Ibrani 10

Kristus madhe dhoka ca tèka di, sèna ka dhèu bisa mamuri pabeꞌa taruu dènge Ama Lamatua

1 Ladhe tareꞌa-reꞌa dhèu neo reꞌa mèu dadꞌèi Ama Lamatua, atora dhu Na pangèdꞌu asa bèi-baki èdhi sèra, dhae ledꞌa iia mèka. Te aaꞌi-aaꞌi se nuka sèmi sanabhu nèti jꞌara-jꞌara hua iia dhu Lamatua neo hia èdhi. De masi ka dhèu madhutu aaꞌi atora, aa rèti dènge badha korban taruu-taruu, te ngaa bisa boe saku pamèu sasala rèngu. 2 Te ladhe atora ne bisa tao eele sasala dhèu, na, rèngu rèti heka badha korban, lula rèngu rasa heka sala. Te ngaa sèmi boe èèna. 3 Te tèu mai-tèu mai rèngu manèngi pahari-pahari ho Ama Lamatua saku eele sasala ra, 4 lula, tatu boe raa badha dènge koasa, sèna ka saku eele sasala dhèu toke dꞌai mia-mia.

5-6 Nèti èèna ka, Kristus peka sèmi neꞌe, lodꞌo Na mai asa rai-haha ne, aku Nèngu na,

“Ama Lamatua!

Ama dꞌèi boe badha korban dènge mèdha persembahan dhu rèngu rèti.

Rèngu roro pamadhe badha ae-ae,

sèna ka jꞌajꞌi korban.

Ka rèngu tunu badha sèra,

ho manèngi abho.

Masi ka sèmi èèna, te ngaa dꞌara Ama karejꞌe boe.

Nèti èèna ka, Ama pua Jaꞌa mai asa rai-haha ne,

sèna ka jꞌajꞌi dhèu rai-haha sama sèmi rèngu.”

7 Hèia Kristus tuhu hari lii, aku Nèngu na,

“Ama! Jaꞌa ka neꞌe le!

Jaꞌa mai sèna ka tao madhutu dadꞌèi Ama,

nuka sèmi dhèu rèti lii padhai Ama dhu suri mema lula-nèti Jaꞌa.”✡

8 De dhu Kristus peka partama, nuka:

“Ama Lamatua karejꞌe boe dènge badha korban, aa mèdha persembahan dhu rèngu rèti.

Rèngu roro pamadhe badha ae-ae,

sèna ka jꞌajꞌi korban.

Hèia ra tunu badha sèra,

ho manèngi abho.

Te ngaa masi ka sèmi èèna, dꞌara Lamatua karejꞌe boe.”

De masi ka rèngu tao madhutu le pamèci dènge atora Musa, te ngaa dꞌara Ama Lamatua karejꞌe boe ciki sa. 9 Lodꞌo Kristus padhai lii, peka na,

“Jaꞌa mai, sèna ka tao madhutu dadꞌèi Lamatua.”

Sasoa na, Kristus mai sèna ka tao eele jꞌara dhui, ho gati dènge jꞌara hiu. 10 Te dadꞌèi Lamatua ka, Yesus Kristus jꞌajꞌi korban ho madhe dhoka ca tèka di hia èdhi dhèu rai-haha. Dènge jꞌara neꞌe, Na pamèu èdhi toke dꞌai mia-mia.

11 Bèli-bèli kètu agama rupa dhui pakako taruu sasabꞌa ra, aa roro pamadhe badha korban. Aa te ngaa korban se, dènge boe koasa sèna ka saku eele sasala dhèu.✡Kalua nèti Masir 29:38 12 Te ngaa Kètu Kapai Risi Agama èdhi, nuka Kristus, saraka ngiꞌu Na ho madhe sèna ka jꞌajꞌi korban hia èdhi. Nèngu jꞌajꞌi korban dhoka ca tèka èèna di. Dènge tao sèmi èèna, Na bhoke jꞌara sèna ka saku eele sasala èdhi dhèu rai-haha aaꞌi-aaꞌi ti. Èle èèna, heka Nèngu laꞌe madhèdi ètu baboa gꞌana Ama Lamatua, ètu era dhu kabꞌua risi eele. 13 Ètu era nèi, Na mate toke Ama Lamatua tao musu Na sèra mai pahaha iisi mi Nèngu.✡Lii Sodꞌa Koa-Kio 110:1 14 Korban Nèngu dhu ca tèka èèna, pamaꞌète eele koasa sasala-sasigo nèti dhèu dhu Kristus pamèu si.

