1 Toteco Dios nelía cuali iyolo ica israelitame.

Quena, quinicnelía nochi catli quipiyaj tlapajpactic ininyolo.

2 San quentzi polihuiyaya para nihuetztosquía.

Noicxihua xitlaniyaya huan nechcatitoya para nimomimilos tlatepexico.

3 Quej nopa nielqui pampa amo niquijiyohui para amo niquixtocas quema niquitac quenicatza tlapijpiyayayaj nopa masehualme catli mohueyimatij huan catli tlaixpanoj.

4 Itztoque cuali ipan nochi ininnemilis,

huan amo mococohuaj.

5 Amo quinajsi tlaohuijcayotl niyon tequipacholi,

quen sequinoc quipiyaj.

6 Yeca quema mohueyimatij, quiitaj para yejyectzi quen se costli catli tlachijchihuali ica piltetzitzi catli pajpatiyo.

Huan quema quichihuaj catli amo cuali,

quiitaj quen ininyoyo catli yejyectzi.

7 Nopa tlaixpanoca masehualme ya quiijquisas iniixteyol pampa tlahuel motomajtoque,

huan ya quipixtoque nochi catli ininyolo quinequij.

8 Inijuanti san quihuetzquilíaj Toteco huan quintemajmatíaj imasehualhua.

Mohueyimatij quema camanaltij.

9 Fiero quitlaijilhuíaj Toteco Dios catli itztoc ipan ilhuicactli.

Huan quintelchihuaj catli itztoque ipan ni tlaltipactli.

10 Yeca Toteco Dios quinhualicas sempa nochi imasehualhua ipan ni inialtepe,

huan quipiyase miyac atl nochi inijuanti.

11 Huan quiijtose:

“¿Atlac Toteco quimatis tlaque pano?

¿Atlac Yaya Catli Más Hueyi quichihuilía cuenta catli pano nica?”

12 Xiquitaca, ni masehualme catli amo tleno quineltocaj amo tleno ininpati.

Quipiyaj se yejyectzi nemilistli huan tlatoctzitzi quimiyaquilíaj más inintomi.

13 ¡Amo tleno nechpalehuía para nijpiya noyolo tlapajpactli,

huan san tlapic nimocuatotonía para amo nijchihuas tlajtlacoli!

14 Pampa nochi se tonal nechtlatzacuiltíaj huan nechtlaijiyohuiltíaj sesen ijnaloc.

15 Sintla nicamanaltitosquía quen inijuanti,

huajca niquincajcayajtosquía nochi momasehualhua.

16 Quema nijnejqui nijmachili para tlen itztoque cuali nopa masehualme catli quicualancaitaj Toteco,

elqui tlahuel ohui para nijmachilis.

17 Pero se tonal nicalajqui ipan motiopa, Toteco Dios, para nimonejnehuilis tlen nopa tlamantli,

huan huajca nijmachili tlaque quinchiya.

18 Tiquintlalijtoc ipan se ojtli catli tlahuel alaxtic.

Quema tiquincuatopehuas,

huajca nimantzi huetzise ipan se hueyi ostotl huan nopona tzontlamise.

19 Quena, ica se tlatoctzi tlamis nochi ininpaquilis.

Huan itztose ipan majmajtli para nochipa.

20 ¡Nochi ininnemilis eltoc quen se temictli!

Quena, quen quema se cochtoc huan isatiquisas,

Toteco, quej nopa quema timotlananas huan tiquinhuejcamajcahuas.

21 Quema niquitac ya ni,

nelía tlahuel nicualanqui huan hasta nechcocohuayaya noyolo.

22 Pampa niquitac para tlahuel nihuihuitic nieltoya.

¡Hasta ninesiyaya moixpa quen se nitlapiyali catli amo quipiya itlalnamiquilis!

23 Pero masque ya ni nopantic, nochipa niitztoc mohuaya ta, Toteco,

huan techitzquijtoc ipan nomanejmac.

24 Huan nijmati para motlamachtil quisenhuiquilis nechyacanas ipan nochi nonemilis.

Huan teipa, quema nimiquis,

techselis nepa mochaj campa tlayejyectzi.

25 Amo aqui seyoc nijpiya nepa ilhuicac.

¡San ta, tinoTeco Dios!

¡Huan san ta nimitznequi ipan ni tlaltipactli huan amo aqui más!

26 Quemantic nimococohua huan nimotequipachohua.

¡Pero Toteco Dios yaya mocahua para nochipa!

Yaya quifuerzajmaca noyolo huan san yaya noaxca para nochipa.

27 Pero Toteco quintzontlamiltis nochi catli amo quinequij quihueyichihuase.

Quena, yaya quintzontlamiltía nochi catli quitlahuelcahuaj.

28 Pero na achi más nimonechcahuis campa Toteco Dios,

pampa ya nopa catli más cuali para na.

San ipan TOTECO nimotemachijtoc pampa yaya noTeco.

Huan niquinpohuilis nochime nochi nopa yejyectzi tlamantli catli yaya nechchihuilía.

<- SALMOS 72SALMOS 74 ->