3
Se netlatlajtili para Toteco Dios ma quipalehui
1 TOTECO, nelía momiyaquilíaj nocualancaitacahua.
Quena, nelmiyaqui motlananaj para nechhuilanase.
2 Miyaqui quiijtohuaj para ta amo quema techpalehuis.
3 Pero TOTECO, ta techyahualohua para techmanahuis.
Ta catli techhueyitlalía huan san ta catli tihueli techyolchicahua.
4 Chicahuac nimitztzajtzili, TOTECO,
para techpalehuis.
Huan ta technanquili hasta campa tionitztoc nepa ipan motepe catli tlatzejtzeloltic.
5 Yeca nimotejqui huan cuali nicochqui.
Huan quema niisac,
amo tleno nopantitoya pampa ta, TOTECO, techmocuitlahuía.
6 Ama ayacmo nechmajmatise masque majtlactli mil nocualancaitacahua nechyahualose para nechhuilanase.
7 Ximotlanana, TOTECO.
Techmaquixti, ta tinoTeco Dios.
Chicahuac xiquinmaquili nochi nocualancaitacahua ipan iniixayac.
Xiquintlanpojpostequi nopa mosisinijca masehualme,
para tlamis nochi ininchicahualis huan amo tleno huelis nechchihuilise.
8 San ta, TOTECO, hueli titemaquixtía.