15 Roh Ama Lamatua dhu Mola-Mèci peka jꞌara dhu sèmi èèna kahèi hia mi èdhi. Te Na padhai lii nèdhi, peka na,

16 “Lamatua miu peka sèmi neꞌe:

Jaꞌa paꞌèki lii pajaji hiu dènge dhèu unu Jaꞌa,

Jaꞌa tao atora Jaꞌa ètu dꞌara ngangee ra,

dènge suri paredha Jaꞌa ètu dꞌara ra.”✡

17 Hèia Na peka hari, na,

“Èèna na Jaꞌa sanèdꞌe heka sasala ra.

Aa Jaꞌa pabhèlu eele tatao rèngu dhu karehe,

lodꞌo rèngu sisu atora Jaꞌa.”✡

18 Sasoa na, ladhe Ama Lamatua saku eele le sasala dhèu, èèna na rèngu parluu heka rèti badha korban, sèna ka pamaho dꞌara Lamatua.

Èdhi madhaꞌu iia ka lati asa katanga madha Ama Lamatua

19 De sèmi neꞌe aꞌari aaꞌi-aaꞌi! Yesus pasuti le raa Na, sèna ka cuhi dꞌara Ama Lamatua. Nèti èèna ka, limuri ne èdhi madhaꞌu ia ka lati asa katanga madha Na ètu Era Na dhu Mola-Mèci ètu sorga. 20 Pangee ku Kama Luri Mola-Mèci dhu dhui èèna. Ètu era èèna, abhu bèla bhiri ca bèla dhu bhèla aae, dhu paꞌabhe sèna ka dhèu baku lasi asa katanga madha Ama Lamatua. Te ngaa dènge mamadhe Yesus èèna, Na bhoke jꞌara hiu, ho dhèu bisa padhai lii patoo madha dènge Ama Lamatua. 21 Risi-risi hari, Yesus jꞌajꞌi kètu agama dhu kapai risi, dhu uri dènge lalau-laloꞌo isi èmu Ama Lamatua. 22 De limuri ne èdhi dènge hak. Nèti èèna ka, mai ti maso ho padhai lii patoo madha dènge Ama Lamatua. Te ngaa èdhi hudꞌi parcaya Ne tareꞌa-reꞌa dènge dꞌara mola. Te mamadhe Yesus ka dhu pamèu le dꞌara èdhi, toke èdhi pangee heka jꞌara-jꞌara bhelu-katubꞌa. Aa èdhi hudꞌi mamuri mola, nuka sèmi ama agama rupa dhui sèra, hudꞌi diu ku èi, heka maso lasi pakako sasabꞌa Lamatua.✡ 23 Mai ho èdhi kèpe paꞌèra-èra kahèi, aaꞌi-aaꞌi dhu èdhi mangaku le lula-nèti Ama Lamatua. Aa èdhi hudꞌi sanao-maena mi Nèngu kahèi, aa pangee ia ka dhu leo, te tatu Na tao madhutu lii pajaji Na. 24 De mai èdhi patangi-tenge jꞌara ho pamako aꞌari èdhi dhèu parcaya sèra, sèna ka èdhi aaꞌi-aaꞌi ti padꞌelo sasue ae-ae, aa dènge tao rupa-rupa jꞌara dhu beꞌa. 25 Te jaꞌa tadèngi le, abhu dhèu cahagꞌe dhu roꞌo heka pakaboko dènge aꞌari ra dhèu parcaya. Te ngaa mage miu sèmi èèna! Te miu hudꞌi paꞌasu-pareo ku, ho paꞌèra dꞌara èci dènge èci. Risi-risi, lula lodꞌo mamai hari Lamatua dètu le. Pasanèdꞌe si sèmi èèna!

