105
Nopa huejhueyi tlamantli catli Toteco quinchihuili israelitame
1 Xijtlascamatica TOTECO por nochi nopa huejhueyi tlamantli catli yaya quichihua.
Xitepohuilica ipan nochi tlaltipactli catli yaya quichijtoc.
2 ¡Xijhuicatica!
Quena, xijhuicatica tiohuicatl.
Xitlacamanalhuica tlen nopa huejhueyi tiochicahual nextili catli yaya quichijtoc.
3 ¡Ximopaquilismacaca ipan Toteco!
¡Quena, xipaquica nochi amojuanti catli anquihueyichihuaj TOTECO!
4 Xijtemoca TOTECO huan ichicahualis.
Quena, nochipa xijtemoca para anquiiximatise más.
5 Xiquelnamiquica nopa tiochicahual nextili catli yaya quichijqui por amojuanti.
Xiquelnamiquica itlamachtil huan catli yaya quiijtojtoc.
6 Aniixhuihua Abraham catli itequipanojca Toteco,
huan amojuanti aniconehua Jacob catli Toteco quitlapejpeni,
xiquelnamiquica.
7 Yaya TOTECO huan yaya toDios.
Catli yaya tlanahuatijtoc para mochihuas, ya nopa monextía ipan nochi tlaltipactli.
8 Yaya amo quema quielcahuas nopa camanal sencahuali catli quichijqui,
masque tlacajtiyase masehualme huan ininconehua huan mil hueltas tlacatise ininteipan ixhuihua,
yaya amo quielcahuas.
9 Noja eltoc nopa camanal sencahuali catli quichijqui ica Abraham huan Isaac.
10 Teipa quiompahui nopa camanal sencahuali ica Jacob para ma pano ica nochi israelitame,
huan elis para inijuanti para nochipa.
11 Huan Toteco quiijto:
“Na nimechmacas nopa tlali Canaán para elis amoaxca para nochipa.”
12 Quinilhui ya ni quema inijuanti noja ayamo eliyayaj miyaqui,
huan san itztoyaj quen paxalohuani ipan tlali Canaán.
13 Teipa san panotinenque tlen se tlali hasta seyoc tlali,
huan tlen se tlanahuatilistli hasta seyoc tlanahuatilistli.
14 Pero ipan nochi nopa tlamantli Toteco amo quincahuili ma quinajsi se tlamantli catli amo cuali.
Huan tlanahuatiani catli quichijque campica para quinchihuilise catli fiero,
Toteco quintlatzacuilti.
15 Toteco Dios quinilhui:
“Amo xiquincuatotonica nomasehualhua catli niquintlapejpenijtoc,
niyon amo tleno xiquinchihuilica notlajtol pannextijcahua.”
16 Toteco quititlanqui se hueyi mayantli ipan tlali Canaán,
huan quinquixtili nochi tlamantli tlacualistli catli ica mopanoltiyayaj.
17 Pero teipa Toteco quititlanqui se tlacatl ma quintlayacancuili para quinmanahuis imasehualhua tlen nopa mayantli.
Quena, elqui José catli quinamacatoyaj para ma tequipanoti san tlapic ipan tlali Egipto.
18 Huan nepa ipan tlatzactli quimetzcocojque quema quimetzilpijque ica tepos cadena,
huan quiilpilijque se tepostli ipan iquechtla.
19 Nopona itztoya José hasta ajsic nopa tonali catli TOTECO quiixquetztoya.
Quena, Toteco quiyejyeco José para quiitas sintla cuali elqui ipan iyolo.
20 Huajca Faraón catli eliyaya hueyi tlanahuatijquetl, tlanahuati ma quiquixtica.
Huan quicajqui ma yohui majcajtoc.
21 Teipa nopa tlanahuatijquetl quitlali ma quinyacana nochi itequipanojcahua,
huan ma quimocuitlahui nochi catli quipixtoya.
22 Mocajqui ipan ya imax para quintlatzacuiltis itequipanojcahua catli más hueyi,
huan para ma quintlalnamicti catli huehuentzitzi.
