38
Icocolis Ezequías huan quenicatza mochicajqui
1 Huan ipan nopa tonalme, Ezequías quipixqui se cocolistli catli chicahuac huan ya itztoya para miquis. Huan na nitlajtol pannextijquetl Isaías, niicone Amoz, niyajqui nijpaxaloto huan niquilhui:
―Quej ni quiijtohua TOTECO: ‘Xijcualtlali nochi tlamantli ipan mochaj pampa amo timochicahuas tlen ni cocolistli.’
2 Huajca Ezequías mixijcuini huan tlachixqui ica campa tlapepecholi huan motlatlajti ica TOTECO, 3 huan quiijto: “TOTECO, na nimitztlajtlanía xiquelnamiqui quenicatza nelía nimitztequipanojtoc ica temachili huan nimonejnemiltijtoc ica noyolo xitlahuac huan nochipa nijchijtinentoc catli mitzpactía.”
Teipa Ezequías mochoquili ica miyac tequipacholi.
4 Huajca TOTECO sempa nechnojnotzqui niIsaías huan nechilhui, 5 ma niya huan niquilhuiti Ezequías quej ni: “TOTECO catli iTeco mohuejcapan tata David, quiijtohua ya ni: ‘Na nijcajqui quenicatza timotlatlajti huan niquitztoc quenicatza timochoquili. Huajca na nimitzmacas noja xiitzto seyoc 15 xihuitl. 6 Huan ta huan ni altepetl nimechmanahuis tlen nopa tlanahuatijquetl tlen tlali Asiria huan na nitlahuilanas por ni altepetl.’ ”
7 Huan na niIsaías niquijto:
―Ya ni nopa tlanextili catli mitzmatiltis TOTECO para mitznextilis melahuac quichihuas catli mitzilhuijtoc. 8 Quichihuas para iecahuilo tonati ma mocuepa majtlactli pasos ipan ireloj Tlanahuatijquetl Acaz.
Huan ne tonati mocuepqui majtlactli pasos catli ya panotoya.
9 Teipa quema Tlanahuatijquetl Ezequías mochicajqui tlen icocolis, quiijcuilo ni huicatl tlen nochi catli quipanoc:
10 San ninejnentoc tlajco tlen nochi nopa tonali tlen nonemilis huan ama monequi nijcajtehuas pampa nimiquis.
Ayacmo huelis nicaxitis noxihui quen monequiyaya.
Ama ya monequi niyas ipan nopa tlali tlen miquilistli.
11 Niquijto: “Ayacmo quema niquitas TOTECO ipan ni tlali campa itztoque catli yoltoque.
Ayacmo quema niquinitas nohuampoyohua catli itztoque ipan ni tlaltipactli.”
12 Nopa ajacatl ya quihuahuatatzqui nonemilis quen se ajacatl quihuica iyoyoncal se tlamocuitlahuijquetl tlen tlapiyalme.
Huan quen nopa tlajtzonquetl quitequi se icpatl, quej nopa nojquiya ni cocolistli quitequis nonemilis.
Nechtlaijiyohuiltía tlayohua huan tonaya.
13 Nitzajtziyaya seyohual por nopa tlacuajcualoli ipan notlacayo.
Hasta nijmachiliyaya quen elisquía se león nechpojpostequilía noomiyohua.
San se yohuali huan se tonali huan nimiquis.
14 Niayijtiyaya quen nopa tototl gruya huan quen nopa tototl golondrina.
Nitlaijiyohuiyaya quen se paloma.
Noixteyolhua nechcocohuayayaj pampa senquistoc nitlachixtoya nepa ilhuicac para nijchiyas itlapalehuil TOTECO.
Niquijtohuayaya: “¡NoTECO Dios, techpalehui!
Niitztoc ipan se hueyi tlaijiyohuilistli.”
15 ¿Pero tlaque huelis niquijtos?
TOTECO iseltzi nechmacac ni cocolistli.
Na ayacmo nimohueyimatis sempa por nochi nonemilis,
pampa ipan noyolo tlahuel nitlaijiyohuijtoc.
16 NoTECO Dios, nelía cuali nopa tlatzacuiltili catli techmacatoc,
pampa nechyacana ipan se nemilistli xitlahuac ica ta,
huan nechhualiquilía chicahualistli.
Ama techchicajtoc huan techchijtoc noja ma niitzto.
17 Quena, ni tlaijiyohuilistli catli hualajqui ipan na, ama nijmachilía para nelía cuali,
pampa ica ya nopa ta techmanahui tlen miquilistli,
huan ama ayacmo tijtlachiliya notlajtlacolhua.
18 Masehualme catli ya mictoque huan ya quintlalpachojtoque, ayacmo hueli mitzhueyichihuase.
Ayacmo quichiyaj para ta catli titemachtli tiquinpalehuis.
19 San quichiyaj inijuanti catli itztoque.
Quena, san inijuanti hueli mitzhueyichihuaj quen na nijchihua ama ni tonali.
Huan nochi tatame quinpohuilise ininconehua para ta nelía titemachtli.
20 TOTECO yaya techchicajqui.
Huajca ama mojmostla nihuicas ipan itiopa TOTECO miyac huicatl para nijhueyichihuas.
21 Achtihuiya na niIsaías niquinilhuijtoya itequipanojcahua Ezequías: “Xijtisica higos huan nopa higo tlatixtli xijpepecholica ipan icocohua Ezequías huan ica ya nopa mochicahuas.”
22 Nojquiya achtihuiya Ezequías tlatzintocatoya tlaque tlanextili quimacas TOTECO para quinextilis temachtli quichicahuasquía huan sempa huelis yas ipan itiopa.
<- ISAÍAS 37ISAÍAS 39 ->
