148
Ma quihueyimatica Toteco nochi tamanti cati yaya quichijchijtoc
1 ¡Ma quipaquilismacaca TOTECO nochi cati itztoque ipan ilhuicacti!
Quena, ten ajacatipa xijpaquilismacaca TOTECO.
2 Nochi amojuanti anilhuicac ehuani,
xijpaquilismacaca TOTECO.
Quena, xijpaquilismacaca nochi amojuanti cati anquitequipanohuaj nepa ilhuicac.
3 Ma quipaquilismacaca tonati huan metzti.
Ma quipaquilismacaca nochi nopa sitalime cati cuajcualtzi taahuíaj.
4 Ma quipaquilismacaca nopa ilhuicacti cati eltoc más huejcapa,
huan nopa apocti cati mopantía ajacatipa.
5 Xijpaquilismacaca TOTECO pampa yaya camanaltic huan mochijqui cati ama onca.
6 Yaya quinchijqui para eltose para nochipa,
huan quinmacac se tanahuatili cati amo quema mopatas.
7 Ma quipaquilismacaca TOTECO nochi cati itztoque ipan ni taltipacti.
Ma quipaquilismacaca nopa huejhueyi tapiyalme cati itztoque tatzinta hueyi at.
8 Ma quipaquilismacaca nopa tit, tesihuit, tasesecayot, apocti,
huan nopa ajacat cati quichihua ipaquilis.
9 Ma quipaquilismacaca nochi tepeme, tachiquilme,
huan nochi cuame cati temacaj inintajca huan nochi tiocuame.
10 Ma quipaquilismacaca TOTECO nochi tamanti tapiyalme,
huan nochi tecuanime, cohuame, huan totome.
11 Ma quipaquilismacaca nochi tanahuatiani cati itztoque ipan taltipacti,
huan nochi jueces,
huan nochi masehualme ipan nochi talme.
12 Ma quipaquilismacaca telpocame, ichpocame, huehuentzitzi huan coneme.
13 Ma quipaquilismacaca TOTECO pampa san yaya quinamiqui tijhueyimatise.
Ihueyitilis nelhueyi hasta quipano ilhuicacti huan taltipacti.
14 Yaya quinfuerzajmacatoc imasehualhua.
Ma quipaquilismacaca TOTECO nochi itatzejtzeloltica masehualhua,
nochi tojuanti cati tiisraelitame cati yaya techiyocatalijtoc para ma tiitztoca más inechca.