36
U-Elihu Uqhubeka Ekhuluma
1 U-Elihu waqhubeka esithi:
2 “Ake lingibekezelele okwesikhatshana ukuze ngilitshengise
ukuthi kunengi okumele kutshiwo ngobuhle bukaNkulunkulu.
3 Ngiluzuza kude ulwazi lwami;
ngithi ukwahlulela okulungileyo ngokukaMenzi wami.
4 Yiba leqiniso ukuthi amazwi ami aqinisile;
yena opheleleyo elwazini ulawe.
5 UNkulunkulu ulamandla, kodwa keyisi muntu;
ulamandla njalo katshedi ezimisweni zakhe.
6 Ababi kabayekeli bephila
kodwa abahluphekayo uyabapha okubafaneleyo.
7 Kawasusi amehlo akhe kwabalungileyo;
ubakhweza esihlalweni kanye lamakhosi
abaphakamise nini lanini.
8 Kodwa nxa abantu bebotshwe ngamaketane,
bethiwe nko ngezibopho zezinhlupheko,
9 uyabatshela lokho abakwenzileyo,
ukuthi benze isono ngokuziphakamisa.
10 Ubenza balalele ukuqondiswa
abalaye ukuthi baphenduke ebubini babo.
11 Nxa bemlalela bamkhonze,
zonke insuku zabo eziseleyo zizaphumelela,
leminyaka yabo ibe ngeyokusuthiseka.
12 Kodwa nxa bengalaleli,
bazabhubha ngenkemba,
bafe bengelalwazi.
13 Abangamesabiyo uNkulunkulu bagodle ukusola enhliziyweni;
loba angaze ababophe kabaceli ukusizwa.
14 Bafa besesebatsha,
bephakathi kweziphingi ezingamadoda,
ezihlala ezindaweni zokukhonzela.
15 Kodwa labo abahluphekayo
uyabakhulula ekuhluphekeni kwabo;
ukhuluma labo besezinkathazweni zabo.
16 Uyakulimukisa ukuthi uphume emihlathini yosizi
uye endaweni ebanzi,
ekhululekileyo njalo engelazibopho,
ebumnandini betafula yakho igcwele izidlo ezimnandi.
17 Kodwa manje usindwa yikwahlulelwa okulungele ababi;
ukuthonisiswa lokwahlulelwa ngokulunga
yikho osekukuduba.
18 Qaphela kungabikhona okulingayo ngenotho;
ungavumeli ukuthengwa ngemali kukususe endleleni.
19 Kambe inotho yakho loba konke ukutshikatshika kwakho
kungakusekela ukuze ungangeni osizini na?
20 Ungalangazeleli ubusuku,
ukuze uyohudula abantu ezindaweni zabo.
21 Qaphela ungangeni kokubi,
okukhanya ingathi uyakuthanda kulokuhlupheka.
22 UNkulunkulu uphakeme ngamandla akhe.
Ngubani ongafundisa njengaye na?
23 Ngubani omisele izindlela zakhe na,
loba othe kuye, ‘Usuwenze okungalunganga?’
24 Khumbula ukukhulisa umsebenzi wakhe,
abantu abawudumisileyo ngengoma.
25 Bonke abantu jikelele bakubonile lokhu;
abantu bakukhangela bemi khatshana.
26 Ubukhulu bukaNkulunkulu bungaphezulu kokuzwisisa kwethu!
Iminyaka yakhe ingezake yaziwe.
27 Uyawadonsa amathonsi amanzi,
aqulungane abe lizulu elingena ezifuleni;
28 amayezi athulula amanzi awo
kune izulu elikhulu ebantwini.
29 Ngubani ongakuzwisisa ukuthi uwendlala njani amayezi na,
ukuthi ukhwaza njani esesiqongweni sakhe na?
30 Ake libone ukuthi uwuhlakaza njani umbane wakhe azizingelezele ngawo,
abhukutshe ezinzikini zolwandle.
31 Yiyo indlela abusa ngayo izizwe
aziphe ukudla okunengi.
32 Ugcwalisa izandla zakhe ngombane
awukhombise lapho omele utshaye khona.
33 Ukuduma kwakhe kubika isiphepho esizayo;
lenkomo ziyatshengisa ukuza kwaso.”