31
Ma timotemachica miyac ipan Toteco
1 TOTECO, ipan ta nimotemachijtoc.
Amo quema xiquincahuili sequinoc ma nechpinahualtica.
Techmanahui ta cati nochipa tijchihua cati xitahuac.
2 TOTECO, ximoechcapano para techtacaquilis.
Techmanahuiqui nimantzi.
Techcahuili ma nimotati ipan ta.
Na niitztos momaco para techmanahuis.
3 Ipan ta nimotemachía para techpalehuis.
Quena, ipan ta niitztoc ica temachili.
Techyacantiyas para nochi ma mitzhueyitalica más.
4 Ta tinotamocuitahuijca,
techmaquixti ten ni taquetzti cati nocualancaitacahua quitatijtoque ipan noojhui para nechmasiltise.
5 Nimitzmactilía notonal momaco.
Techmanahui, TOTECO, ta tiDios cati titemachti.
6 Niquincualancaita nochi cati quinhueyichihuaj teteyome,
pampa teteyome amo teno hueli quichihuaj.
Pero na nimotemachijtoc ipan ta, TOTECO.
7 Nijpiya miyac paquilisti pampa techicnelía.
Ta tiquitztoc nochi notequipachol,
tiquitztoc nochi cati nopantitoc.
8 Amo techtemactili inimaco nocualancaitacahua.
¡Amo! Campa techquetzqui tacualca huan temachti.
David taijyohuiyaya ica cocolisti huan ica icualancaitacahua
9 TOTECO, techtasojta pampa niitztoc ipan tequipacholi.
Nisenchocatoc hasta nijmati tantiyahuij noixteyolhua.
Ipan noyolo huan notacayo nijmati nitamitaijyohuijtoc ica tequipacholi.
10 Ni tacuajcualoli nechtzontamiltía pampa san tequipacholi nijpano.
Sese xihuit cati pano san niaxti.
Ya tantinemi nochicahualis por notajtacolhua hasta ya nitacayohuactinemi.
11 Nocualancaitacahua huan hasta nocalnechcahua nechijiyaj.
Cati nechixmatij nechimacasij.
Cati nechitaj ojtipa nechtalcahuíaj.
12 Nochi masehualme nechelcajtoque quej ya nimictosquía.
Nechtahuelcajtoque quej se chachapal tepalcat ipan tasoli.
13 Nijcaqui quenicatza nocualancaitacahua nechistacahuíaj.
Yeca nechitzquitoc se hueyi majmajti huan nechmajmatía.
Inijuanti san sejco moijilhuíaj quenicatza huelise nechmictise.
14 Pero TOTECO, na nimotemachía ipan ta huan niquijtohua: “¡Ta tinoDios!”
15 Sesen tonali cati niitztoc momaco eltoc.
Techmanahui inimaco nocualancaitacahua cati nechtaijyohuiltijtinemij.
16 TOTECO, ma monexti moteicnelijcayo ipan moxayac quema techtachilía na,
nimotequipanojca.
Techmaquixti pampa ta techsenicnelijtoc.
17 TOTECO, na nimitztemojtoc.
Amo xiquincahuili ma nechpinahualtica.
Xiquinpinahualti masehualme cati amo cuajcualme.
Quena, inijuanti mocamatzacuase quema tiquintzontamiltis.
18 TOTECO, ayecmo molinis ininenepil inijuanti cati istacatij quema ya mictose.
Ayecmo itztose inijuanti cati mohueyimatij quema camanaltij para techtaijilhuise tojuanti cati tinemij xitahuac moixpa.
Quena, xiquinmicti cati mohueyitalíaj huan techmahuispolohuaj.
19 Pero ta, nelía hueyi moyolo ica inijuanti cati mitztepanitaj huan tiquinmocuitahuía.
Nelía cuali motaicnelilis cati ticajoctoc para tojuanti cati timotemachijtoque ipan ta,
tojuanti cati miyacapa titematiltijtoque para san ta tihueli techmanahuis.
20 TOTECO, ta techtatía campa ixtacatzi tojuanti cati timitztepanitaj,
huan nepa ta timocahua tohuaya.
Yeca fiero masehualme amo hueli techajsise ica cati quisencajtoque.
Quena, momaco techtatía huan amo aqui cati techmahuispolohua hueli techajsis.
21 Nimitztascamati, TOTECO,
pampa tijchijqui huejhueyi tamanti para technextilis moteicnelijcayo.
Ica temachili techyahualojtoc para techmanahuis ten nocualancaitacahua.
22 TOTECO, nimoilhuijtiquisqui para techtahuelcajtoya.
¡Pero amo cana!
Tijcajqui quema nimitztzajtzili techpalehuiqui, huan technanquili.
23 Nochi amojuanti cati aniaxcahua TOTECO,
xiquicnelica pampa yaya quinmocuitahuía cati itztoque temachme.
Pero ica masehualme cati mohueyimatij,
TOTECO quintaxtahuía hasta ica itanca nochi cati amo cuali quichijtoque.
24 Nochi amojuanti cati anmotemachíaj ipan TOTECO,