13
Umzekeliso Womhlanyeli
1 Ngalolosuku uJesu waphuma endlini wayahlala eceleni kwechibi.
2 Amaxuku abantu aminyezelana kuye waze wangena esikepeni wahlala kuso, abantu bonke bona babemi okhunjini.
3 Wasebatshela izinto ezinengi esebenzisa imizekeliso, wathi,
“Umlimi waphuma wayahlanyela inhlanyelo yakhe. 4 Kwathi eyihaza inhlanyelo, eyinye yawela endleleni, izinyoni zafika zayidobha yonke. 5 Eyinye yawela okhetheni lapho okwakungela mhlabathi owaneleyo. Yaphanga yamila ngoba umhlabathi wawungatshoni. 6 Kodwa kwathi ilanga seliphumile yahanguleka yabuna ngoba yayingelampande. 7 Eyinye yawela phakathi kwameva, asuka akhula ayiminya inhlanyelo. 8 Eyinye inhlanyelo yawela emhlabathini omuhle lapho eyathela khona izithelo eziphindwe okungabalikhulu, kumbe okungamatshumi ayisithupha loba okungamatshumi amathathu ukudlula leyo eyayihlanyelwe. 9 Lowo olendlebe kezwe.”10 Abafundi beza kuye bambuza bathi, “Kungani ukhuluma ebantwini ngemizekeliso na?”
11 Waphendula wathi, “Ulwazi lwemfihlakalo yombuso wezulu luphiwe lina hatshi bona. 12 Lowo olakho, uzaphiwa kwengezelelwe abesesiba lokunengi kakhulu. Lowo ongelakho, lalokho alakho uzakwemukwa. 13 Lokhu yikho okungenza ngikhulume kubo ngemizekeliso:
Ngoba loba bekhangele kababoni;
loba belalele kabezwa njalo kabaqedisisi.
14 Kubo isiphrofethi sika-Isaya siyagcwaliseka, esokuthi:
‘Lizahlala lisizwa kodwa lingaqedisisi;
lizahlala libona kodwa lingabonisisi.
15 Ngoba inhliziyo zalababantu sezaba lukhuni;
kabasezwa ngezindlebe zabo
njalo sebawavala amehlo abo.
Funa babone ngamehlo abo,
bezwe ngezindlebe zabo,
baqedisise ngezinhliziyo zabo,
baphenduke bese ngibasilisa.’* 16 Kodwa abusisiwe amehlo enu ngoba ayabona lezindlebe zenu ziyezwa. 17 Ngoba ngilitshela iqiniso ukuthi abaphrofethi abanengi lamadoda alungileyo balangazela ukukubona lokhu elikubonayo kodwa kabakubonanga, lokuzwa lokhu elikuzwayo kodwa kabakuzwanga.18 Lalelani-ke lizwe ukuthi utshoni umzekeliso womhlanyeli: 19 Nxa umuntu esizwa ilizwi ngombuso kodwa engabambisisi, omubi uyeza ahwithe lokho obekuhlanyelwe enhliziyweni yakhe. Yiyo le inhlanyelo eyahlanyelwa endleleni. 20 Inhlanyelo eyawela okhetheni ngumuntu olizwayo ilizwi aphange alamukele ngentokozo. 21 Kodwa ngenxa yokuthi kalampande, nxa okwesikhatshana kuphela. Nxa kufika uhlupho lokuhlukunyezwa ngenxa yelizwi uphanga akhubeke. 22 Inhlanyelo eyawela phakathi kwameva ngumuntu olizwayo ilizwi kodwa lisuke landelwe yizinhlupheko zale impilo lenkohliso yenotho, lingabe lisaba lezithelo. 23 Kodwa leyonhlanyelo eyawela emhlabathini ovundileyo ngumuntu olizwayo ilizwi alizwisise. Lo nguye othela izithelo ezinengi ngekhulu, ngamatshumi ayisithupha loba ngamatshumi amathathu okudlula lokho okwahlanyelwayo.”
Umzekeliso Wokhula
24 UJesu wabatshela omunye umzekeliso wathi,
“Umbuso wezulu unjengomuntu owahlanyela inhlanyelo enhle ensimini yakhe. 25 Kodwa kwathi ngesikhathi wonke umuntu elele, isitha sakhe seza sahlanyela ukhula phakathi kwengqoloyi, sahamba. 26 Kwathi ingqoloyi isikhahlele yabumba izikhwebu, ukhula lalo lwavela.27 Izinceku zomninisivini zeza kuye zathi, ‘Nkosi, kanti kawuhlanyelanga yini inhlanyelo enhle ensimini yakho na? Pho ukhula luvele ngaphi?’
