1 Ngimethula kini udadewethu uFebhi, isikhonzikazi sebandla eKhenkireya. 2 Ngiyalicela ukuba limamukele eNkosini ngendlela efanele abangcwele njalo limsize ngakho konke angakuswela kini, ngoba laye ubelosizo olukhulu ebantwini abanengi, lakimi.

3 Bingelelani uPhrisila lo-Akhwila, abayizisebenzi kanye lami kuKhristu uJesu. 4 Babeka impilo yabo engozini ngenxa yami. Akusimi kuphela, kodwa wonke amabandla abeZizwe ayababonga kakhulu.

5 Bingelelani lebandla elihlanganela endlini yabo.

Bingelelani umngane wami othandekayo u-Ephenethasi, owaba ngowokuqala ukuphendukela kuKhristu esiqintini sase-Ezhiya.

6 Bingelelani uMariya owalisebenzela kanzima.

7 Bingelelani u-Andronikhasi loJuniyasi, izihlobo zami ezazisentolongweni kanye lami. Badumile phakathi kwabapostoli, njalo babekuKhristu mina ngingakabi khona.

8 Bingelelani u-Ampiliyathasi, engimthandayo eNkosini.

9 Bingelelani u-Abhanusi, oyisisebenzi kanye lathi kuKhristu, lomngane wami othandekayo uStakhisi.

10 Bingelelani u-Aphele, owahlolwayo wamukelwa kuKhristu.

Bingelelani labo abangabendlu ka-Aristobhulasi.

11 Bingelelani uHerodiyoni, isihlobo sami.

Bingelelani labo abasemzini kaNakhisu abaseNkosini.

12 Bingelelani uTrayifina loTrifosa, abesifazane labo abasebenza kakhulu eNkosini.

Bingelelani umngane wami othandekayo, uPhesisi, omunye owesifazane osesebenze kakhulukazi eNkosini.

13 Bingelelani uRufasi, okhethiweyo eNkosini, lonina, obengumama lakimi.

14 Bingelelani u-Asinkrithasi, loFilegoni, loHemesi, loPhathirobhasi, uHemasi kanye labazalwane abalabo.

15 Bingelelani uFilologu, loJuliya, loNerusi lodadewabo, kanye lo-Olimpasi labo bonke abangcwele abalabo.

16 Bingelelanani ngokwangana okungcwele.

Wonke amabandla kaKhristu ayalibingelela.

17 Ngiyalincenga, bazalwane, ukuba libaqaphele labo abadala ukwehlukana bebeka izikhubekiso endleleni yenu, okuphambene lemfundiso elayifundayo. Baxwayeni. 18 Ngoba abantu abanjalo kabakhonzi Nkosi yethu uKhristu, kodwa izinkanuko zabo. Ngenkulumo emnandi langobuqili bakhohlisa ingqondo zabantu abayiziphukuphuku. 19 Abantu bonke sebezwile ngokulalela kwenu, ngakho ngilokuthokoza okukhulu ngani; kodwa ngifuna ukuba lihlakaniphele okuhle, njalo libemsulwa kokubi.

20 UNkulunkulu wokuthula uzamchoboza masinyane uSathane ngaphansi kwezinyawo zenu.

Umusa weNkosi yethu uJesu kawube lani.

21 UThimothi, engisebenza laye, uyalibingelela, loLukhiyu, loJasoni kanye loSosiphatha, izihlobo zami.

22 Mina Thethiyasi, engilobe incwadi le, ngiyalibingelela eNkosini.

23 UGayiyasi, osiphatho sakhe esihle siyangijabulisa mina kanye lebandla lonke lapha, uyalibingelela.

U-Erastu, ongumqondisi wemisebenzi yabantu bonke wedolobho, lomzalwane wethu uKhwathu bayalibingelela.

[ 24 Sengathi umusa weNkosi yethu uJesu Khristu ungaba lani lonke. Ameni.]*Livesi kayikho kwamanye amaBhayibhili esiLungu.

25 Kuye olamandla okuliqinisa ngevangeli lami langentshumayelo kaJesu Khristu, mayelana lokwambulwa kwemfihlakalo eyayifihlakele okweminyakanyaka eyedlulayo, 26 kodwa khathesi yambulwe yaziswa ngemibhalo yabaphrofethi ngokulaya kukaNkulunkulu waphakade, ukuze abaZizwe bonke bamlalele ngokukholwa, 27 kuNkulunkulu onguye yedwa olenhlakanipho, udumo kalube kuye ingunaphakade ngoJesu Khristu! Ameni.

<- AbaseRoma 15