1 ¡NoTeco Dios, masehualme ten sequinoc talme hualajque huan moaxcatijque motal!

Motiopa quichijque amo tapajpactic huan altepet Jerusalén quitamisosolojque.

2 Nochi inintacayo momasehualhua quinmajcajtoque para ma quincuaca totome.

Hasta quinmajcajtoque ininacayo mototajtzitzi,

nopa tatzejtzeloltique tacame cati moquetzque moixpa,

para ma quincuaca tecuanime.

3 Quena, tocualancaitacahua quintzontamiltijque nochi nopa masehualme ipan altepet Jerusalén.

Huan inieso cati toyajqui motalo quej hueyat,

huan amo mocajqui yon se para quintalpachos.

4 Huan ama nochi talme cati techyahualojtoque techpinajtíaj huan techhuetzquilíaj.

5 Toteco Dios, ¿hasta quema tamis ticualantos ica tojuanti?

¿Huelis para nochipa mocualancayo eltos quej tit?

6 Xijtitani mohueyi cualancayo ipan nopa talme campa amo mitzixmatij,

huan ipan altepeme campa amo aqui mitzhueyimati,

pero amo xijtitani ipan tojuanti.

7 Pampa inijuanti quintzontamiltijque nochi moisraelita masehualhua huan quinsosolojque nochi calme.

8 ¡Amo xiquelnamiqui huan amo techtatzacuilti por inintajtacolhua tohuejcapan tatahua,

cati inijuanti quichijque huejcajquiya!

Más cuali nimantzi techtasojta pampa ayecmo tijpiyaj fuerza.

9 Toteco Dios, titotemaquixtijca, techpalehui,

para quej nopa nochi mitzhueyitepanitase.

¡Techmaquixti huan techtapojpolhui totajtacolhua ica mohueyi taicnelilis!

10 Pampa sinta amo techpalehuis,

huajca nopa masehualme cati amo mitzneltocaj quiijtose:

“¿Canque itztoc ininTeco Dios?”

Huajca xiquintatzacuilti, Toteco, iniixpa nochi masehualme, pampa quinmictijque momasehualhua.

11 Xijtacaquili inintequipachol nopa masehualme cati tzactoque,

huan ica mohueyitilis huan mohueyi chicahualis,

xiquinmanahui cati quinixquetztoque para quinmictise.

Xiquinmaquixti para nochi ma quiitaca mohueyi chicahualis.

12 TOTECO, xiquincuepili chicome huelta cati mitzchihuilijque quema mitzpinahualtijque nopa talme cati san mitzhuetzquilíaj.

13 Huan huajca tojuanti, timomasehualhua cati tiitztoque quej timoborregojhua,

timitzhueyichihuase para nochi tonali huan timitzpaquilismacase ica huicat para nochipa.

<- SALMOS 78SALMOS 80 ->