28 Waphendula wathi, ‘Kwenziwe yisitha lokhu.’
Zambuza izinceku zathi, ‘Uyafuna yini ukuthi siyelusiphuna na?’29 Waphendula wathi, ‘Hatshi, ngoba lizakuthi lisiphuna ukhula liqabuke selisiphuna amabele kanye lalo. 30 Kuyekeleni kukhule ndawonye kuze kube yisikhathi sokuvuna. Lapho-ke, ngizakuthi kubavuni, Qalani ngokuqoqa ukhula lilubophe izinyanda ukuba lutshiswe, beseliqoqa amabele liwalethe esiphaleni sami.’ ”
Umzekeliso Wentanga Yemastadi Lemvubelo
31 Wabatshela omunye umzekeliso wathi,
“Umbuso wezulu ufana lentanga yemastadi eyathathwa ngenye indoda yayihlanyela ensimini yayo. 32 Lanxa incinyane kulentanga yenhlanyelo zonke, kodwa ithi ingakhula ibe yisihlahla esikhulu kulazo zonke, izinyoni zezulu zibuye, zithole ukuphumula ezingatsheni zaso.”33 Waphinda wabatshela omunye umzekeliso wathi, “Umbuso wezulu ufana lemvubelo eyathathwa ngowesifazane wayixubanisa lempuphu enengi, yabila yagcwala inhlama yonke.”
34 UJesu wakhuluma zonke lezizinto exukwini labantu ngemizekeliso; kazange akhulume lutho kubo engasebenzisanga umzekeliso. 35 Ngakho kwagcwaliseka okwakhulunywa ngomphrofethi ukuthi:
“Ngizavula umlomo wami ngemizekeliso,
ngizakutsho izinto ezifihliweyo selokhu kwadatshulwa umhlaba.”
† Umzekeliso Wokhula Uyachasiswa
36 Wasesuka exukwini waya endlini. Abafundi bakhe beza kuye bathi, “Sichazele umzekeliso wokhula ensimini.”
37 Waphendula wathi, “Lowo owahlanyela inhlanyelo enhle yiNdodana yoMuntu. 38 Insimu ngumhlaba njalo inhlanyelo enhle imele abantu bombuso. Ukhula lungabantu bomubi 39 njalo isitha esiluhlanyelayo nguSathane. Isivuno siyikuphela kwesikhathi njalo abavuni yizingilosi.
40 Njengalokhu ukhula lusitshunwa lutshiswe emlilweni, kuzakuba njalo ekupheleni kwesikhathi. 41 Indodana yoMuntu izathuma izingilosi zayo, zikhuphe konke okuyizikhubekiso embusweni wayo, labo bonke abenza ububi. 42 Zizabaphosela esihogweni somlilo ovuthayo okuzakuba khona ukukhala lokugedla kwamazinyo. 43 Lapho-ke, abalungileyo bazakhazimula njengelanga embusweni kaYise wabo. Lowo olendlebe, kezwe.”
Umzekeliso Wenotho Efihliweyo Lowephareli
44 “Umbuso wezulu unjengenotho efihliweyo esivandeni. Kwathi indoda isiyitholile yayifihla njalo, kwathi ngoba iphakathi kokuthokoza, yahamba yayathengisa konke eyayilakho yayathenga lesosivande.45 Njalo umbuso wezulu ufana lomthengi edinga amaphareli amahle. 46 Kwathi esefumene elinye elalilentengo ephezulu wahamba wayathengisa konke ayelakho walithenga.”
Umzekeliso Womambule
47 “Futhi umbuso wezulu ufana lomambule owehliselwa phansi echibini wagola zonke inhlobo zezinhlanzi. 48 Wathi usugcwele, abagoli bezinhlanzi bawudonsela okhunjini. Basebehlala phansi, baqoqela ezitsheni zonke inhlanzi ezinhle kodwa ezimbi bazilahla. 49 Lokhu yikho okuzakwenzakala ekupheleni kwesikhathi. Izingilosi zizakuza zehlukanise ababi kwabalungileyo, 50 zibaphosele esihogweni somlilo ovuthayo, lapho okuzakuba khona lokukhala kanye lokugedla kwamazinyo.”51 UJesu wababuza wathi, “Selizizwisisile zonke lezizinto na?”
Bathi, “Yebo.”
52 Wathi kubo, “Ngakho wonke umfundisi womthetho osephenduke waba ngumfundi wombuso wezulu unjengomnini wendlu okhupha esiphaleni sakhe amagugu amatsha lamadala.”
Umphrofethi Ongeladumo
53 UJesu eseqedile imizekeliso le wasuka lapho wahamba. 54 Wafika edolobheni lakibo waqalisa ukufundisa abantu esinagogweni labo, bamangala. Babuza bathi, “Indoda le yayithatha ngaphi inhlakanipho le lamandla la ayisimangaliso kangaka? 55 Kanti lo kayisiyo indodana yombazi na? Ibizo likanina kasuMariya na, labafowabo kakusiJakhobe, uJosefa, uSimoni loJudasi na? 56 Odadewabo kabakho lapha kanye lathi na? Pho indoda le yazizuza ngaphi izinto zonke lezi?” 57 Bakhubeka ngaye.
Kodwa uJesu wathi kubo,
“Umphrofethi kaladumo edolobheni lakibo lasendlini yakwabo.”58 Kasenzanga izimangaliso ezinengi khona ngenxa yokusilela kwabo ekukholweni.
<- UMatewu 12UMatewu 14 ->
- a U-Isaya 6.9-10
- b AmaHubo 78.2