23 Teipa Israel ajsico ipan tlali Egipto,
huan itztoya nopona ihuaya iconehua ipan tlali Cam.
24 Huan Toteco tlahuel quinmiyaquili iixhuihua Jacob,
huan quipixque más chicahualistli,
huan amo quen inincualancaitacahua catli quinnahuatiyayaj.
25 Teipa Toteco quinyolpatlac nopa egiptome,
huan quinchijqui ma quincualancaitaca nopa israelitame.
Quena, quincualancaitaque huan quinchihualtijque ma tetequipanoca san tlapic.
26 Pero teipa Toteco quititlanqui itequipanojca, Moisés,
huan Aarón catli yaya quintlapejpenijtoya.
27 Huan inijuanti quichijque huejhueyi tlanextilijcayotl huan tiochicahual nextili ipan tlali Egipto.
28 Quena, Toteco quititlanqui tzintlayohuilotl ipan nochi nopa tlali,
pampa amo quichihuilijque cuenta itlanahuatil para ma quincahuaca imasehualhua ma yaca majcajtoque.
29 Teipa quicuepqui estli nochi atl catli oncayaya ipan nopa tlali.
Huan nopa michime mijque.
30 Teipa quintitlanqui tlahuel miyac temasolime ipan nochi nopa tlali,
huan calajque hasta ipan nopa cuarto campa cochqui nopa tlanahuatijquetl.
31 Teipa quema Moisés camanaltic,
hualajque miyac sayolime.
Huan atime quitlapachocoj nopa tlali.
32 Nojquiya quintitlanili huejhueyi tesihuitl huan amo atl.
Huan tlapetlaniyaya campa hueli ipan nochi nopa tlali.
33 Huan nopa tesihuitl quinenpolo nochi xocomeca mili, huan higuera cuame,
huan quitlami pojpostejqui nopa huejhueyi cuame.
34 Teipa Toteco camanaltic huan ajsicoj tlahuel miyac chapolime,
hasta amo aqui hueliyaya quinpohua.
35 Huan quicuajque nochi tlamantli xihuime catli oncayaya ipan nopa tlali,
huan nojquiya quitlamicuajque nochi tlamantli pixquistli.
36 Teipa quinmicti nopa coneme catli achtihui tlacatque ipan sesen familia tlen tlali Egipto.
Quinmicti masque nopa tetajme tlahuel paquiyayaj huan motlepanitayayaj por nopa iniachtihui cone.
37 Huan Toteco quinquixti imasehualhua ica temachili,
huan quihuicaque miyac oro huan plata.
Huan ipan nopa tonali amo mococo niyon se imasehual Toteco.
38 Huajca nopa egiptome nelía pajque quema quisque nopa israelitame,
pampa nochi inijuanti tlahuel quinimacasiyayaj.
39 Toteco quipatlajqui inintzonatipa se mixtli para quinecahuilis huan amo quintlatis tonati.
Huan ica tlayohua quitlaliyaya se tlilelemectli inintzonatipa para ma quintlahuili.
40 Quitlajtlanijque ma quinmaca nacatl para quicuase,
huan quintitlanili solime.
Nojquiya quinmacac nopa tlacualistli catli itoca “maná” catli huetzqui tlen ilhuicac para ica ma ixhuica.
41 Toteco quitlapo se tetl huan quisqui atl hasta mochijqui quen se hueyatl,
catli motlalo ipan nopa huactoc tlali campa amo tleno eliyaya.
42 Pampa yaya quielnamijqui catli ica mocajtoya itequipanojca Abraham.
43 Huajca ica miyac paquilistli Toteco Dios quinquixti imasehualhua catli quintlapejpenijtoc ipan tlali Egipto.
44 Huan quinmacac imasehualhua nopa tlalme catli elque iniaxca masehualme catli amo israelitame.
Huan moaxcatijque ica nochi nopa pixquistli catli nopona oncayaya.
Quicuajque cuatlactli catli sequinoc quitoctoyaj.
45 Nochi ya ni quichijqui para ma quichijtinemica catli quinilhuijtoya huan ma quintoquilijtinemica itlanahuatilhua.