1 Magtarr khur deeu ũwaai mag thʉrrdö pöm sim Tiberias anʉm igaau marag ich oopijim. Mag ich oopitarr mʉg ajim: 2 Maar maig naajim: Simón Pedro, Tomás am dën i Meís a thʉ̈ʉrjerr, Natanael chi Galilea durr phöbördam Caná anʉm eem, Santiago, mʉ, maimua mag tag maar khapeen agjö ich Jesús khapeen numí naajim. 3 Mag nʉmta Simón Pedroou maar na, —Mʉ dö ʉakhemgui ajim.

Magbaawai marau, —Magan maarjã pʉ dʉ̈i wëtjugui ajim.

Mag, chadcha marau ërëubaadëwi bote ee döjãrr paaukhabaadëjim. Pari mag ed chan par ich mag ʉa ëetarrjã ni ãbjã thõobajim. 4 Mag ʉa ëedʉtkhamaa awia ya ãspa õor mor dawaa aadëm ee döieg oowai, Jesuuta dö igaau oo dʉnaajim; pari mag oobaawai maraun ich khabampii naajim. 5 Mag nʉm ee, maar döi dakha narr aawai, ich garmuata marag, —Keena, ¿ãwarr thõojierrá? ajim.

Magbaawai marau, —Bʉ̈ʉrjã thõoba nʉm perá anaajim jũrr irig.

6 Magbaawaita deeu ich garmua marag, —Magan pãach red pãach juachaar gar dubpʉ̈inaa ʉrëujurauma; jãiguin chadau nau pãrau pʉr aujugui ajim.

Magbaawai chadcha i ipierr marau maachig jaautarrjö dubpʉ̈inaa ʉrëubaawain chadau par marau ëudʉdʉkhamjã pöd jiir auba aajeejim, ãwarr pömta thʉnarr aawai. 7 Mag nʉm ee ya mʉchdëun khaug wai chirarr aawai Pedroog, —Jã maach Pör Jesús khabahab a chirajim.

Ichig magbaawai sĩi khajũa khomariipai jũa sĩerr aawai ag bʉ̈rre ich khajũa wajapha jũapet awi warag dö ee dʉrbbaadëjim, jöpkharraa ichta chi Jesús sim aar baraag awia. 8 Chi redjã jua miebaadee pöd jiir auba, warag sĩita jap eemuapai ëudʉ arrumua ag dʉ̈i dö igaau phẽeubaimajim, warpcha khaba dö igaaumua maar narr aar cien metrojöpai sĩerr aawai. 9 Mag dö igaau panaa oocheewai ichdëu maar na õt örwia ãwarrta ag ee thʉ wai sĩejim; panjã ĩchab wai sim marau ooimajim. 10 Mag maar ich aig paaukhabaimaawai ich garmua marag, —Jũrr pãach dën eem agjö ãaur phë aipidut ajim.

11 Magbaawai Simonau petwi, deeu jap ee waaidʉbaadëwia, chi red ich jãg chi ãwarrpa mosjã ee ëudʉ aujim. Ãwarr daphʉmpa ag ee thʉnʉmta ciento cincuenta y tres naajim, chi khapanag. Mag ãwarr pöm thʉnarrjã ʉ̈u chi red thʉrrëubajim. 12 Maimua ya chi ãwarr phaakha athaawai ich dʉ̈i thach khömkhĩir maar ich aig thʉ̈rkha aujim. Pari ya marau i khaug wai narr aawai ãbmuajã irig “¿Pʉ khaiujã?” aba aajeejim. 13 Mag maar thʉ̈rkha auwi, pan aunaa, ichdëucha marag jigpʉ̈iwi, chi ãwarrjã ich agjö jigpʉ̈ijim. 14 Mag mosjã ee maar ich khapeenag ich oopitarr, ich iiu phiidʉtarr khur biek jayapam ajim mag ich oopi sim.

15 Mag thach khö nʉʉ awia ya khö aaipagkhabaadee Simón Pedroogta ich Jesuu, —Simón, Juan iewaa, ¿puata chadcha pʉch khapeen khãaijã ʉ̈rcha mʉ daupii chirʉ́wi? ajim.

Magbaawai Pedroou irig, —Ëera Señor, pua khaphʉ simgui ajim, mua pʉch daupii chitʉm.

Magbaawai deeu chi Jesuupai irig, —Magan mʉ iek ʉ̈kha durrum khʉʉnta oveja chaain thʉajemjö wajapha thʉa wai chitá ajim, mag amachdëu mʉ iek ʉ̈kha nʉm gaaita ich mag ubʉ wënʉrramkhĩir.

