LUCAS 20

Jesús jua theeg

(Mt 21:23-27; Mr 11:27-33)

1 Khãai ãb Jesús Aai i jëeujem deg dubwia õrag jaau sĩejim aajem, jãga Ẽwandamau am peerdʉ auju. Irua mag jaau sim aig, phadnaan chi pörkha nʉm khʉʉn bëejierram aajem, chi machnaan dʉ̈i judionaan am Asamblea eem chi pörnaanpa. 2 Mag bëewia irig, —¿Khai thöwiata jãg mʉig nem për narr khʉʉn pua dawag jʉr wërppʉ̈ijĩ? ¿Khaíuta jãg pʉrʉg pʉchta nem iek theeg apijĩ? Marag jaaubá ajierram anʉm.

3 Magbaa Jesuu amag magjim anʉm:

—Magan nacha mʉrʉg jaaubat. Muajã ĩchab pãrag jëeu ookhimgui ajim anʉm: 4 Pãrau khĩirjuawai, ¿chadcha Ẽwandamauta Juan pʉ̈ijĩ ajim anʉm, jãg amach khaibag Ẽwandamag chugpaapi jaaunaa õor pör choo nʉrramkhĩir, wa sĩi mʉg jẽb gayam khʉʉnau chogpʉ̈iwiata jãg nʉrrajĩwa?

5 Mamʉ mag irua jëeubarmjã pöd ʉ̈khaju khaugba aawai amach appai iyʉ̈ʉ nʉmua amach wir aigpai, —Keena, maadëu irig Ẽwandamauta pʉ̈ijim akhiin, magan jũrr irua maachig, “Jãg magʉmta pãrau irua jaau nʉrrarr ʉ̈khabajierráma” ajugui ajim anʉm. 6 Wa magba maadëu jũrr, “Ichjöm khʉʉnaupai pʉ̈iwiata jãg nʉrrajim” akhiin, magan õor pöm mʉg thʉnʉm jũrr maach dʉ̈ita meeukhawia, mokou bar wai nʉmuapai maach khëchpʉ̈ijugui ajim anʉm, mʉg phöbör ee thumaam khʉʉnau i igwia, “Chadcha Ẽwandam i jaaumie chaar” aajeewai.

7 Mag jaauju khaugba naawia warag, —Marau khaugbam jammuata bëejĩ, ni khaíu pʉ̈iwiata jãg nʉrrajim khai ajierram anʉm.

8 Magbaawai Jesuu amag magjim:

—Mua pãrag jëeutarr mʉrʉg jaauba aawai muajã pãrag jaaubamgui ajim anʉm, khai thöwiata mua mʉg nem wau chitʉ́.

Khaibag sĩsidʉmta nemjĩir thʉa narr

(Mt 21:33-44; Mr 12:1-11)

9 Maimua mag õor pöm thʉnʉmʉg mʉg nem ĩgkhaadam jaaumamua magjim aajem Jesuu:

—Woun ãbmua uvadö jĩirjim aajem. Maimua ich chawag mam khõchkhabaadeewai deeum khʉʉnag alquilaapʉ̈iwi, warp deeum durr petawia, mam sĩi aimajim aajem. 10 Mam mag simua ya chee jaar aadëm ee, ich chog pʉ̈ijim aajem, mag dʉ̈i ichig ich paatëm deepʉ̈imkhĩir. Mamʉ mag chi nemjĩir khʉ jöoirau chogtarrdam amach aar barbaimaawai, pʉrnaa, wʉ wai nʉʉ awia, sĩi deeu ich jua kharraa jʉrbapäaiwai, ich juadam parii barjim aajem. 11 Magbaawai jöoirau deeum pʉ̈ijim aajem, ich chog. Mamʉ majã amach aar oo barpinaa, parhooba i wau iekha wai nʉʉ awia, warm khãyaujã ʉ̈rʉʉpai wʉnaa, agjö ich jua kharraa jʉr werbajierram aajem. 12 Mag majã ich jua parii barbaimaawai deeum pʉ̈ijim aajem jöoirau. Mamʉ machará mag wʉ wai nʉmua, sĩi maach ëu pöm pepethor aadëmua, bag kha ʉ̈ʉipabaadeewaita ogdʉpʉ̈iwia, jʉrpʉ̈ijierram aajem, ni bʉchkhunpai deejöjöojã khaba. 13 Magbaawai ich jöoi chi uvadö ag papau khĩirju sĩi awia, “¿Mua jãga abarkhiina?” ajim anʉm. Mag khĩirju sĩi awia, “Ãa, jãgan mua mʉch iewaa mʉchdëujã chig aba aajemta pʉ̈ijugui” ajim anʉm, “Tale amau mʉ chaai oophöbaadeewai i ögkhawia i chig abaju” awia. Mag chadcha ich chaai pʉ̈ijim aajem. 14 Maimua mag jöoirau ich iewaa ichdëu jãsenecha aajemta pʉ̈iwia urum oobaawai amach appai magjierram anʉm: “Achamʉ́ i iewaa aawai mʉguata mʉg atag mʉg nemjĩirjã jʉ̈aju khabahaba. Keena, jãgan maadëu warre i thõopʉ̈ijugui ajierram anʉm, mʉg nemjĩirdö maach dënkha sĩsimkhĩir.” 15 Mag chadcha ʉʉr barchëpinaa, pʉrphöbaadëwi, warp nemjĩirdö igaau arrnaa, mam thõopʉ̈ijierram aajem, ich jöoi iewaa ãba.

