1 Hèia Ama Lamatua pala-bagi berkat mi Noh dènge ana-ana na, peka na, “Miu matana paꞌae-ae, sèna ka papènu rai-haha ne. 2 Ladhe èèna na, badha hui, manu-bhui dènge iꞌa aaꞌi-aaꞌi ra madhaꞌu dènge miu. Miu ka dhu ator si. 3 Sisi badha aaꞌi-aaꞌi, miu bisa miꞌa, sèmi dhu miꞌa hua-hela, dènge rèu ana aajꞌu se. Aaꞌi-aaꞌi se, Jaꞌa hia miu.

4 Dhoka sisi dhu dènge raa era, miu madha mèu miꞌa, lula samanga badha ètu raa na. 5-6 Jaꞌa pajꞌajꞌi dhèu madhutu raropa Jaꞌa. Nèti èèna ka, baku pamadhe dhèu. Ladhe abhu dhèu, do badha, dhu pamadhe dhèu, na, pamadhe ne kahèi. Neꞌe, lii paredha nèti Jaꞌa. 7 Miu se hudꞌi matana paꞌae-ae ku, sèna ka papènu hari rai-haha ne.”

8 Ka Ama Lamatua tuhu hari lii padhai lii Na, 9 “De neꞌe ne, Jaꞌa pajaji dènge miu, toke dꞌai lai ana lai èpu. 10 Lii pajaji ne, lèke kahèi mi aaꞌi-aaꞌi dhu mamuri, sèmi: badha ani, badha hui, dènge manu-bhui. Peka ka laa, lèke aaꞌi-aaꞌi dhu kalua palere-lere dènge miu nèti dedha kapa. 11 Lii pajaji Jaꞌa sèmi neꞌe: Jaꞌa hia heka èi aae lala, ho pamadhe aaꞌi ngaa-ngaa dhu mamuri, aa dènge paꞌele iie rai-haha ne.

12-13 Jaꞌa pasa saroo ètu dedha-liru, sèna ka jꞌajꞌi tadha pasanèdꞌe lii pajaji Jaꞌa dhu maꞌète boe dènge miu, dènge aaꞌi-aaꞌi dhu mamuri, aa dènge rai-haha ne. 14-17 Ladhe abhu raꞌi-liru, ho saroo cèu, èèna na pasanèdꞌe Jaꞌa nèti lii pajaji èèna. Na peka na, èi aae paꞌele iie heka aaꞌi-aaꞌi dhu mamuri. Dènge jꞌara neꞌe ne ka, lii pajaji Jaꞌa dhu maꞌète boe, paꞌèki tèke le dènge miu, aa dènge aaꞌi-aaꞌi dhu mamuri.”

18 Ana-ana Noh dhu puru nèti dedha kapa, Sem, Yafet dènge Ham (Ham èèna, ama Kanaꞌan). 19 Dhèu aaꞌi-aaꞌi ra ètu rai-haha ne, jꞌajꞌi nèti ana Noh dhèu tèlu sèra.

20 Noh èèna, dhèu sabꞌa oka-tedhe. Nèngu ka dhu uru jꞌara tao oka anggor. 21 Ca tèka, na ninu èi anggor, ka na mahu titu kèna. Hèia na puru eele mèdha-papake nèti ua na. Ka na jꞌunu lega-loli dènge boe mèdha-papake ètu dꞌara paleo na. 22 Ropa Ham ladhe nèdhi era makae ama na, ka rai liꞌu laꞌe, lolo dènge aꞌa na, Sem dènge Yafet. 23 Hèia dua ra rare sigꞌi-kalolo ca bèla, ka ra bhoke mema ètu kabela-kao ra. Ka dua ra kako kabodho lasi asa dꞌara paleo ama ra, sèna ka ra pahutu mi ngiꞌu na. Dènge sèmi èèna, rèdhi boe era makae ama ra. Èle èèna ka, ra kalua sa liꞌu.

24 Ropa Noh maseꞌa, na neꞌa tatao nèti ana limuri na, Ham. 25 Ka na peka, aku nèngu na, “He! Ama Kanaꞌan! Jaꞌa dhoo èu! Èu ne, èèna na jꞌajꞌi ènu nèti aꞌa mu si!