasëretaiguena cara nacamobitaiguëmi arota iragabisaicotajimi Tosorintsi. 21 Yamai ainta yaca yapëgotëna ira ágagantënane. 22 Nopaniaca Naro Jonogaguitequë, nomatsiguengatapë yaca quibatsica. Omoncaraca omagaro isanguenatocoquina jirai Sanguenariquë. Irari atsipiriasantërone ira ágagantënane.

23 Aro iparintaigaca irogomere Jesos yosaminatobaca iriatiegui:

—¿Pairiraca ágagantërine?
Icomantë Jesos pairi obaquenguitsine.
(Mt 18.1-7; 20.25-28; Mr 9.33-37; 10.42-45; Ir 9.46-48)

24 Aique icantobaganaca irogomere Jesos pairiraca obaquenguitsine irirojeguiquë. 25 Icantaiguëri Jesos:

—Pigóiguë cara yametaiga basiniati matsiguenga ira cagari jório itingomintaigacari itingomipague, iriro cantënguicha itingomi merataigari imatsiguenga. Icantasitaigaca: “Nomitocoiguëri natiriteegui”. 26 Carari quero aisati picantaigari ibegaiga iriro. Pinintica piguibatima obiati, quero piquenga obiati caninari pabisiri basini. Pomitocoigueri pomatsiguenga, pingábintsaguetaigueri, quero pimeratari. 27 ¿Pairi obatatsi, iraco sobigatsi mesaquë, iraco mapënerine iraperi? Pigóiguë ibaque ira sobigatsi mesaquë, yapi, imeratari iromeraro ira mapënerine iraperi. Carari te nomerataiguemi Naro, Naanti cantaca pomeraro. 28 Coshoni pogaiguëna jirai, pitsibataiguëna cara yobomirintsitapinincái omatsiguenga; 29 aiquenta nomaiguëmi pintingomibintante aisati nacanta aroque ipëna Pabati cara natingomibintanque. 30 Pintsibataiguëna, popëgotaiguëna aisati pógaiguëma canta nantingomibintanque, aisati antingomibintaiguëri omagaro jorío imatsiguenga itomi Jacob icarati 12.
Jesos icomantëri Peroro: “Yamaica tsitinirica mabataque pinganque: ‘Teni nogótiri Jesos’ ”.
(Mt 26.30-33; Mr 14.26-31; Jn 13.36-38)

31 Aique icanque Atingomi:

—Simón, Simón, icogui Satanás iraniantëmi aisonorica piquemisanquina. Icogui irantacaquemi ora te onganinate. 32 Carari namanocoquemi iromitocotimi Tosorintsi irosintsisërequimi querota pijoquiro cara piquemisanti. Aiquenta, cara pijocajiro ora picantagueti te onganinate, piganinasëretaguetiri popiguemisantane, pomitocotaguetiri, pinguemisantasantacaguiri.

33 Icanqueri Peroro (Simón):

—Natingomi, naguiatëmi përosati. Aroca iromingaiguina, irógaiguinaca aisati, quero nojocanëmi naro.

34 Icomantëri Jesos:

—Nanganquemi, Peroro: yamaica tsitinirica queroquerai icaimi tiapa sërari, ongaraque maba pinganque: “Teni nogótiri Ira Jesos”.
Omoncaraquima omagaro ora isanguenatocoquengani Jesos.
(Ir 9.1-6)

35 Aisati icantaiguëri irogomere Jesos:

—Jirai nigátaiguëmi piáiguë piquenguitsatomotagueiguëri matsiguengajegui, nacanquemi: “Quero páganëro pitsaguine, querootisati poperi, querootisati basini pisapatote”. Yamaica nosamitëmi: ¿Pitsipiriaiguë? ¿Aiti coguitiomoquemi?
Yotabitaiguëri irogomere:
—Tesonori.

36 Aro icanqueri Jesos:

—Carari yamai nangantaiguëmi: aitica pitsaguine, páganëro, aisati aitica pomotsirate páganëro. Piguireguite aisati. Teca ine pisabirite, pomimantiro basini piguitsagare pomanante patiro sabiri. 37 Nangantaiguëmi cara omoncaraquima ora isanguenatocoquina jirai Isaías:
Itsibatacari ira cantaguetiro ora te onganinate.
Aisonori, omagaro isanguenatocotaguequina omoncaraquima.

38 Aique icantaigapëri:

—Natingomi, pinetse. Jeroca pite sabiri.
Icanque Jesos:
—Aroque, antagati, moncaraca.
Cara Jetsemaníquë Jesos yamanaqueri Iriri.
(Mt 26.36-46; Mr 14.32-42)

39 Aique, cara yameta Jesos, iáque oguitojaquë jitacha Olibos. Yoguiataiguëri irogomerejegui. 40 Cara yaretaigapaa, icantaiguëri:

—Pingaguitaigue, pomaniri Tosorintsi cara iromitocoiguemi quero picantaguetiro ora te ongomeite.

41 Aique yogaganaca arosata caraquerora, yobaticagueritotasipa, yamanocopëri Iriri:

42 —Pabati, teni naninte natsipirie, carari quero nacantiro ora nocogabeca Naro, iroonti nanganquero ora picocaquena Obiro.

