96
Huicatl para tijpaquilismacase Toteco
1 Nochi catli anitztoque ipan tlaltipactli,
xihuicaca para TOTECO.
Quena, xihuicaca se huicatl yancuic.
2 Ma tijhuicatica TOTECO por nochi catli quichijtoc.
Ma tijpaquilismacaca huan ma tijtlascamatica por nochi catli techchihuilijtoc.
Huan mojmostla ma titepohuilica para yaya temaquixtía.
3 Ipan nochi tlaltipactli ma titepohuilica ihueyitilis huan nochi tlamantli yejyectzi catli quichijtoc.
Huan nochi masehualme ma tiquinpohuilica nopa huejhueyi tlamantli catli yaya quichihua.
4 Pampa TOTECO nelía tlahuel hueyi huan quinamiqui ma tijhueyimatica.
San yaya nelía temajmati huan ne sequinoc catli masehualme quintocaxtíaj dioses, amo.
5 Pampa nochi nopa dioses catli quinhueyichihuaj ipan sequinoc tlalme,
amo tleno ininpati.
Inijuanti san elij teteyome catli masehualme quinchijchijtoque.
Pero TOTECO yaya quichijchijqui ilhuicactli.
6 Campa itztoc Toteco senquistoc onca itlatlanex huan temitoc ica ihueyitilis.
Huan ipan itiopa onca ichicahualis huan iyejyejca.
7 Nochi anmasehualme tlen nochi tlaltipactli,
xitepohuilica para san TOTECO quipiya chicahualistli huan san yaya hueyi.
8 Xijtlepanitaca TOTECO quen quinamiqui.
Xijhualiquilica tlacajcahualistli huan xiyaca icalixpa itiopa.
9 Xihualaca huan xijhueyichihuaca TOTECO.
Quena, xijhueyichihuaca ica se amonemilis catli yejyectzi huan tlatzejtzeloltic.
Huan nochi tlaltipactli ma huihuipica iixpa.
10 Xiquinpohuilica nochi tlalme para Toteco tlanahuatía.
Tlaltipactli quitlalijtoc cuali huan amo quema mijcuinis campa quitlatzquiltijtoc.
Huan Toteco Dios xitlahuac quintlajtolsencahuas nochi altepeme.
11 ¡Ma paqui ilhuicactli huan nochi tlaltipactli!
¡Nochi huejhueyi atl ma mocoxonica iixpa Toteco ica paquilistli!
12 ¡Ma paqui nopa cuatitlamitl huan nochi catli onca,
pampa nochi cuame quinextíaj para Toteco tlahuel hueyi!
Quena, ma tzajtzica nopa cuame para quipaquilismacase iixpa TOTECO,
13 pampa yaya huala.
Quena, yaya hualas para quitlajtolsencahuas catli itztoque ipan ni tlaltipactli.
Quena, quintlajtolsencahuas masehualme ipan nochi altepeme quen quinamiqui.
Quena, quema tetlajtolsencahuas,