15 అపుడ యేసున్ వెంటా ఉదుత్ అనెకా తన ఒక్కొద్ ఆ గొట్టికున్ విత్న, “దెయ్యమ్నె రాజ్యం ముత్ జెవుంన్ కలెకద్ గుల్ పెరెత్ ఆసిర్వాద్ సుమెకాద్ ఎరాద్” ఇసా ఇంతెద్.

16 తే యేసుంద్ “ఓక్కొ మన్కనా గలెనా దండి జెవున్ సియెంఙ్ నిర్నయ్ కతెంద్. పేలెటరున్ కుగ్‍తెద్.” 17 అని జెవున్‍ తా వేలా ఎరెంఙ, కబుర్ ఇడుత్ అనెకరున్, వర్! ఇన్డి జెవున్ కలెంఙ్‍, సిమనా తయార్‍ అంన్సాద్‍. ఇసా సిసున్ పవింటెద్. 18 గని ఔర్ సిమ్కన జెవునుంఙ్ సెరెంఙ్ బోదుంఙ్ ఒక్కొది తిరడ్ వట్టి ఆగమీ ఇనంఙ్ ఇడెంఙ్ ఎద్దెర్. ఔర్తన పేలెతంద్, అన్ కెన్ సుమ్తన్. సెత్ ఓలెంపజె. అనుంఙ్ మాప్ కల్ ఇస అముదు వేల్తెంద్. 19 మల్ల ఒక్కొంద్‍, అన్ ఐద్ జొడిక్ కొద సుమ్తన్. అదా ఎనక్‍ పని కల్సావొ సెత్. ఓలెఙ్ పజె. అనుంఙ్ మాప్ కల్ ఇసా వేల్తొల్తెంద్ ఇసా ఇన్తేంద్.

20 ఇంకా ఒక్కొద్, అన్ ఇండిని పెండ్లి ఎద్దిన్. అన్ వారెంఙ్‍ సాలెన్ ఇసా ఇంతెంద్. 21 అపుడ్ అముదు సిసుద్ తన్నె మాల్కకున్‍ వై రగ్ తిర్గుత్ వత్, సిసున్‍ వెంటా, నీ వెంటాయ్ నగురుత్ సంది నల్గూర్ గొందిన్ సెత్న, గరిబులున్, కుంటికున్ అని గుడ్డికున్ కూగుత్ తోడా వా ఇసా ఇడ్తెంద్. 22 ఔర్ అముదు గడియక్ ప్రబున్ మలైయుత్ వాత్న, ప్రబున్ నీ అత్తి సియ్‍తెతి లాంఙ్ అన్ కత్తన్. ఎనాగని అనా గని ఎల్ల ఇంకాగినా నిండెంఙ్ అన్సాద్ ఇసా ఇంతెంద్. 23 అపుడ్ ఆ మాల్కక్ గడియకున్ వెంటా, అన్నె ఎల్లత్ మంది నిండెగి పాహజే. అదుంఙ్ ఎత్తి నీ నగురుంఙ్ వాకా సెత్న, జాప్ అని కెనుత్ అనెకారున్ జులుమ్ కత్న కో 24 ఇదుంఙ్ ముండట్ కబుర్ ఎక్సెటర్ అతాన ఒక్కొద్‍నాయ్ అన్ సియెకా జెవున్నె సవ్వీ ఓలెర్ ఇసా ఆ మన్కక్ ఇసాద్ ఇసా యేసుంద్ ఇడ్తెంద్.

25 పెరెత్ మంది యేసున్‍ వెంట వార్సనాంనెర్. తె యేసు ఔర్ పకంఙ్ మలయుత్, 26 ఎర్‍ అన్‍ వై వార్సరొ, అముదు తన్నె అమ్మ బానున్, తన్నె మాసలున్, కీకె కొమ్మలున్, అన్నక్ తొరెండ్లున్ తోర్దా దాదక్ కెరున్ అని తన్నె పానముంఙ్ ఎన ఎక్కవా అన్ ప్రేమ్ కలెంద్ అముదు అన్నె సిసుద్ ఎరెంఙ్ సాలెద్. 27 ఎర్ ఎన తన్నె సిలువన్ కున్తుత్ అన్ వెంట వర్సదొ అముదు అన్నె సిసుంద్ ఎరెంఙ్ సలెంద్. తన్నెత్ తాని తక్లిబ్ బొగిల్సెటాంద్ అముదు అన్నె సిసుద్ ఎరెంఙ్ సాలెంద్.

28 ఇముంన్ లోపా ఎది ఒక్కొ మడి కట్టెంఙ్ ఇసా అండెద్ ఇండ్రు. తే అమ్నతీ కట్టుత్ అనెంఙ్‍, వెన్కత్ అండిన్ అంత్తె అండినా తొదా ఇసా లెక్కా కత్న ఓలెదా? తప్పతోసెటా ఓల్సాద్. 29 ఒక్కొ మోకా ఓల్‍సెటా బునజి తపుత్, అముదు అదున్ పురా కట్టెంఙ్ సాల్సదో తోదో అదున్ ఓలుత్ సిమ్కన మంది కాయుంఙ్ సార్. 30 ఓలెకార్ సదరి ఇమ్‍దు కట్టెంఙ్ మొద ఇట్టెంద్ గని అదున్ పురా కలెంఙ్ సాలేతెద్ ఇసా అమ్నున్ చడిప్తెర్ అని కాయుంఙ్ సార్.

31 అది ఎరెకడ్ ఒక్కొద్ రాజక్ మల్ల మరొక్కొద్ రాజకున్ వెంటా లడెయ్ కలెంఙ్‍, తనత్తి అనెకా పది హజల్ సిపాయిక్ గదియ్తె రా తొదా ఇసా విచార్ కలెరా? తక్సెటా అముదు విచార్ కతెంద్. ఈర్వె హజల్ మంది సిపాయిక్ వెంటా వార్సననెంద్. ఇంతె అమ్నున్ వెంటా లడెయ్ కలెంఙ్ సెరెకా, 32 తన్నె సక్తి గదియెద్ ఇంతే, ఆ రాజుంద్ ఇంక గుల్ దవ్ అనెఙయ్ ఇమ్ద కలయెంఙ్ వాయతదున్ పన్కుత్ సాంతి కల్ ఇసా వింతి కత్తెంద్ తా. 33 అపుడ్‍ ఇమాతననాయ్ ఎరి ఎక్కద్ అన్నె సిసుద్ ఎరత్‍ ఇంతె, అముదు గియనాడ్ విచార్ కత్న, ఇన్నతి అనెకాద్ సాదరున్ సాయుత్ వారెంఙ్.

34 సుపుత్ ఎన్ని గొల్ సావ్వి అన్సాద్ అని గొల్ కామ్ సియ్‍సాద్. గని అద్నె సవాద్ సవద్ సెదిన్ ‍ఇంతె, మల్ల అద్నె సవదున్ కొరెంఙ్ వరెద్. 35 ఆ సుప్పున్ బూమిత్‍ తపెంఙ్ కామ్‍ సియెద్ అని బిదిత్ జొపిడెంఙ్ కామ్‍సియెద్. మన్కకెర్ అదున్ వాకా జొపిడ్సార్. కెవ్వు తోసెటార్ అదున్ జొపిడ్సార్ కెవ్వు అనెకర్ అదున్ విచార్.