1 Nimitzpaquilismacas, TOTECO, ica nochi noyolo.

Nitepohuilis nochi cati cuali tijchijtoc.

2 Nijpiya hueyi paquilisti por ta,

huan yeca nihuicas huan nimitzpaquilismacas, Toteco, ta Cati Más tiHueyi.

3 Nocualancaitacahua cholojtehuase.

Huetzise mictoque moixpa.

4 Pampa ta tiquinpanextilijtoc masehualme para niitztoc xitahuac moixpa.

Titenextilijtoc para nijchijtoc cati cuali.

Timosehuijtoc ipan mosiyaj cati cuajcualtzi huan titetajtolsencahua xitahuac.

5 Tiquinajhuas nochi masehualme ipan nochi talme cati amo mitzneltocaj.

Tiquintzontamiltis nochi inijuanti cati amo cuajcualme.

Tiquixpolos inintoca para nochipa.

6 Nocualancaitacahua miquise,

huan inihuaya polihuise nochi inialtepehua.

Pampa ta tiquintamitasosolos huan amo teno mocahuas.

Amo aqui quinelnamiquis.

7 Pero TOTECO tanahuatis para nochipa.

Yaya mosehuía ipan isiyaj cati cuajcualtzi nepa ilhuicac huan tetajtolsencahua.

Cati yaya quichihua, ya nopa xitahuac.

8 Toteco quintajtolsencahuas xitahuac nochi talme ipan taltipacti huan inimasehualhua.

Yaya quintatzacuiltis sese inijuanti quej quinamiqui por nopa tajtacoli cati quichijtoque.

9 Nochi cati pilteicneltzitzi huelis motemachise ipan TOTECO huan yaya quinmocuitahuis.

Huelis motatise ipan ya quema taijyohuíaj.

10 Quena, TOTECO, nochi cati mitzixmatij motemachise ipan ta para tiquinpalehuis,

pampa amo quema tiquintahuelcahuas cati mitztemohuaj.

11 Xihuicaca huan xijpaquilismacaca TOTECO,

cati mosehuía ipan isiyaj cuajcualtzi nepa ipan Jerusalén huan nochi quinahuatía.

Xiquinpohuilica nochi masehualme ipan taltipacti cati yaya quichijtoc.

12 TOTECO quintzontamiltis cati temictíaj pampa quej nopa quinamiqui quincuepilis.

Quinelnamiqui cati motequipachohuaj,

quintacaquilía quema masehualme cati taijyohuíaj quitzajtzilíaj para ma quinpalehui.

13 Techtasojta, TOTECO.

Xiquita quenicatza nitaijyohuía inimaco cati amo quinequij nechitase.

Techmanahui pampa quinequij nechmictise,

14 huan na nimitzpaquilismacas iniixpa nochi masehualme.

Niquinpohuilis nochi cati mosentilíaj ipan altepet Jerusalén cati techchihuilijtoc.

Nelía nipaquis pampa techmaquixtijtos.

15 Mosisinijca masehualme ten nochi talme huetzise ipan nopa ostot cati inijuantijya quichijque.

Quitatijtoque se taquetzti para ma masica sequinoc,

pero inijuanti masise.

16 TOTECO quichijtoc para nochi ma quimatica para yaya xitahuac tetajtolsencahua.

Yaya quichihua para ma huetzica ipan taquetzti cati ica inimax

17 Nochi amo cuajcualme yase micta.

Quena, nepa ajsitij nochi masehualme cati amo quielnamiquij Toteco Dios.

18 Pero Toteco amo quinelcahuas cati teicneltzitzi.

Yaya nochipa quinmacas cati quichiyaj para quiselise.

19 Ximotanana, TOTECO.

Amo xiquincahuili masehualme más ma quipiyaca chicahualisti.

Xiquintajtolsencahua huan xiquintatzacuilti nochi masehualme cati amo mitzixmatij.

20 Xijchihua ma majmahuica, TOTECO.

Ma momacaca cuenta nochi masehualme ipan nochi talme para inijuanti san panoni.

<- SALMOS 8SALMOS 10 ->