1 Ma Abraham te sania i Mamre me tona tana bona mamaha tara holoa nia Negev, me va kabu i ghabudira e rua na komu, i Kadesh mi Shur. Murina keri gaia te ghoi ghadaru va i Gerar, 2 mi tana bona keri Abraham te bosa vanira na vure raeni, “A Sarah ke, te vaivinegu vamua,” sakai vamua te tauna. Keri ke, Abimelech, na vunaghi haba ni Gerar te holaa vania mai a Sarah ge ke tauna. 3 Mi ta sakai na bongi God te bosa vania Abimelech tana maturu bole me ghaghua, “Ighoe ko mate, na pukuna na vaivine to lavia te taulaghi tua.”

4 Ma Abimelech te mua nia kolikolu mua Sarah, me bosa me ghaghua, “?Maghutu, ko mateu so kolura nigua na vure, sakai vamua tu marabu tana palu keri? 5 Me bosa heghena Abraham ke, ‘Inau na vaivinena Sarah.’ Me bosa ghua Sarah ke, ‘Inau na vaivinena Abraham,’ e ghaghua! Tana bona tu lavia na vaivine eni ke, mi tana ghanaghanagu inau ke, tu mua gonia siki hahia vania!”

6 God te bosa tughu vania Abimelech tana maturu bole, “Eo, inau tu ghilalaa na hava to nea keri te marabu, mo ko bei neu mo ko palugha itagua. Keri ke, ge u hovegho ko bei hibetia na vaivine keri. 7 Ko va talu olia vania a tauna. Gaia ke kokoeliulivutigho ge ko vola, na pukuna gaia na prophet. Taho ke, mi ghoe ma nimua na binaboli udolu tua kau mate.”

8 Ma Abimelech te va rarai mai tana bona te puipungi mua, me holo kolura na lei nina mane huhuli, me tutugui vanira na lei totobo tana maturu bole, mara mataghu sule ngangata. 9 Ma gaia te holoa Abraham ge huatia, “Na hava na totobo vaghana eni to nea vanighai? ?Na hava tu goni dikalaa vanigho ge ko nea na totobo eni vaniu, ma nigua na vure? E mua manana ge ko gonia vaniu na totobo eni. 10 ?Eghua ge ko gonia vaniu te vagha eni?”

11 Abraham te bosa tughu, “Inau tu ghanaghana ke, me taho siki tinoni te taluutunia God iani, keri ke, kara mateu gea ma kara lavia taugu. 12 A vaivinegu sughua gaia, na pukuna te dalena tamagu, me mua dalena tinagu. Keri ke, ge u lavia mu tauna. 13 Mi tana bona God te vetenau ge u sania na komuna tamagu, mu ku tona tana lei butonikomu keha, keri ge u bosa vania Sarah, ‘Ivei tua koro vaa ke, ko niu kikinima mo ko bosa to vaivinegu.’ ”

14 Ma Abimelech te hea olia Abraham a Sarah tauna, kolura na lei nina seka, na mane mana vaivine, mana lei sheep mana lei buluka. 15 Ge gaia te bosa vania Abraham me ghaghua, “Aeni udolu tua nigua na pari, ko vilia ivei to liona na kabu igaa.” 16 Me bosa vania Sarah, “Inau tu hea vaivinemu Abraham na togha ni rongo ni silver, ke lavikehaa siki ghanaghana dika ke ba nea siki sakai vuvungamu, ge na mavitu ke ghilalaa, to mua gonia siki totobo te hahi vanigho.”

17 Keri ke, Abraham te kokoeliulivuti vania God, ma God te volaa Abimelech kolua tauna, mana lei vaivine tana valena ge kara ghoi logho gari. 18 Mana pukuna Abimelech te diki lavia tua tauna Abraham, Yahweh te nera na lei vaivine tana valena mara mua logho gari.

<- VUIVUNI 19VUIVUNI 21 ->