Mag nem ĩgkhaadam ĩgkha öpʉ̈iwia õrag magjim aajem, ich Jesuupai:

—Pãrau khĩirjuawai, ĩsjã agtha mag uvadö sim anaa chi thʉa narr khʉʉnjã ich akhʉʉnpai akhiin ¿jãgaju khai jöoirau magʉm wounaan dʉ̈i? 16 Par irua ich chaai ãbpai khitʉm pʉ̈itarrpata mag thõobapʉ̈im oobaawai, mawia, warre amach thum khëchpʉ̈inaa, ich uvadö jũrr deeum khʉʉnagta jaau pʉabjëjugui ajim anʉm, ichdëupai.

Amach jʉ̈g daar Jesuu mag iekhabapʉ̈im ũrbaawai chi aig narr khʉʉnau, —Aay, Ẽwandam, ¿khanthee pua magbaadëju? ajierram aajem, mag uvadö jaau sim gaaimua Ẽwandamau amachta jaau sim khaphʉ narr aawai.

17 Magbaawai Jesuu am khĩir eerpa eerpanaa amag, —¿Khan aawaiuma ajim anʉm, Ẽwandam iek phã sim gaai ar “Di ëu narr khʉʉnau isegtarr dibigta jũrr chi dihãd jãrramkha sĩsim” a sim? 18 Magnaa ichdëupai, Mag dihãd a simʉn mʉ igwiata mag simgui ajim anʉm. Chi mʉ iek ʉ̈khaba sim wounan juau ogthom mag dibig ʉ̈r burrwi ichdëupai ich gaai mas wau simjöta sim; maimua mag ʉ̈khaba nʉrrʉmta meemʉn jũrr mʉ mag dibig pömaamjö chirʉmta i ʉ̈r buudimamjö ajugui ajim anʉm.

Jesuu mag sĩerran mag i iek ʉ̈khaba meebaadeewai warre khĩmie durr barpʉ̈ijuuta jaau sĩejim.

19 Irua mag uvadö thʉa narr khʉʉn khaibag sĩsid arr jaau sim gaaimua, phadnaan chi pörkha nʉm khʉʉnau chi machnaan dʉ̈imua khaug athajierram aajem, Jesuu amachta jaau sim. Magbaawai ag bʉ̈rre i pʉr aum igphöbaadëjim aajem. Mamʉ mag i pʉr athaawai phöbör eem khʉʉnau jũrr amachta khaigbaju khĩirjuwia i dichbajierram aajem.

Reígjã deenaa Ẽwandamagjã ich paat deepi jaautarr

(Mt 22:15-22; Mr 12:13-17)

20 Mag amach dʉ̈ita õor meeukhapiju khãai sĩi õor jʉr auwia chi Jesús sim aar pʉ̈ijierram aajem, makhʉʉnau chadcha khaugba aawaita irig jëeu nʉm awia jëeubaimaawai, jaauju khaugba ipeerdʉ khãijã jaaubapäaiwai, magʉm gaaimua gobernador aar i pʉr arraag. 21 Mag ërëuwi chadcha irig maguimajierram aajem:

—Maestro, marau khaphʉ nʉmgui ajim anʉm, pua chadcha nem agchata jaaujem. Pua mag õor iwiir ãbpaita ʉ̈rcha kha khõsijã khaba, ante pua chadchata thumaam khʉʉnag jaaujem, jãgata aju aai nʉ Ẽwandamau nem jaau sim eyaa wënʉrraag. 22 Magua marau pʉrʉg jëeum ig nʉmgui ajim anʉm: Pua oowai ¿chadchata maach meeun judionaanaujã durrpierram khʉʉn rey Roma sĩejemʉgta impuesto phagju aai nʉ, wa phagju khaba nʉwa?