26 Aꞌari pasue! Èdhi teꞌa le toke lutu-sela, jꞌara-jꞌara Yesus Kristus dhu mola. Te ngaa ladhe èdhi soro kabodho mi Yesus, aa adꞌu-ue taruu sasala, sasoa na, abhu heka korban leo dhu bisa saku eele sasala èdhi. 27 Èdhi dhoka mate dènge dꞌara madhaꞌu, lula Ama Lamatua mai huku èdhi. Te ai naraka heo robhe-robhe le, ho pakèpu dhèu aaꞌi-aaꞌi dhu labꞌa Lamatua.✡Yesaya 26:11 28 Uru èèna, ladhe abhu ca dhèu dhu tule eele atora Musa, aa abhu dua do tèlu dhèu dhu jꞌajꞌi sakasii, na, dhèu èèna hudꞌi abhu huku madhe, hia boe ne abho.✡Lole Hari Jꞌara-jꞌara Mamuri 17:6, 19:15 29 Te ngaa limuri ne, ladhe abhu dhèu dhu pahahe Ana Ama Lamatua, èèna sama sèmi nèngu pakabꞌua boe raa Yesus dhu Na pasuti sèna ka pamèu dhèu èèna. Aa noꞌo boe paneꞌa dènge lii pajaji dhu Ama Lamatua paꞌèki dènge nèngu pake raa èèna ka. Aa nèngu tao Roh Ama Lamatua nasa kahèi. Te Roh èèna ka dhu padꞌelo le dꞌara hua iia Na mi nèngu. Pangee ku laa! Te dhèu sèmi neꞌe ne, tatu pasae nare hahuku dhu bia risi nèti dhèu dhu tule eele atora Musa.✡Kalua nèti Masir 24:8 30 Ama Lamatua peka nèdhi le, na.

“Jaꞌa dènge hak ho bꞌala bhelu-katubꞌa dhèu.

Aa tatu Jaꞌa hudꞌi tao ku madhutu sèmi èèna.”

Aa dhu suri kahèi, na,

“Lamatua ne, Ama.

Bèli-camèdꞌa Na huku dhèu unu Na.”✡

31 Sanèdꞌe te Ama Lamatua mamuri taa-taa! Dhèu tatu madhaꞌu titu kèna, ladhe Lamatua kèpe nare si!

32 Miu hudꞌi sanèdꞌe ku lodꞌo miu mulai meꞌa jꞌara-jꞌara Kristus, ka ngangee miu mulai mèu. Te lodꞌo èèna, masi ka miu dhoka muri ètu dꞌara sasusa dènge jꞌajꞌèra ae-ae, te ngaa miu taha dènge parcaya taruu Kristus. 33 Abhu dhu pamakae dènge pahahe miu ètu madha dhèu ae. Abhu kahèi dhu ra tao sèmi èèna mi angalai miu, dhèu parcaya sèra. 34 Miu rasa kasia aa padꞌelo dꞌara beꞌa mi dhèu dhu ra pamaso si asa dꞌara bèdho. Ladhe dhèu manaꞌu rèti mèdha-panyau miu, miu mau-mau sène, lula miu meꞌa, na, bèli-camèdꞌa miu abhu dhu beꞌa risi, dhu dhèu bisa heka manaꞌu rare. 35 Nèti èèna ka, miu hudꞌi kèpe paꞌèra-èra lalèka miu. Te èèna na Lamatua bꞌala hia miu, ae-ae. 36 De taha taruu! Te ladhe miu tao madhutu aaꞌi dadꞌèi Lamatua, èèna na miu abhu aaꞌi dhu Na jaji le hia miu. 37 Dhèu rèti lii padhai Lamatua suri le lula-nèti Dhèu dhu neo mai, peka na,

“Baku paroe dꞌara, te nèbhu boe, Dhèu dhu neo mai èèna, cèu,

aa Na pamate heka.

38 Dhèu dhu dꞌara mola,

èèna na nèngu abhu mamuri,

lula na parcaya Jaꞌa.

Te ngaa ladhe abhu dhèu dhu pakajꞌèu nèti Jaꞌa,

dꞌara Jaꞌa karejꞌe boe.”✡

39 Te ngaa èdhi, dhèu dhu pakajꞌèu boe nèti Ama Lamatua. Te dhèu dhu pakajꞌèu nèti Lamatua, bèli-camèdꞌa cèri eele nèti Nèngu. Te ngaa èdhi dhèu dhu parcaya Ama Lamatua. Ka Nèngu patabuli èdhi nèti koasa sasala-sasigo èdhi, ho mamuri taruu dènge Ne.

<- Ibrani 9 Ibrani 11 ->