1 Tɛsalonika 3

1 Noo, no bee gɛ̀ yɛŋ lɛ fi le fi gha wa, bee chu ntaŋ ki bee shɛɛ jiŋ Atɛŋ bee maa, 2 bee mo be tuŋ Timoti wù mwa bwee wese besabɛŋ wù besa bo lɛne Nyo le yi saaka wù joŋe wù kune Kletu le. Bee gɛ̀ tuŋ lɛ wu tô wu lêesɛ bɛŋ, wu teefɛ bɛŋ yi fitele fì bɛŋ le bɛŋ leese yi Kletu le, 3 lɛ keefɛ baŋgɛ banɛ ka bo shiŋshɛ muh mu bɛŋ le gɛ. Bɛŋ kibɛɛ kee lo lɛ baŋgɛ le wa fiɛɛ fiesa besabɛŋ. 4 Bɛŋ kee lɛ sege bee gɛ̀ bee besabɛŋ bee gɛ̀ sɛɛŋ bɛŋ le baaŋ lo lɛ besabɛŋ le be yɛ̂ŋ baŋgɛ. Nyume gɛh yɛɛŋyɛɛŋ no fi le fi kooshɛ wa bɛŋ kee. 5 Le fiɛɛ fì gɛ̀ ge mɛ lɛ ndoo n'yɛŋ lɛ fi le fi gha wa, mɛ mo ntuŋ Timoti ki ŋkɛɛ no mbɛmɛ wene le, nje ŋgɛ ŋkɛme nfaaŋ lɛ taŋlo muh wɛɛ wù mone bamii le wu moŋ wa bɛŋ wu ge lɛme chichii chì bee lɛŋ fɛ bɛŋ le chi tu achiji.

Timoti nya saaka wù kune mbɛmɛ bamii ba Tɛsalonika le

6 Geenɛ mɛɛse Timoti le wu to fɛ bɛŋ le, wu kaasɛ wu tu jiŋ fɛ bee le, wu sɛɛŋ saaka wù joŋe wu kune fitele fì bɛŋ leese yi Kletu le bɛ no bɛŋ dûunyi kiŋkoŋɛ fɛ bamii le. Wu le wu sɛɛŋ tɛ no bɛŋ kwaji bee chuule bɛŋ ka kɛme kiŋkoŋɛ ki bɛŋ yɛ̂ŋ bee le no bee kɛme tɛ kiŋkoŋɛ ki be yɛ̂ŋ bɛŋ le. 7 Nje finɛ booŋ ba bwee wese, yi nsaasɛ bɛ baŋgɛ ba bee kɛme le, shɛ́ŋ jiɛɛ bee kune bɛŋ baaŋ nje fitele fì bɛŋ leese yi Kletu le. 8 Mɛɛse bee le be yɛnɛ nje bɛŋ lɛ̂me bɛŋ tɛ̂ɛme bena ba Tada. 9 Noo, bee nyâa kiyone Nyo le baaŋ nje bɛŋ. Bee nyâa nje njoŋ wù bee yuge a Nyo wese besabɛŋ fwe nje bɛŋ. 10 Bee buune chiɛɛŋ antaŋ bɛ fɛnshɛ lɛ taŋlo bee ka be yɛŋ bɛŋ le ajii, wu lɛ bee nya bɛŋ bɛ fiɛɛ fì baaŋ fi fuge yi mbɛmɛ wene le.

11 Bee buune lɛ Nyo wù le Chiji wese besabɛŋ kibɛɛ mo Tada wese besabɛŋ wù Jiso gwênyɛ je lɛ bee to fɛ bɛŋ le. 12 Bee buune tɛ lɛ Tada ge kiŋkoŋɛ kena kûu ki gɛ̂ɛne fwe no bɛŋ koŋe bikwɛɛ biɛna bɛ bamii bachii, yɛɛŋyɛɛŋ no bee koŋe bɛŋ. 13 Bee buune noo, wu lɛ wu ge muntele mwɛna tɛɛme, bɛŋ nyume jialɛ sɛŋ, bɛŋ yuude a Nyo wù le Chiji wese besabɛŋ fwe sege Tada wese besabɛŋ wù Jiso too bɛ bamii ba le be bachii.

<- 1 Tɛsalonika 2 1 Tɛsalonika 4 ->