23 Mamʉ Jesuu mag sĩi ich imeraa pʉr awaagpaita ichig jëeuchë nʉm khĩirjugjã khaphʉ sĩerr aawai amag magjim anʉm:

—¿Khantheeta pãrau sĩi imeraa mʉ pʉr auju ẽkha nʉma? 24 Daai mʉrʉg phatkhon chi dau daí jʉr deebat, mua pãrag jaaukhimgui ajim anʉm.

Maimua au deebaawai amag, —¿Khai khĩirta khai thʉ̈r dʉ̈i ag gaai sĩ ajim anʉm, pãrau oowai?

Magbaawai amachdëu, —Romaam rey César khĩir khabahab ajierram aajem, ich thʉ̈r dʉ̈i.

25 Magbaawai deeu ichdëu amag, —Pãrau mag khaphʉ nʉm khai, magan reíg ich paat deenaa Ẽwandamagjã agjö ich paat deebat ajim anʉm.

26 Mag amachdëu jëeubaawai i ipeerdʉ iekhabarm gaaimuapai phithurg chukhu i pʉr awaan a bëetarrta, warag ich garmua amachig mag jaaubarm ũrwia sĩi jʉ̈gderraa nʉm iekhau warag amachta khĩu nʉisijim aajem. Mag, pöd i pʉr aubajierram aajem.

Ẽwandam chan chi khëcham khʉʉn Ẽwandam khabam

(Mt 22:23-33; Mr 12:18-27)

27 Mag khur Jesús aig bëejierram aajem Saduceonaan. Makhʉʉnau jaauwai, maachta meebaadëm chan tag bʉ̈ʉrjã maach akhaar iiuba aajem aajem. Amach mag nem jaau sĩerrjëem gaaimua iyʉ̈ʉmamua juau ogthom irig magjierram aajem:

28 —Maestro, jöoi Moisés khararrau Ẽwandam iek phã pʉarr gaai jaauwai, woun ãb ʉʉi paraa simta mag ʉʉi dʉ̈i chaai chukhu meemʉn jũrr chi khod ãbam wai sim khai magua ich ag ʉʉipai auju aai sim a simgui ajierram anʉm, ag dʉ̈i ich naamʉu chaain ooba arr aawai jũrr i athee oo deeg; mag oo deebarm i chaainkha nʉisimkhĩir.

29 Maimua amachdëupai warag irig nem ĩgkhamamua magjierram aajem: ’Biek ãb ãbam khod appai emkhooin siete naajim aajem. Am naam chi nacharamua ʉʉi auwia, ich mag chaai chukhu wënʉrrʉm ee meejim aajem, chi emkhooi. 30 Magbaawai jũrr chi eeumua aujim anʉm ich ag ʉʉipai. Mamʉ mag dʉ̈ijã pöd chaai ooba, ich mag chaai chukhu meejim aajem. 31 Magbaawai ag eeumuajã jũrr ich ag ʉʉipai aujim anʉm. Mamʉ maguajã pöd ag dʉ̈i chaai ooba meejim aajem. Ich mag ewagam khʉʉnjã ãbam ʉʉiraupai warm meemam ẽudee theg ahaugmamua mag ãbam khod appai siete narr thum thegdʉpʉ̈ijim aajem; mamʉ ni ãbmuajã pöd mag ʉʉi dʉ̈i chaai oobajim anaabá. 32 Maimua ãbmiecha paawai ĩchab chi ʉʉijã meejim aajem. 33 Maagwai marau pʉrʉg jëeum ig nʉmʉn mʉgaugui ajierram anʉm: Mag ãbam ʉʉiraupai emkhooin khod ãbampai siete phëtarr aawai mʉg atag thumaam khʉʉn iiu phiidʉtkha nʉm edjã, ¿mag ʉʉi chijãg dënkha sĩsijuma ajierram anʉm: chi nacha autarr dën, wa ẽudeegam khʉʉn dënwa?

