42
UJobe Uyaphendula
1 UJobe wasemphendula uThixo wathi:
2 “Ngiyazi ukuthi ungazenza zonke izinto;
kalikho icebo lakho elingavinjwa.
3 Ubuzile wathi,
‘Ngubani lo ovala iseluleko sami engelalwazi na?’
Ngeqiniso ngikhulumile ngezinto ebengingazizwisisi,
izinto ezimangalisayo engingeke ngizazi.
4 Wena uthe, ‘Lalela manje, mina ngizakhuluma;
ngizakubuza,
wena uzangiphendula.’
5 Indlebe zami zasezizwile ngawe
kodwa manje amehlo ami asekubonile.
6 Ngakho sengizeyisa,
sengiphenduka ngizilahla othulini lasemlotheni.”
Isiphetho Sendaba
7 Kwathi
uThixo esetshilo lezizinto kuJobe wathi ku-Elifazi umThemani, “Ngikuzondele wena kanye labangane bakho bobabili, ngoba kalikhulumanga ngami okulungileyo njengenceku yami uJobe.
8 Ngakho manje thathani inkunzi eziyisikhombisa lenqama eziyisikhombisa liye encekwini yami uJobe liyekwenza umnikelo wenu wokutshiswa. Inceku yami uJobe izalikhulekela, mina ngizawamukela umkhuleko wayo ngingaze ngalijezisa okufanele ubuthutha benu. Kalikhulumanga ngami okulungileyo njengenceku yami uJobe.”
9 Ngakho u-Elifazi umThemani, uBhilidadi umShuhi loZofari umNahama benza lokho abakutshelwa
nguThixo; njalo
uThixo wawemukela umkhuleko kaJobe.
10 UJobe esebakhulekele abangane bakhe, uThixo wamenza waphumelela njalo wamupha okunengi okuphindwe kabili kulokho ayelakho kuqala. 11 Bonke abafowabo labodadewabo kanye lobani owayemazi ngaphambili weza ukuzakudla laye endlini yakhe. Bamkhalela, bamzwela ngakho konke ukuhlupheka uThixo ayemehlisele khona, kwathi ngulowo lalowo wamupha ulutho lwesiliva kanye lesongo legolide.
12 UThixo wayibusisa impilo yokucina kaJobe ukwedlula eyokuqala. Waba lezimvu eziyizinkulungwane ezilitshumi lane, izinkulungwane eziyisithupha zamakamela, inkulungwane yezipani zenkabi labobabhemi abayinkulungwane. 13 Waphinda njalo waba lamadodana ayisikhombisa lamadodakazi amathathu. 14 Indodakazi yokuqala wayetha ibizo elithi Jemima, eyesibili yayinguKheziya, eyesithathu yaba nguKhereni-Haphutshi. 15 Kakuzange kube khona elizweni lonke abesifazane ababebahle njengamadodakazi kaJobe, njalo uyise wawabela ilifa kanye labanewabo.
16 Ngemva kwalokhu uJobe waphila iminyaka elikhulu lamatshumi amane; wababona abantwabakhe labantwababo kwaze kwaba yisizukulwane sesine. 17 UJobe wafa esemdala njalo eseluphele.
<- UJobe 41
