1 Ngabuya ngabona enye ingilosi elamandla isehla ivela ezulwini. Yayembethe iyezi kulomchilo wamakhosikazi ngaphezu kwekhanda layo; ubuso bayo babunjengelanga; imilenze yayo injengensika zomlilo. 2 Yayiphethe umqulu omncane, uvulekile usezandleni zayo. Yagxilisa unyawo lwayo lokwesokunene olwandle kwathi unyawo lwayo lwesokunxele lwaba semhlabathini 3 njalo yamemeza ngelizwi elikhulu njengokubhonga kwesilwane. Ekumemezeni kwayo imidumo eyisikhombisa yakhuluma. 4 Kwathi imidumo eyisikhombisa ikhuluma ngasengilungele ukuloba kodwa ngezwa ilizwi elavela ezulwini lisithi, “Vala lokho okutshiwo yimidumo eyisikhombisa njalo ungakulobi.”

5 Ingilosi engangiyibone imi olwandle lasemhlabathini yaphakamisela isandla sayo sokunene ezulwini. 6 Yafunga ngaye ophilayo kuze kube nini lanini, owadala amazulu lakho konke okukuwo, lomhlaba lakho konke okukuwo lolwandle lakho konke okukulo, yathi, “Kakusayikuba khona ukuphuza futhi! 7 Kodwa ngezinsuku lapho ingilosi yesikhombisa isizakhalisa icilongo layo imfihlakalo kaNkulunkulu izafezeka njengokutsho kwakhe ezincekwini zakhe abaphrofethi.”

8 Ilizwi engangilizwe livela ezulwini lakhuluma lami futhi lathi: “Hamba uyethatha umqulu ovulekileyo esandleni sengilosi emi olwandle lasemhlabathini.”

9 Ngakho ngaya kuleyongilosi ngacela ukuba ingiphe lowomqulu omncane. Yathi kimi, “Uthathe uwudle. Uzaqubula isisu sakho ngokubaba, kodwa emlonyeni wakho uzakuba mnandi njengoluju.”*UHezekhiyeli 3.3 10 Ngawuthatha umqulu omncane esandleni sengilosi ngawudla. Emlonyeni wami wanambitheka mnandi njengoluju, kodwa sengiwudlile isisu sami saqubuka, sababa. 11 Ngasengitshelwa ukuthi, “Kumele uphrofithe futhi ngabantu abanengi, langezizwe, langezindimi kanye langamakhosi.”

<- Isambulo 9Isambulo 11 ->