22
Na Kokoeliulivuti tana bona ni Vahaghitaili Sule Va Tana Rivurivu.
1 Nigua na God, nigua na God!
e ghua ge o tona saniu?
E ghua ge o kabu sagauviu?
E ghua ge o mua hangau,
mo rongovi leaa nimua na tangi.
2 Nigua na God, inau tu hologho tana lei dani.
hauva mo mua bosatughu.
Inau tu hologho te bongi tana lei bongi
mo rongovia na mangagu,
hauva mua topoa na topoa na togholuvu.
3 Nina lei holohaba Israel te talighutia na malei kabumu,
na pukuna ighoe to tabu.
4 Na lei kukuamami tara varava itamua;
gaira tara varava itamua mo vavolara.
5 Ighoe to rongovia didira na hoholo
ge ko hangara mo ko vavolara.
Gaira tara varava itamua ma kara mua ghoi dikalio.
6 Hauva, inau ke na kedu, u mua tinoni.
gaira udolu tara mua liogu mara niu sika.
7 Gaira udolu tara righiu tara batobatou.
Ra toutoui na ghidudira mara birubirui na uludira, mara ghaghua.
8 “Gaia te varava itatana Lord, sania Lord ke vavolaa!
Ge teke dolovi ngangataa gaia,
Eghua ge mua vavolaa?”
9 Ighoe to lavihoru tatavahaleu tana kutuna tinagu,
mo uhuliu ge ku varava itamua tana bona tu meomeo mua.
10 Itamua tua tu ghanau vuivuni tana bona ni vahuagu.
Ighoe nigua na God mai tua vuivuni tana bona ni sivuraghaagu.
11 Ko bei kabu sagauviu!
Na gunaguna ililighigu,
me taho siki sakai ke tangomana na hangaagu.
12 Na ghagua na kana tara talighutiu vaghara na ovu ni buluka mane;
na lei buluka mane mamataghugha ni Bashan tara kililiu.
13 Vaghara na lion tara ngurunguru tara sagia na ghadira na bolo,
ra ovaovai na mangadira mara mai tagua.
14 Na volagu te kaikavi vaghaa na beti,
mana lei paupaguha ni huligu tara varadiu.
Na dougu te vaghaa na soi kokodo ni ghai te obo tana lokagu.
15 Na sosonogu te mamaha vaghaa na pari sisi te hinari paopaoa.
Na lapigu te rago dato tana mangagu.
Ighoe to kolivaghiniu tana pughu ni pari
mo tona saniu ge ku mate.
16 Na ghagua na kana tara utu talighutiu vaghara na ovu ni kau;
na lei tinoni dika tara talighutiu.
Ra suki potai na limagu mana tuagu.
17 Inau ku tangomana na idumiani na huli tana huligu.
Na lei ghagua na levunimate tara pelau nia na togo.
18 Gaira tara tuvalighi lei nigua na tivi ighobudira heghedira,
mara sonia na dice ta nigua na pupulu.
19 Ko bei kabu sagauviu, Ghe Lord!
Ighoe nigua na laga; mina mai mo ko vavolau.
20 Ko vavolau tana ivi; ko vavolau tana lei kau raini.
21 Ko lavikehau tana mangadira na lion raini
mi tana koladira na buluka asi.
22 23 Vaho ge ku ladavaghinia na ahamu te haeharegha
vanira na lei hoghogu mana vavinegu.
Inau ku holohabagho itadira na lei tinoni.
24 Kau holohabaa Lord ighau udolu tau nia kikinima!
Kau nia kikinima, ighau na vinavahuhuna Jacob!
Ma kau tualaghi tuturu kikinima vania,
ighau na vinavahuhuna Israel!
Gaia te mua nia murilio didira na vahaghitaili rana tinoni bona.
Gaia te mua ririu keha me ke tona sanira.
Me bosatughu vanira tana bona tara holoa ge ke hangara.
25 Inau ku holohabagho tadira na lei tinoni;
inau ku goni kalea nigua na baubahu
tana matadira tara nigho kikinima.
26 Rana bona kara vanga ma kara mahu.
Kau holohaba Lord ighau tau kene taonia.
27 Na maramana udolu kara ghilala Lord te utuni ma kara oli va itatana.
Lei tinoni tana lei kema kara tualaghi tuturu kikinima tana matana.
28 Gaa Lord te vunaghi haba!
gaia te vunaghi pungisira na lei kema tana maramana.
29 Lubatira na lei tinoni lologho tana maramana kara kikinima.
Lubatira na tinoni tara vahura ge kara mate,
kara poghotao tana matana.
30 Na lei vavata ke mai kara lutu vania Lord.
Na lei daleda kara rongovia nina lutu Lord te haeharegha.
31 nina gehegehe maemane kara tughunitatea vanira tara mua vahura mua.