43 Aique ipocasipëri ironomire Tosorintsi imitocopëri yosintsitëri. 44 Tojai yogasëretasanotaca, itsipiriasëretasantaca, aisati yamanocotasantëri Iriri. Tojai imasobique, opariaatë imasobire quibatsiquë cantaca iraraa. 45 Icabiritaja, ipigapaa cara isamaigasegui irogomere. Carani yogasëretasantaiga, iroro imagotaguëtaiguë. 46 Icantaiguëri:

—¿Pairo pisamabiritaiguë? Pingabiritaiguema pomanaigue arota quero picantiro ora te onganinate.
Cara yáganëngani Jesos.
(Mt 27.47-56; Mr 14.43-50; Jn 18.2-11)

47 Aintaquerai inibatasegui Jesos cara yaretaigapa tojai matsiguenga. Ibataiguëri Joras, irianti irogomere Jesos, iátasipëri Jesos yasaraboropari. 48 Icabëri Jesos:

—Joras, ¿Págagantënanico cara pasarapëna? ¿Teco pigóte Naro paniacha Jonogaguitequë, nomatsiguengatapë?

49 Aro iniaigabaqueri ira tsipataigari Jesos. Yosamitaiguëri:

—Natingomi, ¿Picoguico nopëgabentaiguemi nacarataigueri?

50 Aro paniro irogomere yáguero isabirite itoguimitatobëri iguemitasonori ibimantaga itingomi saseriroti. 51 Icanqueri Jesos:

—¡Aroque, antagati! ¡Quero pintiri basini!
Aique yotsagaquineri iguemita, yogaguibegajiri.

52 Jesos icantaigabaqueri itingomipague saseriroti aisati ira itingomipague sorarojegui omisantiro ibango Tosorintsi aisati antiasiparipague, icantaiguëri:

—¿Pairo pamasibiriquinaro pisabirite aisati anchaqui? ¿Pijiquinanico Naro cosirinti? 53 Omagaro cataguiteri piniaigabitëna cara nogometaiguimi cara ibangoquë Tosorintsi, te pingantëmatina. Carari omoncaraca yamai págaiguëna aisati iragabianque camagari intingomibintanque arosata.
Icanque Peroro: “Teni nogótiri Jesos”.
(Mt 26.69-75; Mr 14.66-72; Jn 18.15-18, 25-27)

54 Aique yágaiganaqueri Jesos cara ibangoquë itingomi saseriroti. Yoguiataiguëri Peroro icarantanë panirooti. 55 Yogamataiguëro tsitsi cara saaguiteroquë tsomagui tantotsi. Isobicaigapë, Peroro aisati. 56 Cara isobicasegui Peroro, oniasantëri tsinane obimantaga itingomi saseriroti, ocanque:

—Ica aisati yoguiatëri Jesos.

57 Carari icanquero Peroro:

—¡Cagarina naro! ¡Teni nogótiri!

58 Aique arosata, iniaqueri basini, icanque:

—Aisati obiro aguiatëri Jesos.
Carari icanqueri Peroro:
—¡Teni naguiatiri, teni nogótiri!

59 Aique ocosamanitanë arosata, icanëri basini:

—Aisonori yoguiatëri ica sërarica, irianti Garireasati.

60 Carari icanqueri Peroro:

—Teni nogóte pairoraca picanquina.
Iroontita inibasigui Peroro, irooti cara icaimanë tiapa sërari. 61 Aro inebintanaca Atingomi inetsëri Peroro. Aito cara iquianquero Peroro cara icomantëri Jesos: “Queroquerai icaimi tiapa sërari yamai, mabataque pinganque: ‘Teni nogótiri Jesos’ ”. 62 Aro isotocanai Peroro iragasantaca.
Isërontaigacari Jesos.
(Mt 26.67-68; Mr 14.65)

63 Ira omisantaiguiri Jesos isërontaigacari aisati ipasataiguëri. 64 Aisati ibasioquiqueri iroquiquë, inchotangaborotëri, icantaiguëri:

—Jaa, pingomantina: ¿Pairi capojëmi?

65 Përosati, tojai icantocotaguetasitaigari, isërontaigacari.

Yáganëngani Jesos cara yapatotaigaca jorío obatatsi icarati 71.
(Mt 26.57-66; Mr 14.53-64; Jn 18.19-24)

66 Cara oquëtaguetamananaque, yapatotaigaca iraegui antiasipari aisati itingomipague saserirotijegui aisati iraegui ogomeantiro isanguenare Moisés. Yágaiganaqueri Jesos catingasatiquë itingomipague ira obatatsiri icarati 71. 67 Icantaigabaqueri:

—Pingomantaiguena Obiroca Quirisito, Ira Agabisaicoontatsiri.
Yotabitaiguëri Jesos:
—Aroca nongomantaiguëmi: “Jee, Naro Quirisito”, quero piquemisantina. 68 Aisati nosamitaiguëmica pairoraca ora isanguenatocoquina, quero potabitaiguina. 69 Nopaniaca Jonogaguitequë, nomatsiguengatapë yaca quibatsica. Yamai pënibaque najátaje aisati Jonogaguitequë, nosobigopë cara ibacosonoriquë Tosorintsi Agabiasanotachari.

70 Icantaiguëri antagaisati jorío:

—¿Obiroco Itomi Tosorintsi?
Yotabitaiguëri Jesos:
—Jee, Naro, cara picantaiguë.

71 Aro yosamitobaca:

—¿Pairo ongogobique basini comantëgotërine? Aquemaiguëri omagaro eiro ora icanque Iriati: icantocotaguetasitari Tosorintsi. Ijitosorintsitasita Iriati.

<- Irocas 21Irocas 23 ->