27
Amazwi KaJobe Okucina Ebanganini Bakhe
1 UJobe waqhubeka ngenkulumo yakhe wathi:
2 “Ngifunga ngoNkulunkulu ophilayo,
ngubani ongithathele ilungelo lami lokwahlulelwa ngokulunga,
uSomandla, ongizwise ubuhlungu bomphefumulo,
3 nxa ngilokhu ngiselempilo ngaphakathi kwami,
umphefumulo kaNkulunkulu usemakhaleni ami,
4 izindebe zami kazisoze zikhulume ububi,
lolimi lwami kaluyikukhuluma inkohliso.
5 Kangisoze ngivume ukuthi lina lilungile ngelikutshoyo;
ngizaze ngiyekufa ngingabulandulanga ubuqotho bami.
6 Ngizakugcina ukulunga kwami ngingakuyekeli;
umzwangedwa wami kawuyikungihlupha empilweni yami.
7 Sengathi izitha zami zingaba njengababi,
abaxabana lami babe njengabangaqondanga!
8 Ngoba ulethemba bani ongakholwayo nxa esefile,
uNkulunkulu angathatha impilo yakhe na?
9 UNkulunkulu uyakulalela yini ukukhala kwakhe
nxa usizi lumehlela na?
10 Uzakuthola yini ukuthokoza kuSomandla?
Uzacela kuNkulunkulu sonke isikhathi na?
11 Ngizalifundisa mayelana lamandla kaNkulunkulu;
izindlela zikaSomandla kangiyikuzifihla.
12 Lonke lizibonele lokhu ngokwenu.
Pho, ngeyani inkulumo yonke le eyize na?
13 Nansi isabelo uNkulunkulu asiqumela ababi,
ilifa elemukelwa ngumuntu olesihluku sivela kuSomandla:
14 Loba bebanengi njani abantwabakhe, isabelo sabo yinkemba;
lenzalo yakhe kayisoze lanini izuze ukudla okwaneleyo.
15 Isifo esibi sizabangcwaba labo abatshiywa nguye besaphila,
labafelokazi babo kabayikubalilela.
16 Lokuba angaze abuthelele isiliva njengothuli
lezigqoko zibe yinqwaba njengodaka,
17 lokho akubuthelelayo abalungileyo bazakugqokela,
labangelacala bazakwaba isiliva sakhe.
18 Indlu ayakhayo injengesidleke sobulembu,
njengedumba elenziwe ngumlindi.
19 Uthi esiyalala enothile, kodwa kasayikuphinda njalo;
uthi esevula amehlo, konke sekuphelile.
20 Utshaywa luvalo kungathi ufuqwa yisikhukhula;
isiphepho siyamhwitha ebusuku.
21 Umoya wempumalanga udlula laye, anyamalale;
uyamkhukhula endaweni yakhe.
22 Utshaya phezu kwakhe ngesihluku
esithi uyabaleka ecambalele evika amandla awo.
23 Utshaya izandla umhleka ulunya