15
Ingoma KaMosi LoMiriyemu
1 Ngakho uMosi labako-Israyeli basebehlabelela lelihubo kuThixo:
“Ngizamhlabelela uThixo
ngoba uphakeme kakhulu.
Ibhiza lomgadi walo
ukuphosele ngamandla olwandle.
2 UThixo ungamandla ami lehubo lami;
useyikusindiswa kwami.
UnguNkulunkulu wami, ngizamdumisa;
uNkulunkulu kababa ngizamphakamisa.
3 UThixo ulibutho;
nguThixo ibizo lakhe.
4 Izinqola zikaFaro lempi yakhe
ukuphosele ngamandla olwandle.
Izikhulu zikaFaro ezithenjiweyo,
zigalule oLwandle oluBomvu.
5 Inziki zamanzi zibagubuzele;
batshona ekujuleni njengelitshe.
6 Isandla sakho sokunene, Oh Thixo,
saba lamandla obukhosi.
Isandla sakho sokunene, Oh Thixo,
sasihlikiza isitha.
7 Ebukhulwini bobukhosi bakho
wabasakazela phansi abakuphikisayo.
Wavulela ulaka lwakho oluvuthayo,
lwabatshisa njengencwathi.
8 Ngokuphefumula kwamakhala akho
amanzi aqoqana aba yinqwaba.
Amanzi ageleza ngenhlokomo ema enza udonga;
amanzi azikileyo ajiya enzikini yolwandle.
9 Isitha sakloloda sathi,
‘Ngizabaxhuma, ngibedlule.
Ngizakwaba impango;
ngizazitika ngokungokwabo.
Ngizakhokha inkemba yami,
isandla sami sibabhubhise.’
10 Kodwa wena wavuthela ngomoya wokuphefumula kwakho,
ulwandle lwabasibekela.
Batshona njengomnuso
emanzini esabekayo.
11 Ngubani kubonkulunkulu bonke
onjengawe, Thixo?
Ngubani onjengawe,
olobukhosi ebungcweleni bakhe,
owesabekayo ngenkazimulo,
owenza izimangaliso?
12 Welula isandla sakho sokunene
umhlabathi uziginye izitha zakho.
13 Ngothando lwakho olungapheliyo uzabahola
abantu obahlengileyo.
Ngamandla akho uzabaholela
endaweni yakho engcwele.
14 Izizwe zizakuzwa zithuthumele;
umhedehede ubahlukuluze abantu baseFilistiya.
15 Izinduna zase-Edomi zizatshaywa luvalo,
abakhokheli baseMowabi bafikelwe yikwesaba,
abantu baseKhenani banyamalale nya!
16 Ukwesaba lokuthuthumela kuzabehlela.
Ngamandla engalo yakho,
bazathula njengelitshe,
abantu bakho baze bedlule, Oh Thixo,
abantu owabadalayo baze bedlule.
17 Uzabangenisa ubahlanyele
entabeni yelifa lakho,
indawo, Oh Thixo,
owayenzela ukuthi uhlale kuyo,
indawo engcwele, Oh Thixo,
eyamiswa ngezandla zakho.
18 UThixo uzabusa
kuze kube nini lanini.”
19 Kwathi lapho amabhiza kaFaro, izinqola kanye labagadi bamabhiza sebengenile olwandle, uThixo wawabuyisa amanzi alo phezu kwabo, kodwa abako-Israyeli bona bazihambela badabula ulwandle phezu komhlabathi owomileyo. 20 Khonapho uMiriyemu umphrofethikazi, udadewabo ka-Aroni, wathatha isigubhu sakhe ngesandla, bamlandela bonke abesifazane bephethe izigubhu begida. 21 UMiriyemu wabahlabelela wathi:
“Mhlabeleleni uThixo
ngoba uphakeme kakhulu.
Ibhiza lomgadi walo
ukuphosele ngamandla olwandle.”
Amanzi EMara Le-Elimi
22 UMosi wasebahola abako-Israyeli basuka oLwandle Olubomvu baya enkangala yeShuri bengatholi manzi. 23 Kwathi befika eMara behluleka ukunatha amanzi akhona ngoba ayebaba. (Yikho indawo leyo kuthiwa yiMara.) 24 Abantu basebekhonona kuMosi besithi, “Sinatheni-ke manje?”
25 UMosi wasekhala kuThixo, uThixo wasemtshengisa isigojwana. Wasiphosela emanzini, amanzi aphenduka aba mnandi.
Khonapho uThixo wabenzela isimiso lomthetho, njalo khonapho wabalinga. 26 Wathi, “Nxa lilalela kakuhle ilizwi likaThixo uNkulunkulu wenu, lenze okulungileyo kuye, lilandele imilayo yakhe njalo ligcine lezimiso zakhe, kangisoze ngilehlisele iziga lezo engazehlisela amaGibhithe; ngoba nginguThixo olisilisayo.”
27 Basebefika e-Elimi lapho okwakulemithombo yamanzi elitshumi lambili khona, lezihlahla zelala ezingamatshumi ayisikhombisa. Basebemisa khona lapho eduze kwamanzi.
<- U-Eksodasi 14U-Eksodasi 16 ->