1 అన్ దొకా వరగల్సెటకఙ్ అన్ ఇంమత్తి వరెంఙ్ తోదిసా అన్నెత్ అని విచార్కత్తన్. 2 అన్ ఇమున్ దుక్ కత్తాన్ ఇంతే అనుంఙ్ కుసీ పర్తెంఙ్ సటీ మరొక్కొర్ ఎర్ అండార్? 3 అదుఙి ఇముంఙ్ అద్ ఉత్తరం. అన్ వత్తనిన్తే అన్ను కుసీంఙ్ కొరెంఙ్ ఇనత్తెదెకుల్ ఔర్ అన్ దుంఖా ఎరేఙ్ తొద్ ఇసా అన్నే విచార్. అన్ కుసినడ్ అన్డే నీర్ అనుంఙ్ కుసీంఙ్ పర్త్సతిర్ ఇసా అనుంఙ్ బరోసా.

4 దుక్కమడ్ కన్లాడ్ ఈర్సెరిప్తే, పరిసనడ్ ఇనుఙ్ ఉత్తరం ప్రేమనడ్. ఇముంఙ్ దుక్ కతెంద్ ఇసా తోద్. ఇమ్మెనలడ్ అనుంఙ్ అనెకా మన్ ఇముంఙ్ ఒర్కితొద్ ఇదరెంఙ్ ఇసా అనఙ్ లహిప్తన్. 5 ఏరెనా దుక్కం కలాపెకద్ అన్డే, అముదు అనుంఙ్ తోద్, ఇనుఙ్ దుక్ కతెంద్. అన్ తె మన్దీయ్ ఎర్సెటా ఇమ్మత్తి కొన్సెం మందిఙ్ దుక్కమ్ ఏరెఙిడెద్. అమ్నత్తి కట్టిన్ ఇదరెకాద్ అనుంఙ్ మన్ తోతెద్. 6 ఇమ్మత్తి పెరెత్ మందీ అమ్నుఙి సిక్ససియ్తెంద్. అమ్నుఙ్ అద్ సిక్స ఏరద్

7 అమ్నున్ మాప్కత్ ఇమత్ సియెకద్. అనఙ్ ఇదర్సెటండె అముదు ఇంకా జాస్తి దుక్కమడ్ తిర్తెద్. 8 అమ్నున్ లోపాహా ఇమ్మత్తి అనెకా ప్రేమ్ అమ్నుఙ్ ఒర్కి ఎరెంఙ్ ఇదర్ ఇసా ఇడ్సనండాతుమ్. 9 నీర్ పరిక్సఙ్ ఇల్లెంఙ్ సాల్సతిరా తొదా ఇన్తడ్ ఓలెఙిసా, దెయ్యమ్నె అఙ్ఞ్ యలున్ అనిగ్నాయ్ వెలా సుమ్సరా తొదా ఇన్తద్ అదీ కలుర్, అన్ ఇగ్కా ఉత్తరం లహిప్తన్. 10 నీర్ మాప్ కత్తరున్ ఔరున్ మాప్కలసాత్. అన్ మాప్కత్తదున్, సత్తెముంఙ్ అన్ మాప్కలెకదెద్ ఎద్దెనా అన్త అన్డే అద్ ఇముంఙ్ సాటీ క్రీస్తు ఇడ్తదుఙ్ మాప్కత్తన్. 11 సైతన్నే కుట్ర నెడుఙ్ ఒర్కితొద్. అముదు నేండున్‍ పసిప్తెదవరెద ఇనంఙ్ ఇదర్తన్.