8
Jesús iloac teopexque tli tiechbiquelitze sente acuierdo yancuec tli cache cuale
1 Bieno pues, lo que tli cache importönte ica de noche lo que tli tequejtojtecate yaja ini nönca: Tetiepea nönca tlajtojcöteopexque, öque netlöliluc ompa elfecac ca tiemöyecmö de tietrono de Deus öque lalebes bieye hua checöhuac iloac. 2 Hua yejuatzi tequetihua de teopexque ipa inu nieca teopantle, quejtusneque de inu nieca melöhuac teocale tli Tlöcatzintle oquetlölejque, hua amo tlöcatl. 3 Noche tlajtojcöteopexque ica para tlabentlölis hua tiecuetlabiltis. Hua ejqueu conbenierebe que totlajtojcöteopexque nuyejque ma quepeacö tli tiecuetlabiltilus. 4 Hua tlö iloasquiöya necö ipan tlöltecpactle, abele iloasquea teopexque, pues oncate ocseque teopexcötzetzi para quetiecuetlabiltisque inu bentle san quiene ca quejtoa inu ley de Moisés. 5 Pero niecate teopexcötzetzi tequete ipa sente teocale tli ica quiename ixniehualo noso itunalsiejyo de inu melöhuac sösantle tli onca elfecac. Nenquelnömequesque que cuöc Moisés ye quepiehualtejtaya inu teocale, Deus quenahuatejque hua oquelfejque: “Xecpea cueröro para tecchihuas noche sösantle san quiene ca otemetzejtete necö pa munte”. 6 Pero totlajtojcöteopexque tequetihua ipa sente teocale cache lalebes cuale. Hua ejqueu nuyejque iloac representönte tli tiechbiquelitze sente acuierdo tli cache cuale, tli yebitz itech promiesas tli cache cuajcuale cate. 7 Pues tlö inu acuierdo tli oyeya cachto uyesquiöya intiero cuale, amo uyesquea nesesidad para ma huöla ocsente. 8 Pues cuöc Deus oquemajajuaque giente oquemelfejque ejqueyi:
Xequejtacö, que bitze tunalte, quejtulo Tlöcatzintle,
que necchihuas sente acuierdo yancuec para ca giente de Israel hua Judá.
9 Amo iyes quieme inu ocsente acuierdo tli onecchi inca intötajua,
ipa inu tunale cuöc nequemasec de inmö para nequenquexte de ipan tlöle de Egipto.
Pos yejua amo quesequirojque hua amo quecumplirojque inu acuierdo tli quepeaya ca naja,
hua naja onequentlabielcö, quejtulo Tlöcatzintle.
10 Öxö, yaja ini nönca acuierdo tli necchihuas ca inu giente de Israel
sötiepa de inun tunalte, quejtulo Tlöcatzintle.
Nectlölis nomandamientos ipa inpensamiento de yejua,
hua ipa inyulo nequejcuelus.
Hua neyes neinDeus de yejua,
hua yejua yesque nopuieblo de naja.
11 Hua amo öque quemachtis itlöcaicni,
nimpor amo quelfis icni: “Xetieixomate Tlöcatzintle”.
Ipampa innochtie niechixomatesque,
desde tli cache tzitzequetzi hasta tli cachtojyebe.
12 Hua nequenperdonörus de lo que tli amo cuale oquechijque,
hua de intlajtlacul ayecmo quiema nequelnömeques.
13 Cuöc quejtoa “yancuec acuierdo”, quejtusneque que ye soltec hua ayecmo serbirebe inu tli oyeya ca cachto. Hua lo que tli ye mochijteca soltec, ye miero pojpolebes.
<- Hebreos 7Hebreos 9 ->