28
Toteco quitlacaquilía quema timotlatlajtíaj
1 TOTECO, tinotlamanahuijca.
San ipan ta nimotlatía.
Ta catli nimitztzajtzilía techpalehuiqui.
Amo ximotlahuelnequi para technanquilis,
pampa sintla amo technanquilis,
san nimotemacas para ma nechmictica.
2 Xijcaqui nocamanal quema nimitztlajtlanía tlapalehuili.
Techchihuili cuenta quema nimomatlananas huan nijmelactlachilis mocaltiopa catli tlahuel tlatzejtzeloltic.
3 Amo techtlatzacuilti ininhuaya masehualme catli amo cuajcualme catli san quichihuaj catli amo monequi.
Inijuanti camanaltij yejyectzi ica sequinoc,
pero quipiyaj nochi catli amo cuali ipan ininyolo.
4 Xiquincuepili nochi catli amo cuali quichijtoque ica catli amo cuali nojquiya.
Xiquintlaxtlahui ica catli fiero san se quen fiero quinchihuilijtoque sequinoc.
5 TOTECO, inijuanti amo quichihuilíaj cuenta nochi catli tijchijtoc,
huajca tiquintzontlamiltis huan amo quema tiquintlananas sempa.
6 TOTECO, nimitzpaquilismacas pampa tijtlacaquilijtoc catli nimitztlajtlanijtoc.
7 TOTECO, yaya nochicahualis huan notlamanahuijca ica nochi catli mahuilili.
Ipan ya nimoneltemachijtoc huan nechpalehuijtoc,
yeca ipan noyolo nijpiya miyac paquilistli.
Nihuicas huan nimitztlascamatis, TOTECO.
8 TOTECO, ta tiquinpixtoc momaco nochi momasehualhua.
Yeca san ipan ta motemachía motlanahuatijca catli tijtlapejpenijtoc.
9 Xijmaquixti moaltepe, TOTECO.
Huan xiquintiochihua inijuanti catli moaxcahua.
Techmocuitlahui quen se quinmocuitlahuía ipilborregojhua.