Ŋwa' wvù bó to saŋɛɛ ɛ̂

Bo'ibulu
Fiɛɛ fì nu ɛ̂ Ŋwa' Ibulu wvun e
Kɛ beene looci kee wee wvù to saŋɛɛ ŋwa' wvun kɛ, geenɛn ɛ beene kee lɛ bó to saŋ fô bonyii bo Klistu le bò nu Bo'ibulu. Bo'ibulu nu diee di Bojuu le dimew. Bó to saŋ keege lɛ Bojuu bò to nu ɛ lese wase fitele yî Klistu le emɛy kɛ eleeme yî dvú le, naa no boŋgɛw to cim too fô bó le jé le jé le. Ɛ̀ to nu tɛn keege ɛ́ bó ekiɛɛ lɛ moŋkan mo monfɛm mò Jisos to dvú kɛŋke mvuŋgay fele mo moyvuum. Bó to saŋ tɛn keetefe bó lɛ bó ekeè lɛ fiɛɛ fì Nyo' nu ɛ kaw bonyii dvú nu ɛ kɛ fí yaa nu ke esoy kuse kɛ. Bó nu ɛ duŋcɛ lɛ mwɛɛm mvù Klistu wvù Waa Nyo' nu ɛ to dvú fele mvu bonyii bo ntum Nyo' bo fwele le, njefo mvubole to nu kɛ lo binjiŋjiŋ, ɛ Klistu ɛ to wase bô mwɛɛm mvù ɛ̀ nu mvu kecɛɛy.
Bikuu bi mwɛɛm e ɛ̂ ŋwa' wvun e
1:1-3 Klistu looci nu wunte Nyo' kebɛɛ
1:4–2:18 Klistu fele bonceendaa bo Nyo' le
3:1–4:13 Klistu fele Muses bô Yoshua
4:14–7:28 Klistu nu cee ncese wvù fele bocee ncese bocii
8:1–9:28 Moŋkan mò Klistu to dvú fele mo moyvuum
10:1-39 Ncese wvù Klistu to geɛ fele boncese bocii
11:1–12:29 Ɛkumɛ keelese fitele yî Nyo' le
13:1-25 Ntefe wvu fokemɛse

Nyo' nu ɛ jeme wase ɛ̂ beene ɛ ɛ̀ nu diuw Waa we le

1 Ɛ̀ to shee nu fwele, ɛ Nyo' jemyi ɛ̂ bo'icee bosɛɛbeene dew bonyii bew bo ntum e bokaŋ e nteen bô ɛ̂ jé le jɛɛy jɛɛy. 2 [a]Geenɛn, ɛ̀ dioo nu ɛdiuw ɛyan yo fokemɛse le, wvú ɛ jeme wase ɛ̂ beene ɛ ɛ̀ nu diuw Waa we le. Ɛ̀ nu Waa we wvun wvù wvú nu ɛ gɛɛ lɛ wen nu ke enya fiɛɛ ficii can ye le ɛ́ wvú esaakè. Ɛ ɛ̀ nu wvú wvù Nyo' to bomɛɛ woŋ bô fiɛɛ ficii can ye le. 3 [b]N'yuu Nyo' lawkene yî ye le, ɛ wvú nu wunte Nyo' kebɛɛ. Ɛ̀ nu wvú wvù gee ɛ ɛbulɛ bô nshɛ sɛ nu dvú. Ɛ wvú gee ɛ ɛ̀ nu bô diɛw ye yì kɛŋke mvuŋgay e. Wvú to nu ɛ man bibefɛ bisɛɛbeene. No wvú man nonɛn mum ben we shii ɛ̂ ɛbo ke ɛcɛɛy ke Nyo' Bvukukɛ le.

Waa Nyo' kuuke fele bonceendaa bo Nyo' le

4 [c]Fí ɛ mum ɛ no nu lɛ Waa Nyo' kuuke naa baay fele bonceendaa bo Nyo' le, kɛ lɛŋlɛŋ no diee dì Nyo' teŋe wvú dvú kuuke naa tɛn baay fele dibole. 5 [d]Beene kee lɛ wvú kuuke lo njefo kɛ nceendaa Nyo' mvu nu dvú wvù Nyo' ke nu ɛ yuu wase gay ɛ̂ wvú lɛ,

“Wo nu Waa wɛm,

ɛ ɛbɛn nu ɛ me ɛ ŋgay wase lɛ me nu Ico” kɛ.

Ɛ kɛ mvu nu dvú wvù wvú ke nu ɛ yuu wase jeme ɛkumɛ wvú lɛ,

“Me nu ŋke enu Ice,

ɛ wvú nu Waa wɛm” kɛ.

6 [e]Ɛ̀ to nu kefew kè Nyo' to nu keetum Waa we wvu fwe wvun yî woŋ wvun e, ɛ wvú gay lɛ,

bonceendaa bowene bocii ewvumtè wvú.

7 [f]Ɛ fiɛɛ fì Nyo' to jemyɛɛ ɛkumɛ bonceendaa bew nu lɛ,

wen gee ɛ bó nu diɛwɛ fwefwe le,

gee tɛn ɛ bó bò nu bonyii bowene bo lemme le

nu diɛwɛ ɛlem ɛ ŋguy e.

8 [g]Ɛ dioo tu fô Waa we, ɛ wvú gay lɛ,

“O Nyo', wo nu ke eshii yî kawla wo le esaake sekecii sɛ ŋka.

Nce wvu teytey nu ke enu ketoome ke bvunfon bwuw e.

9 Wo kooŋke ɛ ɛ̀ nu fiɛɛ fi teytey, bane fì befe.

Nonɛn me wvù Nyo' wvù nu Nyo' wo

ɛ mum ɛ mbense wo ɛ nfey ŋgoo yo,

no me nu ɛ n'yefe wo bô nsusu bonfon yì ɛ̀ nu yi bvujoŋkɛ.”

10 [h]Ɛ wvú bvuu jeme tɛn ɛ̂ Waa we lɛ,

“Tata, ɛ̀ nu wo wvù to bomɛɛ nshɛ foŋkɛw,

ɛ mwɛɛm mvunciim mvù nu we nu lemme di ɛbo kuw e.

11 Mwɛɛm mvun nu ke eka, geenɛn ɛ́ eshɛɛ kɛ wo.

Mvú nu ke eyvumɛn diɛwɛ ndvú le.

12 Wo nu ke ekɛwe mvú diɛwɛ kekum e.

Mvú nu ke ekumɛn diɛwɛ no ndvu ké kpwe ncom.

Geenɛn wo nu ke emɛy kɛ nu no wo nu.

Kɛ bilum biuw nu ke eyuu eka kɛ.”

13 [i]Ɛ̀ nu nceendaa Nyo' mvu wvù la wvù Nyo' ke nu ɛ yuu wase gay ɛ̂ wvú lɛ,

“Shiilɛ ɛ̂ ɛbo kem ke ɛcɛɛy e,

egɛn ebuy kefew kè me nu ŋke enjike

bonyii buw bo bvuban e ɛ̂ wo ɛjise

diɛwɛ kedvuushɛɛ ke bikaa biuw e,

ɛ́ wo etome bikaa yî bó le?”

14 [j]Bonceendaa bo Nyo' le ban nu kɛ lo biyoy bì lemte Nyo' le, ɛ wvú tumte ɛ bí ghane fici bonyii bò nu ke ekɛŋkɛ mboyma.

Ibulu 2 ->