1 NoTeco Dios catli nimitzhueyitlalía,

technanquili quema nimotlatlajtía ica ta,

amo san xitlacacto.

2 Pampa nopa tlajtlacolchijca masehualme nechejelnamiquij huan nechistlacahuíaj.

3 Inijuanti nechcualancaitaj huan nechyahualohuaj para nechilhuise camanali catli amo monequi.

Nechhuilanaj masque amo tleno niquinchihuilijtoc.

4 Na niquinicnelía huan nimotlatlajtía para tiquintiochihuas.

Pero masque ya nopa nijchihua,

noja más quichihuaj campica para nechtzontlamiltise.

5 Na niquinchihuilía catli cuali,

pero inijuanti nechtlaxtlahuíaj ica catli amo cuali.

Masque niquinicnelía, inijuanti nechcualancaitaj.

6 NoTeco, xiquintlali imaco se catli fiero.

Se catli quimati tetlatelhuía ma quinhuica iixpa se juez catli fiero para ma quintlajtolsencahua.

7 Huan quema ya quintlajtolsencajtose, xijchihua para nochi quimatise para quihuicaj tlajtlacoli.

Huan quema motlatlajtíaj, xiquita quen elisquía tlajtlacolchihuaj.

8 Nimitztlajtlanía para inemilis nocualancaitaca ma amo huejcahua ipan ni tlaltipactli.

Huan seyoc tlacatl ma quichihua nopa tequitl catli yaya quichihuayaya.

9 Iconehua ma mocahuaca icnotzitzi huan isihua ma mocahua cahuali.

10 Iconehua ma monejnencaquixtica huan ma motlaejehuijtinemica.

Ma quitemoca tlacualistli huejca tlen ininchaj catli ya tlamisosolijtoc.

11 Ma quitlamitlacuijcuilica catli quitlatlanejtiyayaj,

huan catli seyoc tlali ehuani ma quiquixtilica nochi catli quitlantoc ica itequi.

12 Amo aqui ma quipalehui ica niyon se tlamantli huan amo aqui ma quintlasojtla iconehua catli icnotzitzi.

13 Ma miquica nochi iconehua.

Ma tlamiixpolihuica huan ayacmo aqui ma quinelnamiqui inintoca.

14 TOTECO, amo xiquelcahua nochi inintlajtlacolhua itatahua huan inanahua.

Huan amo xiquintlapojpolhui.

15 Ma mocahua inintlajtlacolhua moixpa, TOTECO,

pero ayacmo aqui ma quinelnamiqui nopa masehualme ipan ni tlaltipactli.

16 Pampa inijuanti amo quinejque quipalehuise ininhuampox.

Nojquiya quintojtocaque catli teicneltzitzi huan quinmictijque catli motequipachohuayayaj.

17 Quinpactiyaya quintelchihuase ininhuampox.

Huajca ama ta nojquiya xiquintelchihua.

Amo quema quintiochijque sequinoc,

huajca ama nojquiya amo xiquintiochihua.

18 Nopa tlatelchihualistli tlahuel quinpactía pampa eltoc ipan nochi catli quichihuaj.

Tlatelchihuaj mojmostla quen mojmostla moquentíaj ininyoyo,

o quiijij atl o quicuaj se tlacualistli catli ajhuiyac.

19 Huajca ama ipani ma huetzi nopa tlatelchihualistli,

quen elisquía se yoyomitl catli quinpantzacuas o quen inintzinquechilpica.

20 Quej nopa, TOTECO, xiquintlaxtlahui nopa nocualancaitacahua catli nechistlacahuíaj,

huan catli quinequij nechmictise.

21 Pero TOTECO, ta catli tinoTeco,

techita na quen elisquía nimocone catli nijhuica motzonquisca.

Yeca techchololti imaco nocualancaitaca pampa ta titemachtli huan tinelcuali.

22 Na nitlaijiyohuía huan tlahuel monequi motlapalehuil,

Tlahuel nechcocohua noyolo.

23 Niyajtinemi para nimiquis huan nitlaijiyohuía quen se chapoli catli quitlahuiso se masehuali.

24 Notlancuaco ayacmo quipiya chicahualistli pampa tlahuel nimosajtoc.

Huan notlacayo ayacmo nacayo.

25 Nochi masehualme ipan tlaltipactli nechhuetzquilíaj.

Yeca nochi catli nechitaj quiojoliníaj inintzonteco huan nechpinajtíaj.

26 ¡TOTECO Dios, techpalehui!

¡Techmaquixti pampa ta tlahuel titetlasojtla!

27 Techmaquixti tlamiyacapa,

para nochi ma quimatica para ta catli tijchijtoc, TOTECO.

28 Huan teipa sintla nechtelchihuaj, amo tleno,

pampa ta techtiochihuas.

Sintla motlananase ica na,

mopinahuase,

huan na nijsenhuiquilis nimopaquilismacas,

pampa na nimotequipanojca.

29 Ma mopinahualtica tlamiyacapa inijuanti catli nechistlacahuíaj.

Quena, xiquinpinahualti.

30 Pero na tlatoctzitzi nijtlascamatis TOTECO,

huan nijpaquilismacas iniixpa nochi masehualme.

31 Pampa yaya itztoc ininhuaya catli teicneltzitzi para quinmanahuis ininmaco inincualancaitacahua.

<- SALMOS 108SALMOS 110 ->