35
U-Elihu Uqhubeka Ekhuluma
1 U-Elihu wasesithi:
2 “Ukhumbula ukuthi lokhu kulungile yini?
Uthi, ‘Ngizagezwa nguNkulunkulu.’
3 Kodwa uyambuza uthi, ‘Kungisiza ngani lokhu na,
njalo ngizuzani ngokungenzi isono?’
4 Ngithanda ukukuphendula
kanye labangane bakho abalapha.
5 Ake ukhangele emazulwini ubone;
khangela amayezi aphakeme kangaka ngaphezu kwakho.
6 Ungaze wenze isono, lokho kumthinta ngani na?
Nxa izono zakho zizinengi, kwenzani lokho kuye na?
7 Nxa ulungile, kuyini omnika khona wena na,
kumbe yena wamukelani esandleni sakho?
8 Ububi bakho bulimaza kuphela umuntu onjengawe,
lokulunga kwakho kuthinta amadodana abantu kuphela.
9 Abantu bayakhala ngomthwalo wokuncindezelwa;
bacela ukuphunyuzwa ezingalweni zalabo abalamandla.
10 Kodwa kakho othi, ‘Ungaphi uNkulunkulu uMenzi wami na,
opha amahubo ebusuku,
11 osifundisayo thina kulezinyamazana zalapha emhlabeni
asenze sihlakaniphe kulezinyoni zasemoyeni?’
12 Kaphenduli nxa abantu bebiza
ngenxa yokuziphakamisa kwababi.
13 Ngempela uNkulunkulu kakulaleli ukuncenga kwabo kwamanga;
uSomandla kayilaleli into enjalo.
14 Kuzakuba njani pho, angakulalela
nxa usithi kawumboni,
usithi indaba yakho iphambi kwakhe
ngakho kuzamele ulinde yena,
15 njalo futhi, ukuthi ulaka lwakhe kalujezisi
njalo akabunanzi lakancane ububi.
16 Yikho uJobe evula umlomo wakhe ekhuluma ize;