3
1 Yimi umuntu olubonileyo usizi
ngenxa yoswazi lokuthukuthela kukaThixo.
2 Ungixotshile, wangiphumputhekisa
emnyameni hatshi ekukhanyeni;
3 ngempela usengiphakamisele isandla sakhe,
waphindaphinda ilanga lonke.
4 Usenze ijwabu lami laluphala,
wangephula amathambo.
5 Ungihanqile wangihonqolozela
ngosizi langobunzima.
6 Ungenze ngahlala emnyameni
njengalabo abafa kudala.
7 Ungihonqolozele ngenqaba ukuze ngingaphunyuki;
ungibophe nko ngamaketane.
8 Kuthi lanxa ngimemeza loba ngidinga usizo,
awuvalele phandle umkhuleko wami.
9 Uvale indlela yami ngamatshe;
waphambukisa izindlela zami.
10 Njengebhele licathamile,
njengesilwane sicatshile,
11 wangihudulela eceleni kwendlela, wangifohloza,
wangitshiya ngingelamsizi.
12 Wadonsa idandili lakhe,
ngaba yikudla kwemitshoko yakhe.
13 Wangiciba enhliziyweni
ngemitshoko evela emxhakeni wakhe.
14 Ngaba yinhlekisa ebantwini bakithi bonke;
sengitshona ngiyingoma eyinhlekisa kubo.
15 Ungigqibe ngemithi ebabayo,
wanginathisa inyongo.
16 Ungihlafunise ukhethe ngamazinyo;
wangigiqa ebhuqwini.
17 Ngincitshiwe ukuthula;
angisakwazi ingabe iyini impumelelo.
18 Ngakho ngithi, “Sebuphelile ubucwazicwazi bami,
lakho konke engangikulindele kuThixo.”
19 Ngikhumbula ukuhlupheka lokuntula kwami,
ubumunyu lenyongo.
20 Konke ngikukhumbula kamhlophe,
umoya wami wephukile.
21 Kodwa ngikhumbula lokhu
ngibe lethemba:
22 Ngenxa yothando olukhulu lukaThixo kasibhujiswanga,
ngoba isihawu sakhe kasipheli.
23 Siba sitsha ukusa kwamalanga;
kukhulu ukuthembeka kwakho.
24 Ngiyazitshela ngithi, “UThixo uyisabelo sami;
ngakho ngizalindela yena.”
25 UThixo ulungile kulowo omethembayo,
kulowo omdingayo;
26 kuhle ukulinda ngokuthula,
ukulindela insindiso kaThixo.
27 Kuhle ukuthi umuntu alithwale ijogwe
ngesikhathi esesemutsha.
28 Kahlale yedwa ngokuthula,
ngoba uThixo ulibeke phezu kwakhe.
29 Kembele ubuso bakhe ethulini,
mhlawumbe ithemba lizakuba khona.
30 Kaphe isihlathi sakhe kulowo ofuna ukumhlankala,
agcwale ihlazo.
31 Ngoba uThixo kabalahli abantu
kuze kube nini lanini.
32 Loba engaletha ubuhlungu, uzatshengisa uzwelo,
lukhulu kakhulu uthando lwakhe olungapheliyo.
33 Ngoba kehliseli ukuhlupheka
losizi ebantwini ngokuthanda.
34 Ukuhlifiza ngezinyawo
zonke izibotshwa elizweni,
35 ukuncitsha umuntu amalungelo akhe
phambi koPhezukonke,
36 ukungahluleli kuhle,
kambe uThixo uyabe engaziboni izinto ezinjalo na?
37 Ngubani ongatsho ulutho lwenzakale
nxa lungavunyelwanga nguThixo na?
38 Akuveli emlonyeni woPhezukonke
ukuthi kuyehla inhlupheko lezinto ezinhle na?
39 Pho kungani umuntu ophilayo esola
nxa ejeziselwa izono zakhe na?
40 Kasilingeni njalo sihlole izindlela zethu,
sibuyele kuThixo.
41 Asiphakamiseleni inhliziyo lezandla zethu
kuNkulunkulu ezulwini sithi:
42 “Sonile sahlamuka,
njalo kawusithethelelanga.
43 Uzigubuzele ngolaka waxhumana lathi;
ubhubhisile ungelazwelo.
44 Uzisibekele ngeyezi
ukuze kungafinyeleli mkhuleko kuwe.
45 Usenze saba ngamanyala lengcekeza
phakathi kwezizwe.
46 Izitha zethu zonke zivule imilomo yazo
zezwakala zisihoza.
47 Sesihlukuluzwe yikuthuthumela lokukhilikithela,
ukudilika lokubhidlika.”
48 Imifula yezinyembezi iyajuluka emehlweni ami
ngoba abantu bakithi babhujisiwe.
49 Amehlo ami azajuluka kokuphela,
engelakuphumula,
50 UThixo aze akhangele phansi
esezulwini, angibone.
51 Engikubonayo kuthelela usizi emphefumulweni wami
ngenxa yabesifazane bonke bomuzi wakithi.
52 Labo ababa yizitha zami kungelasizatho,
bangizingela njengenyoni.
53 Bazama ukuquma impilo yami emgodini
bangijikijela ngamatshe;
54 amanzi asibekela ikhanda lami,
ngabona ukuthi okwami sekuphelile.
55 Ngalimemezela ibizo lakho, Oh Thixo,
ngisekujuleni komgodi.
56 Wezwa ukuncenga kwami: “Ungavali indlebe zakho
nxa ngikhalela ukwenyulwa.”
57 Wasondela lapho ngikumemeza,
wathi kimi, “Ungesabi.”
58 Oh Thixo, wasamukela isikhalazo sami;
wahlenga ukuphila kwami.
59 Ububonile Thixo, ububi obenziwe kimi.
Ngisekela kulobubunzima!
60 Usubonile ukujula kokusonga kwabo,
lamacebo abo wonke ngami.
61 Awu Thixo, uzwile inhlamba zabo,
wonke amacebo abo ngami,
62 ukunyenyeza lokungunguna kwabo ngami
ukusa kwamalanga.
63 Ake ubabone! Bahlezi kumbe bajamile,
bayangihleka ngezingoma zabo.
64 Awu Thixo, akubaphindisele ngokubafaneleyo,
ngalokho okwenziwe yizandla zabo.
65 Basibekele ngelembu ezinhliziyweni zabo,
isiqalekiso sakho sehlele phezu kwabo!
66 Xhumana labo ngolaka, ubabhubhise
ngaphansi kwamazulu kaThixo.