26
Ingoma Yokubonga
1 Ngalolosuku ingoma le izahlatshelwa elizweni lakoJuda:
Siledolobho eliqinileyo;
uNkulunkulu wenza ukusindisa
kube yimiduli yalo lezivikelo.
2 Vulani amasango
ukuze isizwe esilungileyo singene,
isizwe esigcina ukuthembeka.
3 Lizamemeza abe lokuthula okupheleleyo
lowo olengqondo ebambelelayo,
ngoba wethemba kuwe.
4 Thembani uThixo kokuphela,
ngoba uThixo, uThixo ngokwakhe, uliDwala laphakade.
5 Ubehlisela phansi abahlala engqongeni;
ulehlisela phansi idolobho eliphakemeyo,
ulidilizela emhlabathini,
aliphosele phansi othulini.
6 Inyawo zilinyathelela phansi,
inyawo zabancindezelweyo,
amanyathelo abayanga.
7 Indlela yabalungileyo iqondile;
awu wena oQotho,
wenza indlela yabalungileyo ibe butshelezi.
8 Yebo, Thixo, sihamba endleleni yemithetho yakho,
siyakulindela;
ibizo lakho lodumo lwakho
kulangathelelwa zinhliziyo zethu.
9 Umphefumulo wami uyakulangazelela ebusuku,
ekuseni umoya wami uyakukhumbula.
Lapho ukwahlulela kwakho kufika emhlabeni,
abantu basemhlabeni bayakufunda ukulunga.
10 Lanxa ababi betshengiswa umusa,
kabakufundi ukulunga;
laselizweni lokulunga baqhubeka besenza okubi,
bengabunaki ubukhosi bukaThixo.
11 Oh Thixo, isandla sakho siphakanyiselwe phezulu,
kodwa kabasiboni.
Babonise ukutshisekela kwakho abantu bakho bayangiswe;
umlilo olungiselwe izitha zakho kawubaqede.
12 Thixo, usilethela ukuthula;
konke esesikufezile sikwenzelwe nguwe.
13 Oh Thixo, Nkulunkulu wethu, amanye amakhosi ngaphandle kwakho ake asibusa,
kodwa ibizo lakho yilo lodwa esilidumisayo.
14 Khathesi asafa, kawasaphili;
imimoya leyana eyahambayo kayivuki.
Wawajezisa, wawatshabalalisa;
wesula konke ukukhunjulwa kwawo.
15 Usandisile isizwe, Oh Thixo;
usandisile isizwe.
Uzilethele udumo;
uyiqhelisile yonke imikhawulo yelizwe.
16 Thixo, beza kuwe ekuhluphekeni kwabo;
kwathi lapho usubajezisile
banelisa ukunyenyeza umkhuleko.
17 Njengowesifazane okhulelweyo lapho esezabeletha
uyabhinqika ekhaliswa yibuhlungu,
lathi sabanjalo phambi kwakho, Oh Thixo.
18 Sasikhulelwe, sabhinqika ebuhlungwini,
kodwa sazala umoya.
Kasilethanga nsindiso emhlabeni;
kasibazalelanga lutho abantu basemhlabeni.
19 Kodwa abafileyo bakho bazaphila Thixo,
imizimba yabo izavuka.
Lina elihlala othulini,
vukani lihlabelele ngentokozo.
Amazolo enu afana lamazolo ekuseni;
umhlaba uzabaveza abafileyo bawo.
20 Hambani bantu bami, ngenani ezindlini zenu,
lizivalele phakathi;
lizifihle okwesikhatshana
ulaka lwakhe luze luphele.
21 Khangelani, uThixo uyaphuma lapho ahlala khona
ukuba ajezise abantu basemhlabeni ngenxa yezono zabo.
Umhlaba uzaveza igazi elachithwa kuwo;