7
TOTECO tetlajtolsencahua xitlahuac
1 TOTECO, ta catli tinoDios,
ipan ta nimotemachía para techmanahuis.
Techmaquixti ininmaco nochi catli nechtoquilijtinemij.
2 Nocualancaitacahua itztoque quen tecuanime huan sintla ta amo techmanahuis,
nechcocototzase huan amo aqui nechmaquixtis.
3 TOTECO, sintla nelía nijhuicasquía tlajtlacoli,
quinamiqui ma nechcualancaitaca.
4 Sintla nijcuepilijtosquía ica catli amo cuali se nohuampox catli cuali itztoya nohuaya,
huajca quena.
5 Sintla quej nopa nijchijtosquía,
huajca ma nechtepotztoca nocualancaitaca.
Ma nechajsiti huan ma nechhuahuatatza,
huan ma nechpinahualti,
pero amo aqui quej nopa nijchihuilijtoc.
6 Ximotlanana, TOTECO, ica cualantli.
Xicualani miyac ica nocualancaitacahua quen inijuanti nechcualancaitaj.
Ximoquetza tlajco campa tojuanti,
huan xiquinfuerzajhui ma nechchihuilica catli xitlahuac.
7 Se tonal masehualme tlen nochi tlalme mitzyahualojtose,
huan ta tiquintlajtolsencahuas campa timosehuijtoc ipan mosiya yejyectzi nepa ilhuicac.
8 Quena, TOTECO tiquintlajtolsencahuas nochi masehualme ipan nochi tlalme.
Huajca nojquiya techtlajtolsencahua na, TOTECO, ica catli cuali nijchijtinentoc.
Ta catli más tihueyi,
technextijtoc iniixpa nochi masehualme para amo nijpiya tlajtlacoli.
9 Ta, tiToteco Dios, catli titetlajtolsencahua xitlahuac.
Xijtlachili inintlalnamiquilis masehualme huan xijyejyeco catli quipiyaj ipan ininyolo.
Xijtlamilti catli quichihuaj nopa amo cuajcualme,
pero techchihua tielise titemachme tojuanti catli timonejnemiltíaj cuali moixpa.
10 Toteco Dios nechyahualohua para nechmanahuis.
Quinmaquixtía catli quipiyaj ininyolo xitlahuac iixpa.
11 Toteco Dios yaya se juez catli tetlajtolsencahua xitlahuac.
Mojmostla cualani ica amo cuajcualme.
12 Sintla se masehuali amo moyolcuepas,
Toteco Dios quitentis imachete para quitzontlamiltis.
Huan quicualtlalis icuahuitol catli ica quimictis.
13 Ya quicualtlalijtoc itlahuilanca teposhua huan quinhualica imaco para temictis.
Quipixtoc miyac cuatlamintli catli lementoque para tetzontlamiltis sintla amo moyolcuepaj.
14 Se masehuali catli amo cuali san quinequi tecocos,
huan san moilhuía catli fiero hueli quichihuas huan teipa icamaco quisa san istlacatili.
15 Se catli quichihua se ostotl para quimasiltis seyoc,
teipa ya huetzis campa tlaxajqui.
16 Quej nopa nojquiya ica catli fiero se masehuali quinchihuilía sequinoc,
teipa mocuepas ipan ya.
17 Pero na nijtlascamatis TOTECO pampa yaya xitlahuac.