138
Tascamatili por itapalehuil Toteco
1 Ica nochi noyolo nimitztascamatis, TOTECO,
huan nihuicas para ta iniixpa moilhuicac ejcahua.
2 Nimotancuaquetza iixmelac motiopa cati tatzejtzeloltic,
huan nimitztascamatis pampa nelía titetasojta huan titemachti.
Nochi cati techtajtolcahuilijtoc para tijchihuas,
tijtamichihuas pampa mocamanal nelía temachti quej ta titemachti.
3 Quema nimitztzajtzilía,
ta technanquilía huan techfuerzajmaca.
4 TOTECO, nochi tanahuatiani cati itztoque ipan ni taltipacti mitztascamatise,
pampa nochi inijuanti quicaquise cati tijtajtolcajtoc.
5 Quena, huicase por nochi nopa huejhueyi tamanti cati quichijtoc TOTECO,
pampa ihueyitilis nelhueyi.
6 Masque TOTECO tahuel hueyi,
yaya quintacaquilía cati moechcapanohuaj.
Pero cati mohueyimatij,
monequi moquetzase huejca ten Toteco,
pampa yaya amo quinequi quinitas.
7 Sinta niitztoc ipan taijyohuilisti, ta TOTECO,
techmanahuía huan techmaquixtía.
Huan quema nechtehuíaj nocualancaitacahua,
ta tijxitahua momax huan techmaquixtía ica mohueyi chicahualis.
8 TOTECO, ta tijchihuas nochi cati timoilhuijtoc para tijchihuas ipan na nonemilis.
Pampa nopa taicnelijcayot cati tijpiya ica na, TOTECO,
amo quema tami.