34 Magbaawai Jesuu amag magjim aajem:

—Mʉg jẽb gayan, õor jua pʉrnaa amach chaainjã jua pʉrpipi aajerram. 35 Mamʉ iiu phiidʉwia ʉ̈gtharcha öbër nʉm khʉʉn chan tag jua pʉrpʉr abam, ʉ̈gtharm Ẽwandam chognaanjö tag meeba ich mag nʉisiju aawai. 36 Ya am Ẽwandam chognaanjö thʉnʉm dʉ̈i ĩchab Ẽwandam chaainkha thʉnʉmgui ajim anʉm, ich Ẽwandamauchata am phiriutkha autarr gaaimua. 37 Maach meewia deeu iiu phiidʉajem iekhan Moiseeujã jaaujimgui ajim anʉm, pabʉ̈dam neneree khitʉm uurdʉ thʉnʉm ichdëu ootarr jaau sim ag ẽsap ichdëu phã pʉatarr gaai. Mag jaauwai, i iek maach Pör Ẽwandaman jöoingar jöoi Abrán khararr ag Ẽwandam aajem. 38 Ẽwandam chan oob mag chi khëcham khʉʉn Ẽwandam khabam. Ẽwandaman chi iwam khʉʉn dënëu. Irigan nawe meetarr khʉʉn awia khãijã thum chi iwam khʉʉnau a jaaumajim aajem.

39 Irua mag iekhabapʉ̈im ũrwia ãaur khʉʉn chi machnaanjã aig narr aawai makhʉʉnau irig, —Maestro, ʉ̈uchata pua mag iekhabapʉ̈imgui ajierram anʉm.

40 Mag, Saduceonaanaujã amachdëu pöd i pʉr auba meerkhabapʉ̈im oobaawai tag irig jëeuba ich mag nʉisijim aajem.

¿Mesías khai Iewaa ajĩ?

(Mt 22:41-46; Mr 12:35-37)

41 Mag khĩu thʉnʉisim ee jũrr Jesuu ich garmuata amag jëeujim anʉm:

—¿Jãga pãar iek mag Mesías jöoingar David khararr ag chaain ewagam khʉʉn dën aajẽ, 42 ich Daviiuchajã ichdëu ẽsap phãtarr Salmos anʉm gaai i igwi “maach Pör” a iekhatarrta? ¿Pãrau khĩir ee paba nʉ, Ẽwandamau ich iekhatarr Daviig phãpitarr? Mag irua phãtarr gaai mag sim:

“Maach Pör Ẽwandamau magjim maach Pörög:

‘Mʉch iek theeg chirʉmjö aag mʉ dʉ̈i ãba mʉ juachaar gar jupbá ajim, 43 pʉch oomapha aajem khʉʉn thum mua pʉch jua ee pʉrkha dee nʉm ora.’ ” (Sal. 110:1)

44 Mag ich David khararrauchajã Ẽwandamau pʉ̈iju aajerr igwia “maach Pör” a iekhatarrta, ¿jãgwia pãrau sĩi i David chaain ewagam khʉʉn dënpai aajẽ? Mag sĩi ich chaaipai aju akhiin Daviiu ich paarmua mag “maach Pör” abakhamgui ajim anʉm.

Chi machnaan khai amach thö iekhapim khõsita sĩerrjëem

(Mt 23:1-36; Mr 12:38-40; Lc 11:37-54)

45 Maimua õor thumaam khʉʉn jʉ̈g daar Jesuu ich khapeen ich dʉ̈i ogdʉba wënʉrraajerr khʉʉnagta magjim aajem:

46 —Moiseeu Ẽwandam iek phã pʉatarr jawaag chi machnaan dʉ̈i khai khĩir khaphʉ aajeet. Jãkhʉʉnan sĩi khajũa bʉ̈ duurg jũanaa kaaijã ee õrau amachig saludaawaijã amach thö iekhapim khõsita sĩerrjëemgui ajim anʉm. Jãkhʉʉnan amach Ẽwandam i jaaujem deg weetwaijã amachta pörgarcha thumaam khʉʉnag khĩir jʉrkha juupjemgui ajim anʉm, amachta warm khʉʉn khãaijã ajapcha nʉm awia. Maimua di chaaur thach khömkhĩir thʉ̈ʉrwaijã parhooba jupba, khãidu ajapcharamta jʉ̈a au sĩerrjëemgui ajim anʉm. 47 Jãkhʉʉnaun sĩita khoopaa ʉʉin juagam nemdamjã khechthʉg aumaajerram. Magnaata sëukha warag am kõit Ẽwandamag jëeu nʉʉ aajemgui ajim anʉm, juau ogthom amach magba nʉm amkhĩir. Mamʉ amach jãg wënʉrrʉm paar, jũrr Ẽwandamau ĩchab am gaai jua khʉabajugui ajim anʉm.

<- LUCAS 19 LUCAS 21 ->