59
Se netlatlajtili para Toteco ma quimanahui David
1 ¡NoTeco Dios, techmanahui ininmaco nocualancaitacahua!
¡Techmocuitlahui tlen inijuanti catli hualajtoque para nechtzontlamiltise!
2 ¡Techmanahui ininmaco tlajtlacolchijca masehualme,
inijuanti catli temictíaj!
3 Nechpijpiyaj para quiitase quenicatza nechmictise.
Masehualme catli quipiyaj chicahualistli nechchixtoque yahualtic.
Pero amo pampa niquinchihuilijtoc se tlamantli catli amo cuali
o pampa niquinixpanotoc.
4 ¡Amo! Amo tleno catli fiero niquinchihuilijtoc,
pero inijuanti mocualtlalíaj para nechmictise.
¡TOTECO, xiisa!
¡Xihuala techpalehuiqui!
5 TOTECO, Ta Catli Tijpiya Nochi Chicahualistli,
ta catli titoDios tiisraelitame,
ximotlanana huan xiquintlatzacuilti nopa tlalme campa itztoque masehualme catli amo israelitame,
pampa techyahualojtoque.
Amo xiquintlapojpolhui nopa masehualme catli mosisiníaj huan nimantzi tlaixpanoj.
6 Mojmostla ica tlapoyahui hualahuij para quitlachilise quenicatza huelis techtlanise.
Tzajtzitinemij quen chichime catli quiyahualojtinemij ni altepetl.
7 Nijcaqui camanaltij fiero hasta camaposonij,
huan mitztelchihuaj Toteco,
pampa inijuanti quiijtohuaj:
“Amo aqui techcaqui.”
8 Pero ta TOTECO, san xiquinhuetzquili,
huan xiquinpinahualti ni masehualme tlen sequinoc tlalme catli nechyahualohuaj.
9 NoTeco Dios, pampa nocualancaitacahua quipiyaj chicahualistli, ipan ta nimotemachis,
pampa ta catli techmanahuía.
10 NoTeco Dios, ta nochipa techicnelijtoc miyac,
yeca nijmati para temachtli techyacantiyas.
Tijchihuas ma niquitas catli tlahuel nijnectoc ma ininpanti nocualancaitacahua.
11 NoTeco, ta catli techmanahuía,
amo xiquinmicti nimantzi ni nocualancaitacahua,
pampa huelis ni nomasehualhua nimantzi quielcahuase catli ininpantis nopa mosisinijca masehualme.
Más cuali san xiquinsemana ica mohueyi chicahualis huan xiquinechcapantlali.
12 Quena, xiquintlatzacuilti pampa nochi inijuanti tlahuel istlacatij, mohueyimatij huan tlatelchihuaj.
13 Xiquintzontlamilti ica mohueyi cualancayo,
huan xiquintlamiixpolihuilti.
Huan quej nopa nochi masehualme quimatise para ta, Toteco Dios,
titlanahuatía ipan tlali Israel,
huan ipan nochi tlaltipactli.
14 Nocualancaitacahua mocuepaj ica tiotlac huan tzajtzij quen chichime,
huan quiyahualojtinemij ni altepetl.
15 Nentinemij campa hueli para quitemojtinemise inintlacualis.
Huan quema amo ixhuise,
tzajtzij seyohual quen chichime.
16 Pero na sesen ijnaloc nihuicas ica nopa chicahualistli catli techmaca.
Huan nimitzhueyimatis pampa techtlasojtla miyac.
San ta techmanahuía huan san ipan ta nimotemachía,
quema huala tlaohuijcayotl.
17 Toteco Dios, momaco ta niitztoc temachtli,
yeca nimitzhueyimatis huan nihuicas para ta,