1 NoTeco Dios, techtasojta,

pampa nocualancaitacahua semilhuit nechtepotztocatinemij.

Nochi se tonal nechtaijyohuiltíaj.

2 Nochi se tonal nechcuatetzopaj huan noca paquij.

Tahuel miyaqui itztoque cati quinequij nechtamiltise.

3 Pero quema nijmati nimajmahui, na nimotemachía ipan ta.

4 Nijhueyichihua Toteco Dios huan nimotemachía ipan ya para nechmanahuis quej techtajtolcahuilijtoc quichihuas ipan icamanal.

Huajca pampa nimotemachía ipan ya,

¿taya huelis nechchihuilis se masehuali?

5 Talojtzitzi quipataj nocamanal huan san moilhuíaj quenicatza huelis nechchihuilise cati amo cuali.

6 Mosentilíaj huan quisencahuaj taya nechchihuilise.

Teipa motatíaj ojtenti huan nechchiyaj ma nipano para nechmictise.

7 Toteco Dios, xijtachili nochi inintaixpanolhua huan xiquintatzacuilti.

Ica mohueyi cualancayo, xiquintahuiso hasta talchi.

8 Ta techitztoc quesqui hueltas nimochololtijtoc huan nimochoquilijtoc.

Nochi noixayo tijsentilijtoc huan ticajoctoc ipan se frasco.

Huan ipan moamatapohual tiquijcuilojtoc quesqui imiyaca.

9 NoTeco Dios, quema nimitztzajtzilía para techpalehui,

nochi nocualancaitacahua nimantzi cholohuaj.

Quej nopa eli pampa cuali nijmati para ta tiitztoc nohuaya para techpalehuis.

10 Na nimotemachía ipan Toteco Dios.

Quena, nimopaquilismacas ipan TOTECO icamanal,

por nochi cati nechtajtolcahuilijtoc nechchihuilis.

11 Quena, nimotemachía ipan Toteco Dios huan amo nimajmahui.

¿Taya huelis nechchihuilis se masehuali?

12 NoTeco Dios, nochi cati nimitztajtolcahuilijtoc, nijtamichihuas.

Nimitztascamatilis ica tiohuicat pampa techpalehuijtoc miyac.

13 Ta Toteco Dios techmanahuijtoc para amo nimiquis,

huan amo techcahuilijtoc ma nihuetzi ipan tamanti cati amo cuali.

Yeca ama noja hueli ninentinemi moixpa nica ipan ni taltipacti ica masehualme cati itztoque.

<- SALMOS 55SALMOS 57 ->