16 Maimua deeu ũwaai irig i thʉ̈rcha thʉ̈rthʉ̈rnaa, —Simón, Juan iewaa, ¿chadchata pua mʉ daupii chirʉ́wi? ajim.

Magbaawai Pedroou irig, —Ëera Señor, pua khaphʉ simgui ajim, mua chadcha pʉ daupii chitʉm.

Magbaa deeu irig, —Magan mʉ iek ʉ̈kha nʉm khʉʉnta oveja thʉajemjö wajapha thʉa wai chitá ajim.

17 Magnaa deeu ũwaai biek thãrjupamua irig ich ag iekpai phʉʉrba, —Simón, Juan iewaa, ¿chadchata pua mʉ khõsi chirʉ́? ajim.

Mag ich ag iekpai biek thãrjup ichig phʉʉrba jëjëeu khabaadeewai Pedro warag ichta ökhĩirjuu aadëmua irig magjim:

—Señor, puata nem thum khaphʉ aajeewai pua khap chirabahab ajim, mua chadcha pʉch khõsi chitʉm.

Magbaawai Jesuu, —Magan mʉ ovejanaandamta chig apiba thʉa wai chitá ajim.

18 Magnaa ichdëupai iekhamamua irig magjim:

—Pʉdë mʉ iek ũrbarí: Warrgur pua pʉch juadamau pʉch khajũa jũawi pʉch mam khõsimʉg maajeejim. Pari mʉ cha iekha chirʉm iekhau mʉg atag pʉ jöoiraa aadeewai pöd pʉch juau khajũadamjã jũaba, chikhamnauta pʉ khajũa jũapijugui ajim. Magnaa pʉ juajã amau bʉʉrkha sĩunaa pʉ mamapha khitʉm aar ajués amau pʉ arrjugui ajim.

19 Jesuu Pedroog mag iekhatarran, jãga õrau ich gaaimua mag i thõoju jaauwiata mag iekha sim ajim, mag ich gaaimua meebaawai Ẽwandamta õrag thö iekhamkhĩir. Magnaa irig warag, —Mʉ iekta ogdʉba ich jãg ʉ̈kha chitá ajim.

20 Maimua ërëubaadëwi Pedroou deeu ewag oo nʉʉ aawai ich Jesuu ʉ̈rcha daupii aajerrta am ẽudee urajim. Ich ag wounau ajim i thõoju noram ãbmiecha thach khö naawaijã, ichta igarcha oo sĩerr aawai, irig “¿Khaíuta mag pʉ oomapha aajem khʉʉnag pʉ pʉr deeju agá?” a jëeutarr. Wajapcharan magan mʉchma, mʉchta am ẽudee maa ajim. 21 Mag ewag oo nʉʉ awia ich Pedroou mʉ oo athaawai mʉ igwia Jesuug, —Señor, ¿magan Juanjãma? ¿Jã jãga meejuma? ajim.

22 Magbaawaita Jesuu irig, —Mua i meepiba deeu mʉch bëe nʉm ora ich jãg nʉrrapiju akhiinjã, ¿pua i jãgbarju? ajim. Mag chirabnaa pʉchta khĩirjunaa ich jãg mʉ iek gaaita ubʉ chitá ajim ich Pedroog.

23 Pari Jesuu mag iekhatarr igwia ermanonaanau amach eepain mʉ igwia, “Magan mag woun chan meeba ich mag nʉrrajugui” a iekhaajeejim. Pari mʉchdëucha ũurwai chan Jesuu mag mʉ meepiba ich mag chitaju aba, sĩi ar mʉchdëu jaau chirʉmjöpaita, “Mua i meepiba deeu mʉch bëe nʉm ora ich jãg nʉrrapiju akhiinjã, ¿pua i jãgbarju?” ajim. Magpaita iekhajim.

24 Jesuu mʉ igwia mag iekhatarr ich ag wounaupaita mag thumaa cha jaau chirʉm mʉg ẽsap gaai, mʉchjã i dʉ̈i ogdʉba chitʉmua mʉch daúa oojerr aawai. Maagwai tagam khʉʉnaujã khaphʉ nʉm, mua mʉg phã chirʉm nem chadcha arrta jaau chirʉm.

25 Mua mʉg ẽsap gaai phã chirʉm atcha Jesuu nem inag pöoma waaujeejim. Irua mag nem waaujerr thum ããbdö jaaukhiin, libro khapaanata öbërkham, makhʉʉn thumaa õrag khakhapdö amkhĩir ĩgkhapʉ̈yaag.

Maga ajim keena. Makhʉʉndamta pãrag khap amkhĩir jaaum ig chirajim.