1 Nochi nonemilis huan para nochipa nimitzhueyimatis tinoTeco huan tinotanahuatijca.

2 Mojmosta nimitzhueyichihuas.

Quena, ama huan para nochipa nimitzpaquilismacas.

3 Nelía tihueyi, TOTECO, huan quinamiqui ma timitzhueyimatica nochi timasehualme.

Amo aqui quitamimachilía nochi mohueyitilis.

4 Nochi coneme cati moscaltijtiyase quielnamiquise cati tijchihua,

huan tepohuilise nopa tamanti cati tijchijtihualajtoc ica mohueyi chicahualis.

5 Na san nimoyolilhuis ten moyejyejca huan mohueyitilis,

huan nopa tatanexti cati mitzyahualojtoc.

Nimoilhuis ten nopa huejhueyi tiochicahualnescayot cati tijchijtoc.

6 Masehualme camanaltise ten nopa huejhueyi tamanti cati tijchijtoc.

Huan na nitepohuilis ten mohueyitilis.

7 Nochi masehualme ipan taltipacti camanaltise para nelía ticuali huan hueyi moyolo.

Quiijtose para tijchihua san cati xitahuac.

8 TOTECO, hueyi moyolo huan tahuel titetasojta.

Amo nimantzi ticualani huan titeicnelía miyac.

9 TOTECO ta cuali moyolo ica nochi masehualme huan motaicnelijcayo monextía ipan sesen tamanti cati tijsencajtoc.

10 TOTECO, nochi tojuanti cati ta techchijchijtoc timitztascamatij.

Quena, nochi tojuanti cati timitztoquilíaj timitzpaquilismacase.

11 Tojuanti sentic timocamanalhuise ten ihueyitilis motanahuatilis campa ta titanahuatía,

huan ticamanaltise quenicatza tijpiya hueyi chicahualisti.

12 Titepohuilise ten nopa huejhueyi tiochicahualnescayot cati tijchijtoc,

huan ten moyejyejca huan ten ihueyitilis motanahuatilis campa ta titanahuatía.

13 Pampa motanahuatilis amo quema tamis.

Ta tijpiyas tanahuatili ica nochi masehualme cati tacactiyase para nochipa.

14 Ta TOTECO tiquintanana nochi cati huetzij,

huan tiquinfuerzajmaca cati itztoque ipan tequipacholi.

15 Nochi masehualme ipan taltipacti mitztemohuaj,

huan mitzchiyaj para xiquinpalehui.

Ta tiquinmaca inintacualis quej quinpolojtihuala.

16 Ta ica momax tiquintiochihua nochi cati yoltoque,

pampa tiquinmaca cati quicuase huan cati quiise.

17 TOTECO quichihua san cati xitahuac,

huan quinextía para hueyi iyolo ipan nochi cati quichihua.

18 TOTECO itztoc ininechca nochi cati quitzajtzilíaj.

Quena, itztoc ininechca nochi cati quitemohuaj ica nochi iniyolo.

19 Yaya quinmaca cati quinequij nochi masehualme cati quiimacasij huan quitepanitaj.

Quintacaquilía quema quitzajtzilíaj ma quinpalehui huan quinmaquixtía ten cati amo cuali.

20 TOTECO quinmocuitahuía nochi cati quiicnelíaj,

pero nochi cati amo quitepanitaj,

Toteco quintzontamiltis.

21 Nijpaquilismacas TOTECO ica nocamac.

Nochi masehualme cati itztoque campa hueli quipaquilismacase para nochipa huan amo quema tamis.

<- SALMOS 144SALMOS 146 ->