57
Se netlatlajtili para Toteco ma quipalehui
1 Techtlasojtla, noTeco Dios, xijnexti motlaicnelilis noca na,
pampa san ipan ta nimotemachía para techmanahui.
Quen se pilpiyotzi motlatía ieltlapaltzala inana,
na nojquiya nimotlatía ipan ta hasta panos ni hueyi tlaohuijcayotl catli eltoc quen se hueyi ajacatl.
2 Nijtzajtzilis Toteco Dios Catli Más Hueyi.
Quena, nijnojnotzas Toteco Dios catli nochipa nechpalehuía ipan nochi tlamantli.
3 Tlen ilhuicac nechtitlanilía itlapalehuil para nechmaquixtis.
Yaya nechchololtis ininmaco nocualancaitacahua catli ica miyac cualantli nechtepotztocatinemij,
huan quinequij nechtzontlamiltise.
Pampa yaya Toteco Dios temachtli huan tlahuel nechicnelía.
4 Nechyahualojtoque masehualme catli mosisiníaj quen tecuanime.
Inincamanal eltoc quen tlitl catli quisa inincamaco.
Inintlancoch tlajtlatequi quen cuatlamintli huan ininnenepil tlatequi quen machete.
5 NoTeco Dios, nochi ma mitzhueyichihuaca ipan nochi ilhuicactli.
Mohueyitilis ma quitemiti ni tlaltipactli.
6 Nocualancaitacahua quitlalijtoque se tlaquetztli para ma nimasi,
yeca tlahuel nimajmahui.
Nojquiya quichijque se ostotl ipan ojtli para ma nimoostohui,
pero xiquita inijuanti huetzque nopona.
7 NoTeco Dios, ipan noyolo nipaqui huan nijpiya tlasehuilistli.
Huan yeca nimocualtlalijtoc para nihuicas huan nijsencahuas tiohuicatl para ta.
8 Na nimocualtlalía para nijtzotzonas noarpa huan noguitarra.
Cualca niisa para nimitztlatzotzonilis.
9 Na nimitztlascamatis iniixpa masehualme pampa ta, Toteco, techchihuilijtoc miyac tlamantli catli yejyectzi.
Huan nihuicas para nimitzhueyimatis iniixpa masehualme tlen nochi tlalme.
10 Motlaicnelijcayo nelhueyi quen ipatlajca ilhuicactli huan huejcapantic hasta quionpano mixtli.
Ta tlahuel titemachtli.
11 Toteco Dios, nochi ma mitzhueyichihuaca ipan nochi ilhuicactli.